કોની મિલીભગત? / અમદાવાદના ઉત્તમનગરથી વિરાટનગર રોડના જુઓ કેવાં હાલ? આખોય રસ્તો પશુઓથી ભરચક, ક્યાં સુધી જનતા પિસાતી રહેશે

• રોડ પર રખડતા પશુઓનો જમાવડો
• તંત્ર અને પશુ માલિકોની મિલીભગત
• 80 ફૂટ રોડ પર રખડતા પશુઓનો ત્રાસ
• તંત્રના પાપે વાહન ચાલકો હેરાન પરેશાન

અમદાવાદ શહેરના વિવિધ વિસ્તારોમાં જાહેર માર્ગો ઉપર રખડતા પશુઓનો ત્રાસ યથાયવત જોવા મળી રહ્યો છે. ગુજરાત હાઈકોર્ટ દ્વારા AMCને કડક આદેશ અપાયા હોવા છતાં પશુઓની સમસ્યા યથાવત જોવા મળી રહી છે. ભાજપના જ કાર્યકર્તાએ શહેરના જાહેર માર્ગો પર રખડતા પશુઓનો વીડિયો ઉતારીને તંત્રની પોલ ખોલી છે. વીડિયો વાયરલ થયા બાદ સ્થાનિકો તંત્ર સામે આક્ષેપો કરી રહ્યા છે. 

રસ્તા પર રખડતા પશુઓનો જમાવડો
અમદાવાદમાં રખડતા પશુઓએ રોડ પર આતંક મચાવ્યો છે, રોડ પર ઠેર-ઠેર રખડતા પશુઓના ઝુંડ જોવા મળી રહ્યા છે. અત્યાર સુધીમાં અનેક અકસ્માતો થઇ ચૂક્યા છે, અનેક લોકોને પશુઓએ અડફેટે લીધા છે અને અનેક લોકોના જીવ ગયા છે. ત્યારે હાઈકોર્ટના કડક વલણ બાદ પણ સ્થિતિ એવીને એવી જ છે. તંત્રની બેદરકારીથી જનતાને હાલાકીનો સામનો કરવો પડી રહ્યો છે. 

લોકોને સતાવી રહ્યો છે અકસ્માતનો ભય
શહેરના ઉત્તમનગરથી વિરાટનગર રોડ પર રખડતા પશુઓનો જમાવડો જોવા મળી રહ્યો છે. 80 ફૂટ રોડ પર પશુઓએ કબજો કરી લીધો હોય તેવા દ્રશ્યો સામે આવી રહ્યા છે. ત્યારે લોકો ભયના માહોલ વચ્ચે વાહન ચલાવી રહ્યા છે. લોકોને ડગલેને પગલે અકસ્માતનો ભય સતાવી રહ્યો છે. રખડતા પશુઓનો ભાજપ કાર્યકર્તાએ જ વીડિયો ઉતારી તંત્રની પોલ ખોલી છે. 

'ઢોરપાર્ટી જ પશુમાલિકને કરી દે છે સાવચેત', સ્થાનિકોનો આક્ષેપ 
જે બાદ સ્થાનિકો આક્ષેપ કરી રહ્યા છે કે પૂર્વ અમદાવાદમાં પશુ માલિકોને સ્થાનિક નેતાઓ, અધિકારીઓનો ટેકો હોવાથી પશુ માલિકો માફિયાની જેમ વર્તે છે. કોર્પોરેશનને કોઈ ફરિયાદ કરે તો ઢોરપાર્ટી જ પશુમાલિકને ફોન કરીને સાવચેત કરી દે છે. કોર્પોરેશનનો ડબ્બો આવે એ પહેલા જ સેટિંગબાજી થઇ જાય છે. ત્યારે આમ જનતાને રખડતા પશુઓના ત્રાસથી મુક્તિ મળશે કે કેમ તે જોવું રહ્યું.

સળગતા સવાલ
- રખડતાં પશુઓનો ત્રાસ ક્યાં સુધી?
- અકસ્માતને આમંત્રણ ક્યાં સુધી?
- તંત્રના પાપની સજા વાહન ચાલકો અને સ્થાનિકોને કેમ?
- પશુ માલિકો અને નેતાઓની મિલીભગતે લોકોને પરેશાની કેમ?
- ક્યાં સુધી લોકોમાં પશુઓને લઇ ભયનો માહોલ રહેશે?
- તંત્ર પશુ માલિકો સામે કડક પગલા કેમ નથી લેતી?
- અનેક લોકોએ જીવ ગુમાવ્યો છતા તંત્રની બેદરકારી કેમ?
- લોકોને રખડતા પશુથી મુક્તિ ક્યારે મળશે?
- શું પશુમાલિકો સામે કાર્યવાહી થશે કે કેમ?
- જવાબદાર અધિકારી, નેતા દંડાશે કે કેમ?
- ટ્રાફિક ડ્રાઇવ થાય છે તો રખડતા પશુઓને પકડવા ડ્રાઇવ કેમ નહીં?