વરસાદી માહોલ / અષાઢી બીજે મેઘમહેર, રાજકોટના સરપદળમાં 3 ઇંચથી વધુ વરસાદ, બોટાદમાં પણ ધોધમાર વરસ્યો મેઘ

રાજકોટના ગ્રામ્ય વિસ્તારમાં વરસાદનું આગમન થયું. પડધરી તાલુકાના આસપાસના ગામમાં ધોધમાર વરસાદ થયો. સૌથી વધુ સરપદળ ગામે 3 ઈંચથી વધુ વરસાદ વરસ્યો. જેને લઈ સરપદળ અને આસપાસની નદીઓ બેકાંઠે વહેતી થઈ છે. અષાઢીબીજના દિવસે વાયણીલાયક વરસાદ થતા ખેડૂતોમાં ખુશીનો માહોલ જોવા મળ્યો..

બોટાદમાં મેઘરાજાએ ધમાકેદાર બેટિંગ કરી

બોટાદ જિલ્લામાં લાંબા વિરામ બાદ મેઘરાજાએ ધમાકેદાર બેટિંગ કરી છે. રાણપુર તાલુકાના ગ્રામ્ય વિસ્તારોમાં કડાકા-ભડાકા સાથે ધોધમાર વરસાદ વરસતા વાતાવરણમાં ઠંડક પ્રસરી ગઈ છે. નાગનેશ ગામ સહિત કિનારા, બરાનીયા અને આસપાસના વિસ્તારોમાં ભારે વરસાદ નોંધાયો છે.

વિરામ બાદ બોટાદ અને ગઢડામાં જામ્યો વરસાદી માહોલ

લાંબા વિરામ બાદ બોટાદ જિલ્લામાં ફરી એકવાર મેઘરાજાએ મહેર કરી છે. બોટાદ શહેર સહિત ભાવનગર રોડ અને પાળીયાદ રોડ વિસ્તારમાં વરસાદ વરસતા વાતાવરણમાં ઠંડક પ્રસરી છે. બીજી તરફ ગઢડા તાલુકાના લાખણકા, પડવદર, મોટી કુંડળ અને ઢસા સહિતના વિસ્તારોમાં ધીમીધારે વરસાદ નોંધાયો છે.

ચાર વેધર સિસ્ટમના કારણે વરસાદી માહોલ

હવામાન વિભાગના જણાવ્યા મુજબ હાલમાં રાજ્ય પર એકસાથે ચાર મહત્વપૂર્ણ હવામાન પ્રણાલીઓ સક્રિય છે. લો પ્રેશર સિસ્ટમ, અપર એર સાયક્લોનિક સર્ક્યુલેશન, વેસ્ટર્ન ડિસ્ટર્બન્સ અને મોન્સૂન ટ્રફના સંયુક્ત પ્રભાવથી અરબી સમુદ્ર તરફથી ભેજયુક્ત પવનો ગુજરાત તરફ આવી રહ્યા છે. તેના કારણે આગામી દિવસોમાં રાજ્યના વિવિધ વિસ્તારોમાં છૂટાછવાયા વરસાદ અને ગાજવીજની સ્થિતિ યથાવત રહેવાની સંભાવના છે.

આ પણ વાંચોઃ હવામાન વિભાગની મોટી આગાહી, આગામી 7 દિવસ ગુજરાતમાં ભારે વરસાદનું એલર્ટ, આ થશે મેઘમહેર

ગીર સોમનાથમાં ખેડૂતોને મળી રાહત

ગીર સોમનાથ જિલ્લાના વેરાવળ અને સોમનાથ વિસ્તારમાં લાંબા વિરામ બાદ વરસાદ ફરી શરૂ થયો છે. વહેલી સવારથી વરસેલા વરસાદથી ખેતી માટે અનુકૂળ માહોલ સર્જાયો છે. વાવણી બાદ વરસાદની રાહ જોઈ રહેલા ખેડૂતોમાં ખુશી જોવા મળી રહી છે. જો આગામી દિવસોમાં પણ વરસાદ ચાલુ રહેશે તો ખરીફ પાકને સારો લાભ મળશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ