સુરત / એક ગેંગ અને 93 ગુનાઓને અંજામ: આખા દેશમાં કરતાં ચોરી અને લૂંટફાટ, ફિલ્મી સ્ટાઈલમાં થઈ ધરપકડ

• આંતર-રાજ્ય ચીકલીગર ગેંગના બે સાગરીતો ઝડપાયા
• ગેંગની પુછપરછમાં પાંચ જેટલા ગુનાઓનો ભેદ ઉકેલાયા
• ઘરફોડ ચોરીની તપાસ દરમ્યાન સીસીટીવી ફૂટેજ પણ સામે આવ્યા 

ઘરફોડ ચોરી, લૂંટ, હત્યાનો પ્રયાસ, અપહરણ છેડતી, પોલીસ પર હુમલો જેવા 93 જેટલા ગુનામાં સંડોવાયેલ આંતર-રાજ્ય ચીકલીગર ગેંગના બે સાગરીતોની સુરતના ખટોદરા પોલીસે ફિલ્મી ઢબે પીછો કરી ધરપકડ કરી છે. ગેંગની પુછપરછમાં પાંચ જેટલા ગુનાઓનો ભેદ ઉકેલાઇ ગયાં છે. જ્યારે આંતર-રાજ્ય ગેંગ પાસેથી પોલીસે ઘરફોડ ચોરી કરવા માટે ઉપયોગમાં લેવાતા સાધનો, ચોરીની મોટર સાયકલ, રોકડ રકમ અને સોના-ચાંદીના ઘરેણાં સહિત 10.16 લાખની મત્તાનો મુદ્દામાલ કબજે કરી આગળની તપાસ હાથ ધરી છે.

બંને આરોપીઓની ધરપકડ કરી પુછપરછ હાથ ધરવામાં આવી 
મહારાષ્ટ્ર, રાજસ્થાન, ગુજરાત અને રાજ્યના અલગ અલગ શહેરોમાં ઘરફોડ, ધાડ-લૂંટ, ચોરી,હત્યાનો પ્રયાસ,અપહરણ સહિત પોલીસ પર હુમલા જેવા ગંભીર પ્રકારમાં 93 ગુનામાં સંડોવાયેલ આંતર-રાજ્ય ચીકલીગર ગેંગની ખટોદરા પોલીસ દ્વારા ધરપકડ કરવામાં આવી છે. ખટોદરા પોલીસ મથકના સૂત્રો પાસેથી મળતી માહિતી અનુસાર,ખટોદરા પોલીસને માહિતી મળી હતી કે,અલગ અલગ રાજ્યોમાં ગંભીર પ્રકારના ગુનામાં સંડોવાયેલ ચીકલીગર ગેંગના બે સાગરીતો ચોરીના સોના-ચાંદીના ઘરેણાં વેચવા માટે ફરી રહ્યા છે.જે આરોપીઓ ખટોદરા વિસ્તારમાં આવેલ ગાંધી કુટીર ખાડીના પ્લાન્ટ નજીકથી વગર નમ્બર પ્લેટની મોટર સાયકલ લઈ પસાર થવાના છે. જે માહિતીના આધારે ખટોદરા પોલીસની ટીમે વોચ ગોઠવી હતી.આ સમયે વગર નંબર પ્લેટની મોટર સાયકલ લઈ પસાર થઈ રહેલા બંને શખ્સોને પોલીસે ઝડપી પાડવાનો પ્રયાસ કર્યો હતો. જ્યાં પોલીસને જોઈ આરોપીઓએ પોતાની પાસે રહેલ મોટર સાયકલ પુરઝડપ હંકારી ભાગવાનો પ્રયાસ કર્યો હતો. જ્યાં ખટોદરા પોલીસે આરોપીઓનો ફિલ્મી ઢબે પીછો કરતા બાઇક સ્લીપ થઈ ગઈ હતી.જે ઘટનામાં બે પૈકીના એકને હાથના ભાગે ફ્રેક્ચર જેવી ઇજા થતા સુરત નવી સિવિલ હોસ્પિટલમાં સારવાર આપવામાં આવી હતી.જ્યારે અન્ય એક આરોપીને માત્ર નાની-મોટી ઇજા થતાં પ્રાથમિક સારવાર આપ્યા બાદ તેને પણ ડિશચાર્જ આપી દેવામાં આવ્યો હતો.જે બાદ બંને આરોપીઓની ધરપકડ કરી પુછપરછ હાથ ધરવામાં આવી હતી.આરોપીઓ પાસેથી પોલીસે ઘરફોડ ચોરીના વપરાતા સાધનો, મોટર સાયકલ,રોકડા રૂપિયા,સોના-ચાંદીના ઘરેણાં સહિત કુલ 10.16 લાખની મત્તાનો મુદ્દામાલ કબ્જે કરી આગળની તપાસ હાથ ધરવામાં આવી હતી.

આરોપીઓ રિમાન્ડ મેળવવાની દિશામાં પોલીસે વધુ તપાસ હાથ ધરી
સુરતના ખટોદરા વિસ્તારમાં અલગ અલગ દિવસો દરમ્યાન થયેલ ઘરફોડ ચોરીના બનાવો બન્યા હતા.જે ઘરફોડ ચોરીની તપાસ દરમ્યાન સીસીટીવી ફૂટેજ પણ સામે આવ્યા હતા જે ફૂટેજમાં પણ કેટલાક શખ્સો કેદ થયા હતા.જે સીસીટીવી ફૂટેજમાં પણ આરોપીઓ ચીકલીગર ગેંગના સાગરીતો હોવાનું પોલીસ તપાસમાં સામે આવ્યું હતું. જેથી હાલ ઝડપાયેલા આંતર-રાજ્ય ચીકલીગર ગેંગના બંને સાગરીતોની પુછપરછ કરતા ખટોદરા, ઉધના, સહિત શહેર પોલીસ ચોપડે નોંધાયેલ પાંચ જેટલા ગુનાઓના ભેદ ઉકેલાઈ ગયા હતા.આરોપીઓ ગુનાને અંજામ આપવા મળસ્કેના ચાર વાગ્યાનો સમય જ વધુ પસંદ કરતાં હતાં.જ્યાં મળસ્કેના સમય દરમ્યાન બંધ મકાનોના નકુચા પોતાની પાસે રહેલા સાધનો વડે સિફતપૂર્વક તોડી નાખતા હતા. જે બાદ પોતાના ગુનાને અંજામ આપી ફરાર થઇ જતા હતા. આરોપીઓએ અન્ય ગુનાને પણ અંજામ આપ્યો હોવાની  શકયતા રહેલી છે.જ્યા ગેંગના અન્ય સાગરીતોની પણ સંડોવણી હોવાની શકયતા પોલીસે વ્યક્ત કરી છે. જ્યાં આરોપીઓ રિમાન્ડ મેળવવાની દિશામાં પોલીસે વધુ તપાસ હાથ ધરી છે.

વર્ષ 2015માં આરોપીને બે વર્ષ માટે તડીપાર પણ કરવામાં આવ્યો હતાં
પોલીસ તપાસમાં આરોપી રાહુલ ઉર્ફે પંડિતસિંહ ઉર્ફે ધર્મસિંહ બાદલ બંજારા સુરતના ભેસ્તાન આવાસનો રહેવાસી છે. જે આરોપી વિરુદ્ધ અગાઉ અજમેર જિલ્લાના પાલી અને બીડ જિલ્લાના મળી કુલ 67 જેટલા ગુનામાં આરોપી ઝડપાઈ ચુક્યો છે. જેમાં છેડતી, પોલીસ પર હુમલો, ઘરફોડ, લૂંટ, હત્યાનો પ્રયાસ જેવા ગંભીર ગુનામાં આરોપીની અગાઉ પોલીસ દ્વારા ધરપકડ થઈ ચૂકી છે. ઉપરાંત આરોપી રાહુલ બંજારા સામે મહારાષ્ટ્ર પોલીસ દ્વારા મહારાષ્ટ્ર કંટ્રોલ ઓફ ઓર્ગેનાઈઝ ક્રાઇમ હેઠળ પણ કાર્યવાહી થઈ ચૂકી છે. જ્યારે અન્ય એક આરોપી અર્જુનસિંગ બચ્ચનસિંગ ચીકલીગર ગુજરાત અને રાજસ્થાનના  અલગ અલગ શહેરોમાં આવેલ કુલ 25 પોલીસ મથકોમાં નોંધાયેલા ગુનામાં અગાઉ ઝડપાઇ ચુકયો છે. એટલું જ નહીં પરંતુ સુરત શહેરમાંથી વર્ષ 2015માં આરોપીને બે વર્ષ માટે તડીપાર પણ કરવામાં આવ્યો હતો.

બંને આરોપીઓ રીઢા ગુનેગારો છે
અત્રે ઉલ્લેખનીય ચીકલીગર ગેંગના આ બંને સાગરીતો વિરુદ્ધ જ 93 જેટલા ગંભીર પ્રકારના ગુના ગુજરાત, મહારાષ્ટ્ર, રાજસ્થાન સહીત અન્ય રાજ્યોના પોલીસ મથકોમાં નોંધાઇ ચુક્યા છે. જે ગુનામાં પણ આરોપીઓ સજા ભોગવી આવ્યા છે. ઝડપાયેલા બંને આરોપીઓ રીઢા ગુનેગારો છે. જે ગુનેગારો ઘરફોડ ચોરી જેવા ગુનાઓને અંજામ આપવામાં માસ્ટરી ધરાવે છે. સુરતની ખટોદરા પોલીસને હાલ તો ફિલ્મી ઢબે કુખ્યાત આ ગેંગને ઝડપી પાડવામાં સફળતા મળી છે. જ્યાં અન્ય આરોપીઓની પણ સંડોવણીની આશંકાના પગલે આરોપીઓના રિમાન્ડ મેળવવાની તજવીજ હાથ ધરી છે.