Prajwal Revanna Sex Scandal : કર્ણાટકમાં JDS નેતા પ્રજ્વલ રેવન્નાના વિવાદાસ્પદ વીડિયો કેસની તપાસ માટે SITની ટીમ તેમના પિતા એચડી રેવન્નાના ઘરે પહોંચી છે. પ્રજ્વલ રેવન્નાના પિતા એચડી રેવન્ના પર પણ જાતીય સતામણી અને અપહરણનો આરોપ છે. વાત જાણે એમ છે કે, આજે SITની ટીમ પીડિત મહિલાને લઈને હાસન જિલ્લાના હોલેનરસીપુરા સ્થિત રેવન્નાના ઘરે પહોંચી હતી. SITની સાથે ડીવાયએસપી, બે ઈન્સ્પેક્ટર અને એક પોલીસ કોન્સ્ટેબલની સાથે તપાસ ટીમ પીડિતા અને સ્થાનિક પોલીસ સાથે ઘટનાસ્થળે પહોંચી હતી. પંચનામા બાદ પોલીસ ઘટનાસ્થળે પીડિતાનું નિવેદન નોંધશે. રેવન્નાની પત્ની ભવાની સાથે રેવન્નાના વકીલ અને જેડીએસના કેટલાક નેતાઓ ત્યાં હાજર હતા. આ પહેલા કર્ણાટકના મુખ્યમંત્રીએ પ્રજ્વલ રેવન્ના કેસ પર ઉચ્ચ પોલીસ અધિકારીઓ અને SIT ટીમ સાથે ઈમરજન્સી બેઠક કરી હતી.
700 મહિલાઓએ લખ્યો હતો મહિલા આયોગને પત્ર
મહિલા અધિકાર જૂથોની 700થી વધુ મહિલાઓએ રાષ્ટ્રીય મહિલા આયોગને પત્ર લખીને પ્રજ્વલ અને એચડી રેવન્ના સામે કાર્યવાહી કરવાની માંગ કરી છે. આ ઝુંબેશ ગૂગલ ફોર્મ્સ દ્વારા ચલાવવામાં આવી હતી. પત્ર લખનાર મહિલાઓએ આ મામલે NCWના નબળા પ્રતિભાવ પર સવાલ ઉઠાવ્યા છે. ઓલ ઈન્ડિયા ફેમિનિસ્ટ એલાયન્સ, વુમન ફોર ડેમોક્રેસી અને મહિલા અધિકારો માટે લડતી અન્ય સંસ્થાઓના સભ્યોએ રાષ્ટ્રીય મહિલા આયોગના અધ્યક્ષને પત્ર લખીને એચડી રેવન્ના અને પ્રજ્વલ રેવન્ના સામે કડક કાર્યવાહીની માંગ કરી છે.
આ પત્રમાં 701 મહિલાઓની સહી છે. તેણે એચડી રેવન્ના અને પ્રજ્વલ રેવન્નાની તાત્કાલિક ધરપકડ કરવાની માંગ કરી છે અને ડિસેમ્બર 2023 થી પ્રજ્વલ રેવન્નાની ગુનાહિત પ્રવૃત્તિઓ અંગે સત્તાધારી પક્ષને ઉપલબ્ધ માહિતી વિશે પૂછપરછ કરવા ભાજપ અધ્યક્ષને સમન્સ જારી કરવાની વિનંતી કરી છે. NCW એચડી રેવન્નાને ધારાસભ્ય તરીકે ગેરલાયક ઠેરવવાની ભલામણ કરશે, અને તે સુનિશ્ચિત કરવાનો પણ પ્રયાસ કરશે કે પ્રજ્વલ રેવન્ના લોકસભાની ચૂંટણી જીતી જાય તો પણ તેને સાંસદ તરીકે હોદ્દો ન રાખવા દેવામાં આવે. મહિલા અધિકાર જૂથોએ પણ આ મામલે NCWના નબળા પ્રતિભાવ પર સવાલ ઉઠાવ્યા છે.
વધુ વાંચો : સવા લાખમાં ફોન ખરીદ્યો, 3 મહીનામાં જ ખરાબ... બાદમાં એરફોર્સ ઓફિસરે એવું શું કર્યું કે કંપનીએ પૂરા પૈસા ચૂકવી દીધા
MP/ MLA કોર્ટમાં ટ્રાન્સફર કરવામાં આવશે કેસ
વિગતો મુજબ હસનના સાંસદ પ્રજ્વલ રેવન્નાની જામીન અરજી ટૂંક સમયમાં જ સાંસદ/ધારાસભ્ય કોર્ટમાં ટ્રાન્સફર કરવામાં આવશે. SPP અને SITની ટીમ વચ્ચે CID ઓફિસમાં બેઠક થઈ હતી. રેવન્ના પર યૌન શોષણ અને અપહરણ કેસમાં 364A અને 365ની બિનજામીનપાત્ર કલમો હેઠળ કેસ દાખલ કરવામાં આવ્યો છે. અપહરણ કરાયેલી મહિલા હજુ સુધી મળી નથી. ગુમ થયેલી મહિલા અગાઉ એચડી રેવન્નાના ઘરે કામ કરતી હતી. મહિલાના પુત્રએ અપહરણની ફરિયાદ કરી છે. પોલીસે આ સંબંધમાં સતીશ બાબુ નામની વ્યક્તિની ધરપકડ કરી લીધી છે.
આ તરફ પોલીસ એચડી રેવન્નાને પણ શોધી રહી છે. પોલીસે રેવન્નાના નજીકના સાથી સતીષનો મોબાઈલ ફોન જપ્ત કર્યો છે, જેને મૈસૂર અપહરણ કેસમાં ધરપકડ કરવામાં આવી હતી. સતીષનો મોબાઈલ ફોન એફએસએલની ટીમે મોકલી આપ્યો હતો. સતીશે અનેક સ્થળોની મુલાકાત લીધી હતી. મહિલાને ટ્રેસ કરવા માટે, પોલીસ તેના મોબાઈલ નેટવર્ક દ્વારા સતીશના ઠેકાણા અને ગતિવિધિઓ પર નજર રાખવાનો પ્રયાસ કરી રહી છે. સરકારે આ કેસમાં SIT માટે વધારાના સપોર્ટ સ્ટાફની નિમણૂક કરવાનો આદેશ આપ્યો છે.
