વિશ્વ / હોર્મુઝનો માર્ગ ખોલવા ટ્રમ્પ આતુર: ઈરાને મૂકી કડક શરતો, પરમાણુ કરાર મુલતવી રાખવા અમેરિકા તૈયાર

સ્ટ્રેટ ઓફ હોર્મુઝને જહાજોની અવરજવર માટે ફરીથી ખોલવાની દિશામાં ઈરાન અને ઓમાન વચ્ચે ચાલી રહેલી વાટાઘાટો અંતિમ તબક્કામાં પહોંચી ગઈ છે. જોકે, ઈરાને સ્પષ્ટ કર્યું છે કે કરાર થવા છતાં પણ હોર્મુઝમાંથી જહાજોની અવરજવર ત્યારે જ સામાન્ય થશે, જ્યારે અમેરિકા તેની મુખ્ય શરતો સ્વીકારી લેશે. આ રીતે તેહરાને આ માર્ગ ખોલવાની જવાબદારી સંપૂર્ણપણે અમેરિકાના માથે નાખી દીધી છે. બીજી તરફ, અમેરિકી મીડિયાનો દાવો છે કે હોર્મુઝ સ્ટ્રેટમાંથી જહાજોની અવરજવર પુનઃસ્થાપિત કરવા માટે અમેરિકી પ્રમુખ ડોનાલ્ડ ટ્રમ્પ ઈરાન સાથેના પ્રસ્તાવિત પરમાણુ કરારને હાલ પૂરતો મુલતવી રાખી શકે છે.

અહેવાલ મુજબ, ઈરાનના વિદેશ પ્રધાન અબ્બાસ અરાઘચીએ રવિવારે જણાવ્યું હતું કે ઈરાન અને ઓમાન વચ્ચે હોર્મુઝ સંબંધિત કરાર આખરી તબક્કામાં છે. તેમણે ઉમેર્યું કે જ્યાં સુધી ઈરાનની અન્ય શરતો પૂર્ણ નહીં થાય ત્યાં સુધી જહાજો માટે આ માર્ગ ખોલવામાં આવશે નહીં.

ન્યૂઝ એજન્સીના રિપોર્ટ અનુસાર, પ્રસ્તાવિત કરાર હેઠળ બંને દેશો વચ્ચે એક અસ્થાયી સમુદ્રી માર્ગ તૈયાર કરવામાં આવશે, જેનો ઉપયોગ અમેરિકા દ્વારા શરતો સ્વીકારાયા બાદ જહાજોની અવરજવર માટે કરી શકાશે. અરાઘચીએ વધુમાં જણાવ્યું કે ઈરાન અને અમેરિકા વચ્ચે લાંબા સમયથી સીધી વાતચીત થઈ નથી. તેમના મતે, જૂનમાં થયેલા વચગાળાના કરારનું અમેરિકાએ ઉલ્લંઘન કર્યું હતું. જોકે, મધ્યસ્થીઓ મારફતે બંને પક્ષો વચ્ચે સંદેશાની આપ-લે ચાલુ છે.

ANI એ 'ધ વોલ સ્ટ્રીટ જર્નલ' ના રિપોર્ટને ટાંકીને જણાવ્યું છે કે ટ્રમ્પ પ્રશાસન હોર્મુઝને પૂર્ણપણે ખોલવાની બાબતને પોતાની મોટી સિદ્ધિ તરીકે રજૂ કરી શકે છે અને પરમાણુ મુદ્દા પરની ચર્ચા પછી માટે છોડી શકે છે. અહેવાલો મુજબ, પ્રમુખ ટ્રમ્પ છેલ્લા કેટલાક અઠવાડિયાથી આ સંભવિત પરિણામ માટે ભૂમિકા તૈયાર કરી રહ્યા છે. તેમણે પોતાના વરિષ્ઠ સહયોગીઓને ખાનગીમાં સંકેત આપ્યો છે કે તેઓ તેહરાન સાથે કોઈ ઔપચારિક પરમાણુ કરાર વિના પણ પાછળ હટવા તૈયાર થઈ શકે છે. જોકે, હોર્મુઝ ખોલવાના બદલામાં ઈરાન દ્વારા મૂકવામાં આવેલી વ્યાપક માંગણીઓના કારણે બંને પક્ષો માટે એવો ઉકેલ લાવવો સરળ નહીં હોય જે સ્થાનિક અને આંતરરાષ્ટ્રીય સ્તરે સ્વીકાર્ય હોય.

ઈરાનની સુપ્રીમ નેશનલ સિક્યુરિટી કાઉન્સિલના સચિવ મોહમ્મદ બાઘેર જોલ્ઘાદરે શનિવારે કહ્યું હતું કે હોર્મુઝ ખોલતા પહેલાં અમેરિકાએ ઈરાન પર લાદેલા તમામ પ્રતિબંધો અને નૌકાદળની નાકેબંધી હટાવવી પડશે. ન્યૂ યોર્ક ટાઈમ્સના જણાવ્યા મુજબ, ઈરાને અમેરિકા સમક્ષ ક્ષેત્રમાંથી પોતાની સૈન્ય હાજરી નાબૂદ કરવા, યુદ્ધથી થયેલા નુકસાનની ભરપાઈ કરવા અને વિદેશોમાં જપ્ત કરાયેલી ઈરાની સંપત્તિઓને મુક્ત કરવાની પણ માંગ કરી છે. આ ઉપરાંત ઈરાનના સહયોગી દેશો (લેબનાન, ફિલિસ્તીન, યમન અને ઈરાક) પરના હુમલા અને તેહરાનને આપવામાં આવતી ધમકીઓ બંધ કરવાની શરત પણ મૂકવામાં આવી છે.

સાઉદી પર હુથી વિદ્રોહીઓનો ઘાતક હુમલો, 7 ના મોત

આ દરમિયાન, ઈરાન સમર્થિત યમનના હુથી વિદ્રોહીઓએ રવિવારે લાલ સમુદ્ર (Red Sea) માં સાઉદી અરેબિયાના મહત્વપૂર્ણ બંદર મોખા (Mokha) પર હુમલો કર્યો હતો. AP ના રિપોર્ટ અનુસાર, આ હુમલામાં 4 સૈનિકો અને 3 નાગરિકો સહિત 7 લોકોના મોત થયા છે, જ્યારે 15 લોકો ઘાયલ થયા છે. સાઉદી અરેબિયાની જાઝાન (Jazan) રિફાઇનરીને પણ મિસાઇલ અને ડ્રોન હુમલામાં નિશાન બનાવવામાં આવી હતી.

વધુ વાંચો : ધર્મેન્દ્ર પ્રધાને રાજીનામું કેમ આપ્યું? વિદ્યાર્થીઓ સાથેની વાતચીતમાં પૂર્વ 'પ્રધાન'એ કર્યો મોટો ખુલાસો

સાઉદી ઉર્જા મંત્રાલયના જણાવ્યા અનુસાર, હુમલાથી બંદર, તેની ઇમારતો અને ત્યાં રાખવામાં આવેલા સામાનને નુકસાન પહોંચ્યું છે. જોકે રિફાઇનરીમાં લાગેલી આગ પર કાબૂ મેળવી લેવાયો હતો. હુથી પ્રવક્તા યાહયા સારીએ જણાવ્યું કે દક્ષિણ-પશ્ચિમમાં આવેલી રિફાઇનરીને નિશાન બનાવાઈ હતી, જ્યાં દરરોજ આશરે 400000 બેરલ ક્રૂડ ઓઇલનું રિફાઇનિંગ થાય છે. આ હુમલા સાઉદી અરેબિયા, પાકિસ્તાન અને તુર્કી વચ્ચેના ત્રિપક્ષીય મક્કા સંયુક્ત સંરક્ષણ કરારના બે દિવસ બાદ થયા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ