બબાલ / વડોદરામાં ફરીવાર જૂથ અથડામણ: બોલાચાલી બાદ મામલો ઉગ્ર બનતા પથ્થરમારો, 5થી વધુ લોકો ઇજાગ્રસ્ત, પોલીસે હાથ ધરી કાર્યવાહી

• વડોદરામાં વધુ એક વખત પથ્થરમારાની ઘટના ઘટી
• સાવલીના તલાવડી વિસ્તારમાં જૂથ અથડામણની ઘટના
• પથ્થરમારો થતા 5થી વધુ લોકો ઇજાગ્રસ્ત પણ થયા

વડોદરામાં છાશવારે પથ્થરમારો થયાની ઘટનાઓ સામે આવતી રહેતી હોય છે. ત્યારે વધુ એક વખત વડોદરામાં જૂથ અથડામણની ઘટના સામે આવી છે. શહેરના સાવલીના તલાવડી વિસ્તારમાં બે જૂથ વચ્ચે પથ્થરમારો થતા સમગ્ર વિસ્તારમાં વાતાવરણ ઉગ્ર બન્યું હતું.

પોલીસે ટોળાને વિખેરી સમગ્ર મામલો થાળે પાડ્યો
તલાવડી વિસ્તારમાં એકાએક બે જૂથ વચ્ચે બોલાચાલી થતા મામલો ઉગ્ર બનતા બંને જૂથ વચ્ચે પથ્થરમારો શરૂ થઇ ગયો હતો. જેમાં 5થી વધુ લોકો ઇજાગ્રસ્ત પણ થયા છે. જોકે આ ઘટનાની પોલીસને જાણ થતા જ તુરંત ઘટનાસ્થળે સાવલી પોલીસ પહોંચી ગઇ હતી. બાદમાં પોલીસે ટોળાને વિખેરી સમગ્ર મામલો થાળે પાડ્યો હતો. હાલમાં આ ઘટનામાં ઇજાગ્રસ્તોને સારવાર અર્થે સાવલીની સરકારી હોસ્પિટલમાં ખસેડવામાં આવ્યા છે.

અગાઉ દિવાળીમાં પણ પાણીગેટ વિસ્તારમાં પથ્થરમારો થયો હતો
ઇજાગ્રસ્તને માથાના ભાગે વાગેલું હોવાથી તેઓને તાત્કાલિક 108 મારફતે તેઓને સાવલીની સરકારી હોસ્પિટલમાં ખસેડવામાં આવ્યા હતા. હાલ સમગ્ર મામલો થાળે પાડતા ફરિયાદી કાર્યવાહી પણ પોલીસે હાથ ધરી છે. ઉલ્લેખનીય છે કે, દિવાળીના સમયગાળામાં પણ વડોદરાના પાણીગેટ વિસ્તારમાં પથ્થરમારો, આંગચંપી અને તોડફોડની ઘટના ઘટી હતી. બે જૂથ વચ્ચે બોલાચાલી બાદ દિવાળી ટાણે જ પાણીગેટ વિસ્તારમાં સ્થિતિ વણસી હતી. જેમાં તોફાની તત્વોએ પોલીસની ટીમ પર પણ પેટ્રોલબોમ્બ ફેંક્યા હતા. જ્યાર બાદ ઉચ્ચ પોલીસ અધિકારીઓએ વણસેલી સ્થિતિને કાબૂમાં લઇ સમગ્ર વિસ્તારમાં સઘન પેટ્રોલિંગ દ્વારા કોમ્બિંગની પ્રક્રિયા હાથ ધરી હતી.