હવામાન / કચ્છમાં ધોધમાર વરસાદ! હવામાન વિભાગે વધુ બે દિવસ લંબાવી આગાહી, જુઓ ક્યાં ક્યાં પડશે વરસાદ?

રાજ્યના અમુક વિસ્તારોમાં હવામાનમાં એકાએક પલટો આવ્યો છે. હવામાન વિભાગે રાજ્યના કેટલાક વિસ્તારોમાં કમોસમી વરસાદની આગાહી પણ કરી છે. ત્યારે કચ્છ જિલ્લાના વાતાવરણમાં પલટો જોવા મળ્યો છે. 

કચ્છમાં કમોસમી વરસાદ
કચ્છના ભચાઉ શહેરમાં બપોરથી જ વાદળછાયા વાતાવરણ વચ્ચે કમોસમી વરસાદ વરસ્યો છે. ભચાઉ, ચીરઇ, ચોપડવા અને લુણાવા સહિતના ગ્રામ્ય વિસ્તારોમાં વરસાદી ઝાપટા પડ્યાં છે.

છૂટાછવાયા વરસાદની આગાહી
ગુજરાતમાં હવામાન વિભાગે 2 દિવસ દરમિયાન કમોસમી વરસાદની આગાહી કરી છે. હવામાન વિભાગના જણાવ્યા પ્રમાણે વાતાવરણમાં પલટો આવીને છૂટાછવાયા સ્થળે હળવો વરસાદ પડશે. 13 એપ્રિલે આણંદ, દાહોદ, છોટાઉદેપુર, નર્મદા, ભરૂચ, સુરતમાં સામાન્ય વરસાદ પડી શકે છે. 

વાંચવા જેવું: પોલીસ ભરતી બોર્ડનો કાર્યક્રમ જાહેર, જુઓ ક્યારે આવશે પરીક્ષા ક્યારે પરિણામ,કેટલા ફોર્મ ભરાયા

14 એપ્રિલે આ જિલ્લામાં વરસાદની આગાહી
જ્યારે 14 એપ્રિલે વલસાડ, નવસારી, સુરત, ભરૂચ, ગીર સોમનાથ, દાદરાનગર હવેલી અને ભાવનગરમાં હળવો વરસાદ થવાની આગાહી કરવામાં આવી છે. સૌરાષ્ટ્રમાં અમરેલી, ભાવનગર અને ગીરસોમનાથમાં ભારે પવન અને ગાજવીજ સાથે વરસાદ વરસી શકે છે. મહત્વપૂર્ણ છે કે, રાજ્યમાં આગામી 2 દિવસ સુધી વાદળછાયુ વાતાવરણ રહેતા તાપમાનનો પારો ગગડશે. 2 થી 3 ડીગ્રી જેટલુ તાપમાન ઘટતાં લોકોને ગરમીથી રાહત મળશે. જ્યારે 2 દિવસ બાદ 2 થી 4 ડીગ્રી તાપમાન વધતાં લોકોને હીટવેવનો અહેસાસ થશે. હાલમાં તાપમાનનો પારો વધતાં ગરમીથી રાહત મેળવવા શક્કરટેટી અને તરબૂચનુ વેચાણ વધ્યુ છે.

VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો