બેદરકારી / એંગલ પર બાળકોને બેસાડ્યાં, SG હાઈવે પર સ્કૂલ રિક્ષાની જોખમી સવારીનો વીડિયો વાયરલ

અમદાવાદ શહેરના એસજી હાઈવે વિસ્તારમાં સ્કૂલ રિક્ષામાં બાળકોને જોખમી રીતે લઈ જવાનો વીડિયો સોશિયલ મીડિયા પર વાયરલ થતાં વાલીઓમાં ચિંતા ફેલાઈ છે. વીડિયોમાં રિક્ષામાં ક્ષમતા કરતાં વધુ બાળકોને બેસાડવામાં આવ્યા હોવાનું જોવા મળે છે. એટલું જ નહીં, કેટલાક બાળકોને રિક્ષાની પાછળના એંગલ પર પણ બેસાડીને મુસાફરી કરાવવામાં આવી રહી હોવાનું દૃશ્યોમાં સ્પષ્ટ થાય છે.

સુરક્ષા વ્યવસ્થા સામે ગંભીર સવાલો ઉભા કર્યા

આ ઘટનાએ સ્કૂલ વાહનોની સુરક્ષા વ્યવસ્થા સામે ગંભીર સવાલો ઉભા કર્યા છે. નિયમોનું ઉલ્લંઘન કરીને બાળકોના જીવને જોખમમાં મૂકતી આવી બેદરકારી સામે કડક કાર્યવાહી કરવાની માંગ ઉઠી રહી છે.

લોકોમાં ભારે રોષ જોવા મળ્યો

વાલીઓનું કહેવું છે કે રોજિંદી આવન-જાવનમાં બાળકોની સલામતી સાથે કોઈપણ પ્રકારનું સમાધાન ન થવું જોઈએ. બીજી તરફ, રિક્ષાચાલકોની બેદરકારી અને ટ્રાફિક પોલીસની કથિત નિષ્ક્રિયતા અંગે પણ લોકોમાં ભારે રોષ જોવા મળી રહ્યો છે.

સ્થાનિકોમાં માંગ ઉઠી છે કે સ્કૂલ વાહનોમાં ઓવરલોડિંગ સામે વિશેષ ડ્રાઈવ ચલાવી નિયમોનું કડક પાલન કરાવવામાં આવે, જેથી ભવિષ્યમાં આવી જોખમી પરિસ્થિતિઓ ટાળી શકાય અને માસૂમ બાળકોની સુરક્ષા સુનિશ્ચિત થઈ શકે.

આ પણ વાંચોઃ સુરતમાં યુપીના MLAના સ્વાગતમાં પરમિશન વગર લક્ઝરી કારનો કાફલો, પોલીસની કાર્યવાહી

સળગતા સવાલ

• બાળકોને સ્કૂલે મોકલી રહ્યા છો કે મોતના મુખમાં?
• ટ્રાફિક પોલીસ કોઈ મોટી દુર્ઘટનાની રાહ જોઈ રહી છે?
• સ્કૂલ વર્ધીના નામે ચાલતો જોખમી ખેલ ક્યારે બંધ થશે?
• શું થોડા રૂપિયાની બચત બાળકના જીવથી વધુ કિંમતી છે?
• નિયમો તોડતી સ્કૂલ રિક્ષાઓ કાર્યવાહી ક્યારે થશે?

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ