મહેસાણા / લાખો રૂપિયા લેનારા કબૂતરબાજ એજન્ટો હવે ભૂગર્ભમાં, અમેરિકામાં ગેરકાયદે ઘૂસણખોરીની લ્હાયમાં 4 ગુજરાતીઓનાં થયાં છે મોત

 

• અમેરિકામાં પ્રવેશતા ગુજરાતી પરિવાર ડૂબી જવાનો મામલો
• 4 એજન્ટ મારફત પરિવાર ગયો હતો કેનેડા 
• પરિવારના મૃત્યુ બાદ તમામ એજન્ટ ભૂગર્ભમાં ઉતરી ગયા

કેનેડાથી ગેરકાયદેસર રીતે અમેરિકામાં પ્રવેશ કરતી વખતે સેન્ટ લોરેન્સ નદીમાં 8 લોકો ડૂબી ગયા હતા. કેનેડાથી અમેરિકામાં ગેરકાયદેસર રીતે નદી પાર કરીને ઘૂસણખોરી કરનારા 8 લોકોના મોતના સમાચાર ગઈકાલે સામે આવ્યા હતા. ત્યારે હવે 8 મૃતકોમાંથી 4 ગુજરાતીઓ હોવાનું ખૂલ્યું છે. મહેસાણાના વિજાપુરના માણેકપુર ગામના એક જ પરિવારના 4 લોકો અમેરિકા જતા મોતને ભેટ્યા છે. 

મહેસાણાના એક જ પરિવારના 4 લોકોના મોત
મહેસાણા જિલ્લાના વિજાપુરના માણેકપુર ગામના એક જ પરિવારના 4 લોકોના નદીમાં ડૂબી જવાથી મૃત્યુ થયા છે. વિજાપુરના માણેકપુરના પ્રવીણ ચૌધરી, પત્ની દક્ષાબેન ચૌધરી, દીકરી વિધિ ચૌધરી અને દીકરા મિત ચૌધરીનું લોરેન્સ નદીમાં ડૂબી જવાથી મોત થયું છે. મૃતકો કેનેડાથી હોડી મારફતે અમેરિકા જઈ રહ્યા હતા. નાની હોડીમાં 8 લોકો સવાર હતા. ખરાબ વાતાવરણના કારણે હોડી ડૂબી ગઈ હતી. દુર્ઘટના બાદ 8 લોકોના મૃતદેહ મળી આવ્યા છે. 

કબૂતરબાજ એજન્ટોની શોધખોળ શરૂ
મહેસાણાના પરિવારના મૃત્યુ બાદ પોલીસે એજન્ટોની શોધખોળ શરૂ કરી છે. પરિવારના મૃત્યુ બાદ તમામ એજન્ટો ભૂગર્ભમાં ઉતરી ગયા છે. પોલીસે ખાનગી રાહે લાખો રૂપિયા લેતા કબૂતરબાજ એજન્ટોની શોધખોળ શરૂ કરી છે. આમાં 4 જેટલા એજન્ટો સંડોવાયેલા હોવાની માહિતી મળી છે. 

મારો ભાઈ 60 દિવસ પહેલા જ ગયો હતો કેનેડાઃ જસુ ચૌધરી
પ્રવીણ ચૌધરીના મૃત્યુ બાદ તેમના ભાઈ જસુ ચૌધરીનું નિવેદન સામે આવ્યું છે. તેમણે જણાવ્યું કે, મારો ભાઈ વિઝિટર વીઝા પર પરિવાર સાથે કેનેડા ગયો હતો. તેઓ 60 દિવસ પહેલાં જ મહેસાણાથી કેનેડા ગયા હતા. ગઈકાલે સમાચાર મળ્યા બાદ મારા ભાઈનો સંપર્ક કરવાનો પ્રયાસ કર્યો હતો.
 
હાલ કોઈ વિગત નથીઃ સાંસદ જુગલજી ઠાકોર
માણેકપુરા ગામના 4 વ્યક્તિના કેનેડામાં મોત મામલે રાજ્યસભાના સાસંદ જુગલજી ઠાકોરે જણાવ્યું કે, ઘટના અંગે તપાસ ચાલું છે, હાલ કોઈ વિગત નથી. હું મૃતકોના મૃતદેહને ભારત લાવવા અંગે વિદેશ મંત્રાલયને રજૂઆત કરીશ. આ તમામે બોર્ડર ક્રોસ કરી હતી કે નહીં તે મામલે કોઈ માહિતી મળી નથી. સમગ્ર મામલાની માહિતી વિદેશ મંત્રાલય જ આપી શકે છે.