રિયાલિટી ચેક / અમદાવાદના તંત્ર પર હાઇકોર્ટના આદેશની પણ કોઈ અસર નથી? VTVના રિયાલિટી ચેકમાં રખડતાં ઢોર મામલે ખૂલી પોલ

• અમદાવાદમાં રખડતા પશુઓનો ત્રાસ યથાવત
• હાઈકોર્ટના કડક વલણ બાદ પણ સ્થિતિ ઠેરની ઠેર
• સોલા વિસ્તારમાં VTV NEWSનું રિયાલિટી ચેક 
• સોલા વિસ્તારમાં રખડતા પશુ નજરે પડ્યા

શુક્રવારે બિસ્માર રોડ, રખડતા ઢોર તેમજ ટ્રાફિકની સમસ્યાને લઈને હાઈકોર્ટે અમદાવાદ કોર્પોરેશન કમિશ્નર, પોલીસ કમિશ્નર તેમજ શહેરી વિભાગનાં પ્રિન્સીપાલ સેક્રેટરીને આડે હાથે લીધા હતા. ત્યારે શહેરમાં રખડતા ઢોરને લઈ અનેક લોકોએ પોતાનો જીવ ગુમાવવાનો વારો આવ્યો છે. VTV NEWS દ્વારા સોલા વિસ્તારમાં રિયાલિટી ચેક કર્યું હતું. હાઈકોર્ટનાં કડક વલણ બાદ પણ સ્થિતિ ઠેરની ઠેર જોવા મળી હતી. 

સોલા વિસ્તારમાં VTV NEWSનું રિયાલિટી ચેક 
સમગ્ર રાજ્યમાં રખડતા પશુઓને લઈ ઘણા નિર્દોષ લોકોએ પોતાનો જીવ ગુમાવ્યો છે. અમદાવાદમાં રખડતા પશુઓનો ત્રાસ હજુ પણ યથાવત છે. હાઈકોર્ટનાં કડક વલણ બાદ પણ સ્થિતિ ઠેરની ઠેર છે. આ બાબતે સોલા વિસ્તારમાં VTV NEWSનું રિયાલિટી ચેક કર્યું હતું. સોલા વિસ્તારમાં રખડતા પશુઓ નજરે પડ્યા હતા. ત્યારે રોજ હજારો લોકોની અવર જવરથી ધમધમતા રોડ પર રખડતા પશુઓ રોડ પર અડીંગો જમાવીને બેઠા હતા. રખડતા પશુઓનાં કારણે નિર્દોષ લોકો ભોગ બની રહ્યા છે. શહેરમાં રાહદારીઓને અડફેટે લેવાની ઘટનાઓ વધી રહી છે. ત્યારે હાઈકોર્ટે પણ આ મામલે સરકારને ફટકાર લગાવી હતી. રખડતા પશુને લઈ તંત્રની કામગીરી સામે ફરી સવાલો ઉઠ્યા હતા. 

મ્યુનિસિપલ કોર્પોરેશન બેદરકારી રાખશે તો આમ જનતાનું શું થશેઃ રાહદારી
આ બાબતે રાહદારીએ જણાવ્યું હતું કે, અત્યારે જે પ્રમાણે ઢોરો રોડ ઉપર ફરી રહ્યા છે. જેને લઈ અકસ્માત સર્જાવાની શક્યતા ખૂબ જ વધી જાય છે. ત્યારે મ્યુનિસિપલ કોર્પોરેશન જો આવી બેદરકારી રાખશે તો આમ જનતાનું શું થશે. કડક પગલા લેવા જરૂરી છે. જો નિર્દોષ માણસ જો મરી જતા હોય તો સીનીયર સીટીઝન માટે અલગ વ્યવસ્થા કરવી જોઈએ. 

અવાર નવાર વાહન રખડતા ઢોરને કારણે ગંભીર અકસ્માત સર્જાય છે
આ બાબતે અન્ય એક રાહદારીએ તેની પ્રતિક્રિયા આપતા જણાવ્યું હતું કે, અવાર નવાર રખડતા ઢોર રોડ પર આવી જતા હોય છે. જેનાં કારણે રોડ પરથી પસાર થતા વાહન ચાલકો અકસ્માતનો ભોગ બને છે. ત્યારે આ અકસ્માતમાં વાહનને તો નુકશાન થાય છે. પણ સામે ઢોર પણ ઈજાગ્રસ્ત થાય છે. ત્યારે આ મામલે કંઈ નિર્ણય કરવામાં આવે તેવી લોકોની માંગ છે.