US News / ‘ઈરાન યુદ્ધના કારણે અમે હાર્યા’, JD વેન્સનું નિવેદન ચર્ચામાં; ટ્રમ્પની નીતિ સામે સવાલો ઉઠાવ્યાનો દાવો!

અમેરિકાની મિડટર્મ ચૂંટણીમાં રિપબ્લિકન પાર્ટીને કારમી હારનો સામનો કરવો પડ્યો છે. આ હાર બાદ ઉપરાષ્ટ્રપતિ જે.ડી.વેન્સ સોશિયલ મીડિયા પર એક આકરી પોસ્ટ લખી છે, જેના કારણે પાર્ટીમાં ભારે ભૂચાલ આવી ગયો છે. વેન્સએ સ્વીકાર્યું કે પાર્ટીની હારના વાસ્તવિક કારણો ઈરાન સાથેનું યુદ્ધ, આસમાને પહોંચેલી મોંઘવારી અને ઇઝરાયલ સાથેના સંબંધો છે. તેમણે પાર્ટીના નેતાઓને ચેતવણી આપી હતી કે તેઓ હારના કારણે ધ્યાન ન હટાવે અને પોતાની વિદેશ નીતિની ભૂલો સુધારે. એક રીતે જે.ડી.વેન્સે પાર્ટીની અંદરના આંતરિક ઝઘડાને દુનિયા સમક્ષ લાવી દીધો છે.

અમેરિકાની 2026ની મધ્યસત્ર ચૂંટણીના પરિણામોએ વોશિંગ્ટનના રાજકારણને સંપૂર્ણપણે હચમચાવી નાખ્યું છે. રિપબ્લિકન પાર્ટીની કારમી હાર બાદ આંતરિક ધમાસાણ અને નિવેદનોનો દોર શરૂ થયો છે. સૌથી મહત્વપૂર્ણ હુમલો ખુદ ઉપ રાષ્ટ્રપતિ જે.ડી.વેન્સે કર્યો છે. જે.ડી.વેન્સે સોશિયલ મીડિયા પ્લેટફોર્મ એક્સ પર એક લાંબી અને વિસ્ફોટક પોસ્ટ લખી. તેમણે ખચકાટ વિના કહ્યું કે રિપબ્લિકન પાર્ટીની ઐતિહાસિક હારના સૌથી મોટા કારણો ઈરાન સાથે ચાલી રહેલ યુદ્ધ, આસમાને પહોંચેલ મોઘવારી અને ઇઝરાયલ સાથે અમેરિકાના સંબંધો હતા. વેન્સનું આ નિવેદન અમેરિકન રાજકારણમાં ભૂચાલ લાવવા માટે પૂરતું છે, કારણ કે પહેલી વાર વહીવટીતંત્રમાં આટલી અગ્રણી વ્યક્તિએ સીધી રીતે હારનો શ્રેય વિદેશ નીતિની નિષ્ફળતાને આપ્યો છે.

"મતદારોની સંખ્યામાં વધારો મુદ્દો નહોતો; લોકોએ પક્ષ બદલ્યો."

ઘણીવાર, ચૂંટણી હાર્યા પછી રાજકીય પક્ષો બહાનું કાઢે છે કે તેમના સમર્થકો મતદાન કરવા માટે બહાર આવ્યા નથી. પરંતુ જે.ડી. વેન્સે આ તર્કને સંપૂર્ણપણે નકારી કાઢી હતી.

વેન્સે લખ્યું, "અમારા મતદારોએ ઉત્સાહપૂર્વક ભાગ લીધો. મતદાન સમસ્યા નહોતી. સૌથી મોટી સમસ્યા એ હતી કે 2024ની રાષ્ટ્રપતિની ચૂંટણીમાં ડોનાલ્ડ ટ્રમ્પ અને મને મત આપનારા ઘણા લોકોએ 2026માં ડેમોક્રેટિક પાર્ટીને મત આપ્યો."

તેમણે જણાવ્યું કે ચૂંટણી પહેલા રિપબ્લિકન ડેટા વિશ્લેષકોને લાગી રહ્યુ હતુ સ્થિતી બહુ સારી છે, ઘણા રાજ્યોમાં મતદાન સારુ થઇ રહ્યુ હતું. પરંતુ જ્યારે એક પોલસ્ટરએ ઊંડાણપૂર્વક આંકડા કાઢ્યા ત્યારે સત્ય સામે આવી ગયું. 2024માં ટ્રમ્પના સમર્થક રહેલા લોકો હવે ગુસ્સે હતા અને ડેમોક્રેટ્સ તરફ વળ્યા હતા.

આ પણ વાંચોઃ વર્લ્ડ / કોણ છે સુહાસ સુબ્રમણ્યમ? જેઓ અમેરિકાની પ્રતિનિધિ સભાના સભ્ય તરીકે પસંદ પામ્યા

ટ્રમ્પ માટે વેન્સના વલણનો શું અર્થ થાય છે?

જેડી વેન્સની આ પોસ્ટ ફક્ત ચૂંટણી વિશ્લેષણ નથી, પરંતુ અમેરિકાના શાસક રિપબ્લિકન પાર્ટીમાં ઊંડી તિરાડને ઉજાગર કરે છે. ડેમોક્રેટ્સ હવે બંને કોંગ્રેસ પર નિયંત્રણ ધરાવે છે, તેથી રાષ્ટ્રપતિ ટ્રમ્પ અને ઉપરાષ્ટ્રપતિ વાન્સ માટે મનસ્વી રીતે કાર્ય કરવું અશક્ય બનશે.

આ ચૂંટણીમાં અમેરિકન જનતાએ સ્પષ્ટ સંદેશ આપ્યો છે. તેઓ વિદેશમાં અનંત યુદ્ધો કરતાં પોતાના દેશના અર્થતંત્ર અને મોઘવારી પર ધ્યાન કેન્દ્રિત કરવાનું પસંદ કરે છે. જેડી વેન્સના મોટા ખુલાસા બાદ ટ્રમ્પ વહીવટીતંત્ર ઈરાન પ્રત્યેની તેની આક્રમક નીતિમાં ફેરફાર કરશે કે કેમ તે આગામી દિવસોમાં જોવાનું રસપ્રદ રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ