BIG NEWS / જોધપુરમાં બે જૂથ વચ્ચે બબાલ બાદ પથ્થરમારો, પોલીસના લાઠીચાર્જ બાદ ઈન્ટરનેટ ઠપ

• રાજસ્થાનના જોધપુરમાં મોડી રાત્રે બબાલ
• બે સમુદાયો વચ્ચે ઘર્ષણ થતા પોલીસે કર્યો લાઠીચાર્જ
• રાતના 1 વાગ્યાથી ઈન્ટરનેટ સેવાઓ સ્થગિત

રાજસ્થાનની સૂર્યનગરીના જોધપુરમાં ઈદ અલ-ફિત્ર 2022 અને અક્ષય તૃતીયાના તહેવાર પહેલાં સોમવારે મોડી રાત્રે બે સમુદાયના લોકો સામસામે આવી ગયા હતાં. સંઘર્ષની શરૂઆત જલોરી ગેટ ચોક પર બાલમુકંદ બિસ્સા સર્કલ પર ભગવા ધ્વજને ઉતારીને તેના સ્થાને સમુદાયના ધ્વજને લહેરાવવાથી થઈ હતી. આથી મામલો વધારે બિચક્યો અને એકાએક સામસામે પથ્થરમારો શરૂ થઇ ગયો. આ પથ્થરમારામાં અનેક લોકો ઘાયલ પણ થયા.

જો કે, પોલીસને ઘટનાની જાણ થતા પોલીસ તુરંત ઘટનાસ્થળે પહોંચી ગઇ હતી. પોલીસે વચ્ચે પડી ટોળાંને દૂર કરવાનો પ્રયાસ પણ કર્યો. પરંતુ ભીડ બેકાબૂ બનતાં પોલીસે આ દરમિયાન લાઠીચાર્જ કરવો પડ્યો હતો. ભીડને વિખેરવામાં લાગેલી પોલીસ પર એક સમુદાય દ્વારા પથ્થરમારો પણ કરવામાં આવ્યો. જેમાં અનેક પોલીસકર્મી ઘાયલ થયા છે. બીજી તરફ ઘટનાને કવર કરી રહેલા મીડિયાકર્મીઓ પણ પોલીસના ગુસ્સાનો શિકાર બન્યા હતાં, પોલીસે 4 મીડિયાકર્મીઓને પણ માર માર્યો હતો. હાલ સમગ્ર શહેરમાં વાતાવરણ તંગ સર્જાયું છે. પોલીસે તહેવારને સાંપ્રદાયિક સંવાદિતા સાથે ઉજવવા અપીલ કરી છે.

CM અશોક ગેહલોતે લોકોને શાંતિ બનાવી રાખવાની અપીલ કરી

Rajasthan CM Ashok Gehlot appeals to maintain peace & cooperate in maintaining law & order to those involved in a clash between 2 groups at Jalori Gate, Jodhpur; tweets, "the administration has been instructed to maintain peace and order at all costs." pic.twitter.com/pqGnOBuZ85

— ANI MP/CG/Rajasthan (@ANI_MP_CG_RJ) May 3, 2022

રાતના 1 વાગ્યાથી જ ઈન્ટરનેટ સેવાઓ સ્થગિત કરી દેવાઇ

જિલ્લા પ્રશાસને તણાવપૂર્ણ વાતાવરણને જોતા સાવચેતીના પગલારૂપે ઈન્ટરનેટ સેવાઓ મોડી રાતથી જ બંધ કરી દીધી છે. જોધપુરમાં રાતના 1 વાગ્યાથી જ તમામ ઈન્ટરનેટ સેવાઓ બંધ કરી દેવામાં આવી છે. જોધપુરના ડિવિઝનલ કમિશનર હિમાંશુ ગુપ્તાએ જારી કરેલા આદેશમાં સમગ્ર જોધપુર જિલ્લામાં ઈન્ટરનેટ સેવા બંધ કરી દેવામાં આવી છે.

જોધપુર મુફ્તી સાહેબે મોરચો સંભાળ્યો

ઈદ પહેલાં સાંપ્રદાયિક સંવાદિતા બગડ્યા બાદ હવે સમાજના આગેવાન લોકો મોરચો સંભાળવા આગળ આવ્યા છે. જોધપુર મુફ્તી સાહેબ પણ રસ્તાઓ પર આવી પહોંચ્યા છે અને ભીડને સમજાવીને શાંત કરવાનો પ્રયાસ કરી રહ્યાં છે.

પોલીસે મીડિયાકર્મીઓને પણ માર માર્યો, 4 ઘાયલ

આ હિંસા બાદ પોલીસે કવરેજ કરી રહેલા મીડિયા કર્મીઓ પર પણ લાઠીચાર્જ કર્યો હતો. આ લાઠીચાર્જમાં ચાર મીડિયાકર્મીઓ ઘાયલ થયા હતા. પોલીસે મીડિયા કર્મીઓને કવરેજ કરતા રોકવાનો પ્રયાસ કર્યો હતો. ઘાયલ મીડિયાકર્મીઓને અન્ય સાથીદારોની મદદથી હોસ્પિટલમાં ખસેડવામાં આવ્યા છે. જ્યાં તેઓની હાલ સારવાર ચાલી રહી છે.