IPL 2024 ની 51મી મેચ મુંબઈના વાનખેડે ક્રિકેટ સ્ટેડિયમ ખાતે મુંબઈ ઇન્ડિયન્સ અને કોલકાતા નાઈટ રાઈડર્સ વચ્ચે રમાઈ. આ મેચમાં કોલકાતા નાઈટ રાઈડર્સે મુંબઈ ઇન્ડિયન્સને હરાવી સિઝનની 7મી જીત હાંસલ કરી. ત્યારે આ હાર સાથે, મુંબઈ ઇન્ડિયન્સ માટે પ્લેઓફના તમામ દરવાજા લગભગ બંધ થઈ ગયા છે. આ મેચમાં એક અનોખો રેકોર્ડ પણ બન્યો હતો. બંને ટીમોએ મળીને કંઈક એવું કર્યું જે આ પહેલા આઈપીએલમાં માત્ર 3 વખત જોવા મળ્યું હતું.
MI vs KKR મેચમાં બન્યો અદભૂત રેકોર્ડ
મુંબઈ ઇન્ડિયન્સ અને કોલકાતા નાઈટ રાઈડર્સ વચ્ચે રમાયેલી આ મેચ બોલરોના નામે રહી હતી. આ સિઝનમાં અત્યાર સુધી લગભગ દરેક મેચ હાઈ સ્કોરિંગ રહી છે, પરંતુ આ મેચમાં બેટ્સમેન દરેક રન માટે સંઘર્ષ કરતા જોવા મળ્યા હતા. ખાસ વાત એ હતી કે આ મેચમાં બંને ટીમ ઓલઆઉટ થઈ ગઈ હતી. IPLના ઈતિહાસમાં આ ચોથી મેચ છે જ્યારે બંને ટીમોએ પોતાની તમામ વિકેટ ગુમાવી હોય. આ પહેલા આવું માત્ર 3 વખત થયું હતું. વર્ષ 2018 પછી આ પ્રથમ વખત હતું જ્યારે બંને ટીમો એક જ મેચમાં ઓલઆઉટ થઈ ગઈ.
IPL મેચમાં બંને ટીમો ઓલઆઉટ
- દિલ્હી vs રાજસ્થાન રોયલ્સ, નાગપુર, 2010
- કોલકાતા નાઈટ રાઈડર્સ vs આરસીબી, કોલકાતા, 2017
- મુંબઈ ઇન્ડિયન્સ vs સનરાઈઝર્સ હૈદરાબાદ, મુંબઈ, 2018
- મુંબઈ ઇન્ડિયન્સ vs કોલકાતા નાઈટ રાઈડર્સ, મુંબઈ, 2024
24 રને જીતી ગઈ કોલકાતા નાઈટ રાઈડર્સ
આ મેચમાં પ્રથમ બેટિંગ કરતા KKRની ટીમ 19.5 ઓવરમાં 169 રન સુધી સિમિત રહી હતી, જેમાં વેંકટેશ અય્યરે 70 રન બનાવ્યા હતા જ્યારે મનીષ પાંડેએ 42 રન બનાવ્યા હતા. લક્ષ્યનો પીછો કરવા ઉતરેલી મુંબઈ ઇન્ડિયન્સની ટીમ 145ના સ્કોર પર ઓલઆઉટ થઈ ગઈ હતી. જેના કારણે KKRએ આ મેચ 24 રને જીતી લીધી હતી. KKR તરફથી બોલિંગમાં મિચેલ સ્ટાર્કે 4 જ્યારે આન્દ્રે રસેલ, વરુણ ચક્રવર્તી અને સુનીલ નારાયણે 2-2 વિકેટ ઝડપી હતી.
વધુ વાંચો: બચી ગયા, નહીંતર કેચ લેવાના ચક્કરમાં ન થવાનું થઇ જાત! જુઓ ધડામ દઇને કેવી રીતે ટકરાયા MIના બે ખેલાડી
12 વર્ષની KKRની રાહ ખતમ થઈ
છેલ્લા 12 વર્ષમાં આ પ્રથમ વખત છે જ્યારે કોલકાતા નાઈટ રાઈડર્સે મુંબઈ ઇન્ડિયન્સને વાનખેડે ક્રિકેટ સ્ટેડિયમમાં હરાવ્યું હતું. અગાઉ કોલકાતા નાઈટ રાઈડર્સની ટીમ ઘરઆંગણે માત્ર એક જ વાર મુંબઈ ઇન્ડિયન્સને હરાવી શકી હતી. તેને આ જીત વર્ષ 2012માં મળી હતી. ત્યારે આ માત્ર બીજી વખત છે જ્યારે KKRએ વાનખેડે ક્રિકેટ સ્ટેડિયમમાં મુંબઈને હરાવ્યું છે.
