અમદાવાદ / આ વરસાદે તો ટામેટાં-મરચાંના ભાવ આસમાને લાવી દીધાં, ખોરવાયું ગૃહિણીઓનું બજેટ

ચોમાસાની વિધિવત્ શરૂઆત થતાં જ શહેરમાં શાકભાજી બજારમાં મોંઘવારીનો જોરદાર કરંટ જોવા મળી રહ્યો છે. છેલ્લા કેટલાક દિવસથી વિવિધ ગ્રામ્ય વિસ્તારમાં થઈ રહેલા સતત વરસાદને કારણે માર્કેટ યાર્ડમાં શાકભાજીની આવકમાં મોટો ઘટાડો નોંધાયો છે.

પરિણામે સ્થાનિક બજારમાં વિવિધ શાકભાજીના ભાવમાં ૨૦ ટકાથી ૩૦ ટકા સુધીનો તોતિંગ વધારો ઝીંકાયો છે. સ્થાનિક વેપારીના મતે ખેતરમાં પાણી ભરાઈ જવાને કારણે માલની હેરફેર ખોરવાઈ છે, જેની સીધી અસર સામાન્ય પરિવારનાં માસિક રસોડા બજેટ પર પડી રહી છે.

બીજી તરફ ગૃહિણી માટે રસોડાનું બજેટ સંભાળવું મુશ્કેલ બન્યું છે. સામાન્ય દિવસોમાં જે શાકભાજી સામાન્ય કિંમતે મળતાં હતાં, તેના ભાવ હવે ર૦થી ૩૦ ટકા સુધી વધી ગયો છે. રોજિંદા ઉપયોગમાં આવતાં ટામેટાં, ભીંડા, દૂધી, કારેલાં, રીંગણ, મરચાં, કોથમીર સહિત અનેક શાકભાજીના ભાવમાં વધારો નોંધાયો છે.

વરસાદી માહોલને કારણે વાહન વ્યવહાર પણ કેટલીક જગ્યાએ ધીમો પડ્યો છે. બજારમાં શાકભાજીની આવક ઓછી થઈ રહી છે, પરિણામે ભાવમાં વધારો થયો છે. આવક ઘટતાં વેપારીઓને પણ ઊંચા ભાવે ખરીદી કરવી પડે છે, જેના કારણે ગ્રાહકો સુધી પણ શાકભાજી મોંઘાં પહોંચે છે.

આ પણ વાંચોઃ "બેટા, હવે મોટો થયો, કંઈક કામ ધંધો કર" પિતા આટલું બોલ્યા અને પુત્ર છરી લઈને તૂટી પડ્યો

ગૃહિણીઓના મતે રોજિંદા વપરાશના શાકભાજીના ભાવમાં થયેલા વધારાને કારણે ઘરનું માસિક બજેટ ખોરવાઈ રહ્યું છે. ઘણા લોકો જરૂરિયાત મુજબ જ ખરીદી કરી રહ્યા છે અને કેટલીક વસ્તુનું પ્રમાણ પણ ઘટાડવું પડી રહ્યું છે. અત્યારે ૮૦ રૂપિયાના કિલો ટામેટાં, ૧૨૦ રૂપિયાના કિલો મરચાં, ૨૦ રૂપિયાની એક દુધી, ૩૦ રૂપિયાની ૧૦૦ ગ્રામ ધાણા, ૫૦ રૂપિયાની ૧૦૦ ગ્રામ મેથી, ૮૦ રૂપિયાના કિલો ભીંડા માર્કેટમાં મળી રહ્યા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ