વિશ્વ / ઈરાન પર મેગા સ્ટ્રાઇકની તૈયારીમાં અમેરિકા? ઈઝરાયલમાં ડઝન પ્લેનનો જમાવડો

અમેરિકા ઈરાન પર દબાણ વધારવા માટે નવી સૈન્ય રણનીતિ પર કામ કરી રહ્યું છે. આ અંતર્ગત ઈઝરાયેલમાં વધારાના એર-ટુ-એર રિફ્યુઅલિંગ વિમાનો તૈનાત કરવાની યોજના બનાવાઈ છે. બીજી તરફ હોર્મુઝ સ્ટ્રેટ અને ઈરાનના દક્ષિણ વિસ્તારોમાં હુમલાઓ ચાલુ છે. આ દરમિયાન ઈઝરાયેલમાં આ અમેરિકન વિમાનોની તૈનાતીને લઈને રાજકીય ચર્ચા પણ તેજ બની છે.

ઈઝરાયેલમાં કેમ મોકલાઈ રહ્યા છે વધારાના વિમાનો?

અમેરિકાના અનેક રિફ્યુઅલિંગ વિમાનો પહેલેથી જ ઈઝરાયેલમાં તૈનાત છે. હવે વધુ વિમાનો મોકલવાની તૈયારી ચાલી રહી છે. આવા વિમાનો હવામાં જ ફાઇટર જેટ અને બોમ્બર વિમાનોને ઇંધણ પૂરું પાડે છે. તેના કારણે લાંબા અંતરના મિશન સતત ચલાવી શકાય છે. સૈન્ય નિષ્ણાતોના મતે આ તૈનાતી ભવિષ્યના સંભવિત ઓપરેશનને ધ્યાનમાં રાખીને કરવામાં આવી રહી છે.

ટ્રમ્પ સમક્ષ કયા વિકલ્પો પર ચર્ચા?

અમેરિકન પ્રશાસન ઈરાન સામે વધુ કડક કાર્યવાહી અંગે વિચાર કરી રહ્યું છે. અહેવાલો મુજબ ઈરાનના વીજ ઉત્પાદન કેન્દ્રો અને પરમાણુ સંબંધિત સ્થળો સંભવિત નિશાન બની શકે છે. કેટલાક ગુપ્ત પરમાણુ પ્રોજેક્ટ્સ પર પણ અમેરિકાની નજર છે. જોકે અંતિમ નિર્ણય હજુ લેવાયો નથી.

કયા વિસ્તારોમાં વધી રહ્યા છે હુમલા?

હોર્મુઝ સ્ટ્રેટ અને ઈરાનના દક્ષિણ કિનારાના વિસ્તારોમાં અમેરિકી કાર્યવાહી ચાલુ હોવાનું જણાવાઈ રહ્યું છે. ખાસ કરીને બંદર અબ્બાસ વિસ્તારને વ્યૂહાત્મક રીતે મહત્વપૂર્ણ માનવામાં આવે છે. બીજી તરફ ઈરાન પણ અમેરિકાના વિવિધ સૈન્ય ઠેકાણાઓને નિશાન બનાવી રહ્યું હોવાનું દાવો કરી રહ્યું છે. બંને પક્ષ વચ્ચે તણાવ સતત વધી રહ્યો છે.

આ પણ વાંચોઃ ભારતનું પ્રથમ ખાનગી ઓર્બિટલ રોકેટ 'વિક્રમ 1' લોન્ચ, અવકાશમાં લઇને જશે PM મોદીનો સંદેશ

ઈઝરાયેલમાં રાજકીય વિવાદ કેમ ઊભો થયો?

અમેરિકન વિમાનોની વધતી સંખ્યાને કારણે ઈઝરાયેલમાં રાજકીય ચર્ચા શરૂ થઈ છે. હાલ ઉનાળાની રજાઓ દરમિયાન વ્યાપારી ફ્લાઇટ્સનું સંચાલન વધી રહ્યું છે. એરપોર્ટ પર મોટા સૈન્ય વિમાનો માટે જગ્યા ફાળવવાથી મુસાફરી પર અસર થવાની ચિંતા વ્યક્ત કરવામાં આવી રહી છે. કેટલાક નેતાઓએ વિમાનોની સંખ્યા મર્યાદિત રાખવાની માંગ કરી છે.

નેતન્યાહુની ચેતવણી અને આગામી સ્થિતિ

ઈઝરાયેલના વડાપ્રધાન બેન્જામિન નેતન્યાહુએ ઈરાનને કડક ચેતવણી આપી છે. તેમણે કહ્યું છે કે જો ઈરાન સીધો હુમલો કરશે તો તેનો જવાબ પહેલા કરતાં વધુ આક્રમક રીતે આપવામાં આવશે. હાલ બંને દેશો વચ્ચે તણાવ ચરમસીમા તરફ વધી રહ્યો છે અને સમગ્ર વિશ્વની નજર મધ્ય પૂર્વની સ્થિતિ પર ટકેલી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ