હર હર મહાદેવ / શું શિવલિંગ પર જળાભિષેક કરવા માટે મંદિરના જ લોટાનો ઉપયોગ કરી શકાય? જળ અર્પિત કરતાં સમયે આ મંત્રનો જાપ સૌથી શુભ

• ભગવાન શિવનો પ્રિય મહિનો શ્રાવણ મહિનો ચાલી રહ્યો
• ભગવાન શિવ પર એક કળશ જળ ચઢાવવાથી પ્રસન્ન થઈ જાય છે
• મંદિરના કળશથી શિવલિંગ પર જળ અર્પણ કરી શકાય કે નહીં?

ભગવાન શિવનો પ્રિય મહિનો શ્રાવણ મહિનો ચાલી રહ્યો છે. બમ બમ ભોલે અને હર હર મહાદેવના નાદ સાંભળવા માળે છે. હિંદુ ધર્મમાં આ પર્વનું વિશેષ મહત્ત્વ છે. ભગવાન શિવ પર એક કળશ જળ ચઢાવવાથી પણ તેઓ પ્રસન્ન થઈ જાય છે. ભગવાન શિવ પર જળાભિષેક કરતા સમયે કેટલીક ખાસ બાબતોનું ધ્યાન રાખવું જરૂરી છે. વિધિ વિધાન સાથે જળ અર્પણ કરવાથી ભગવાન શિવની વિશેષ કૃપા પ્રાપ્ત થાય છે અને ભક્તોની તમામ મનોકામના પૂર્ણ થાય છે. અયોગ્ય પ્રકારે જળ અર્પણ કરવાથી ભગવાન શિવ નારાજ થાય છે. અનેક વાર લોકો મૂંઝવણમાં મુકાઈ જાય છે કે, મંદિરના કળશથી શિવલિંગ પર જળ અર્પણ કરી શકાય કે નહીં? જે અંગે અહીંયા વિગતવાર જાણકારી આપવામાં આવી છે. 

મંદિરના કળશથી શિવલિંગ પર જળ અર્પણ કરી શકાય કે નહીં?
ભગવાન શિવને રુદ્ર કહેવામાં આવે છે, આ કારણોસર જળાભિષેકને રુદ્રાભિષેક તરીકે પણ ઓળખવામાં આવે છે. સોના, ચાંદી અથવા તાંબાના લોટાથી શિવલિંગ પર જળ અર્પણ કરવું જોઈએ. શિવલિંગ પર જળ ચઢાવવા માટે મંદિરના કળશનો ઉપયોગ કરવામાં આવે તો તેમાં કોઈપણ પ્રકારની આપત્તિ નથી. ભગવાન મહાદેવ ભક્તોની ભક્તિને જોવે છે અને તેમની નિ:સ્વાર્થ ભાવના અને કર્મથી પ્રસન્ન થાય છે. 

શિવલિંગ પર જળાભિષેક કરતા સમયે ખાસ મંત્રનો જાપ
ભગવાન શિવ એક કળશ જળાભિષેકથી જ ખુશ થઈ જાય છે અને વરદાન આપે છે. જળ ચઢાવતા સમયે 'ॐ नम: शिवाय' ની સાથે સાથે 'श्रीभगवते साम्बशिवाय नमः । स्नानीयं जलं समर्पयामि।'  અથવા 'ॐ ह्रीं ह्रौं नमः शिवाय।। ॐ तत्पुरुषाय विद्महे महादेवाय धीमहि तन्नो रुद्रः प्रचोदयात्॥' મંત્રનો જાપ કરવો જોઈએ. 

શિવલિંગ પર જળ અર્પણ કરવાની વિધિ

• શિવલિંગ પર જળ અર્પણ કરતા સમયે તમારું મોઢુ દક્ષિણ દિશા તરફ હોવું જોઈએ, જેથી ભગવાન શિવ પ્રસન્ન થઈને તમામ ઈચ્છા પૂર્ણ કરે છે. આ દિશાને શુભ માનવામાં આવે છે. 
• પૂર્વ દિશા તરફ મુખ રાખીને શિવલિંગ પર જળાભિષેક ના કરવો જોઈએ. આ દિશામાં રહીને જળ ચઢાવવાથી ભગવાન શિવ નારાજ થઈ શકે છે. 
• શિવલિંગ પર જળાભિષેક કરતા સમયે મુખ ઉત્તર અને પશ્ચિમ દિશામાં ના હોવું જોઈએ. આ દિશામાં મુખ રાખીને જળાભિષેક કરવાથી ફળ પ્રાપ્ત થતું નથી. 
• શિવલિંગ પર ઉતાવળમાં જળ અર્પણ ના કરવું જોઈએ. નાની ધારથી શિવલિંગ પર જળાભિષેક કરવો જોઈએ.