વિવાદ વકર્યો / હકાભાના આરોપોનો નિલેશ એરવાડિયાએ આપ્યો જવાબ, મને પણ મળી કરોડોની ઑફર, આંદોલન તોડવાના રોજ પ્રયાસ થતા

Hakabha Gadhvi Vs Nilesh Aerwadiya : મોરબીના જેતપર આંદોલનને લઈ દરરોજ નવી અપડેટ સામે આવી રહી છે. તાજેતરમાં હકાભા ગઢવીએ ખેડૂત આગેવાન નિલેશ એરવડિયા પર આક્ષેપ કર્યા બાદ હવે મામલો વધુ ગરમાયો છે. હાલની સ્થિતિ જોતાં હકાભા ગઢવી અને નિલેશ એરવડિયા વચ્ચે રીતસરનું વાકયુદ્ધ જામ્યું છે. બંને તરફ હાલ આક્ષેપ અને પ્રતિઆક્ષેપનો દોર યથાવત છે. હકાભા ગઢવીએ કહ્યું હતું કે, નિલેશ એરવાડીયાએ ખેડૂતો સાથે વિશ્વાસઘાત કર્યો તો આ તરફ નિલેશ એરવડિયાએ કહ્યું કે, આરોપ કોઇપણ કરી શકે, પુરાવો આપવો પડે, પુરાવા વગરના આક્ષેપોથી આંદોલન નહીં અટકે.

આવો જાણીએ શું કહ્યું નિલેશ એરવડિયાએ ?

મોરબી જિલ્લાના જેતપર ખેડૂત આંદોલનને લઈને ઊભા થયેલા વિવાદ વચ્ચે આંદોલનકારી નિલેશ એરવડિયાએ હકાભા ગઢવીના આરોપો અંગે પોતાની પ્રતિક્રિયા આપી છે. તેમણે સ્પષ્ટ શબ્દોમાં જણાવ્યું કે, કોઈપણ વ્યક્તિ આક્ષેપ કરી શકે છે, પરંતુ તે આક્ષેપોને પુરાવા સાથે સાબિત કરવું પણ એટલું જ જરૂરી છે. નિલેશ એરવડિયાના જણાવ્યા મુજબ હાલ ખેડૂત આંદોલનને નબળું પાડવા માટે વિવિધ પ્રકારના પ્રયાસો થઈ રહ્યા છે. તેમ છતાં ખેડૂતો પોતાની લડતમાંથી પાછળ હટવાના નથી અને ન્યાય માટેનું આંદોલન સતત ચાલુ રહેશે.

આ સાથે તેમણે વધુમાં દાવો કર્યો કે, તેમને કરોડો રૂપિયાની ઓફર કરવામાં આવી રહી છે, છતાં તેઓ કોઈપણ પ્રકારના દબાણ કે લાલચમાં આવ્યા વગર ખેડૂતોના હિત માટે સંઘર્ષ ચાલુ રાખશે. સ્વાસ્થ્ય અંગે ઉઠતા પ્રશ્નોના જવાબમાં નિલેશ એરવડિયાએ જણાવ્યું કે, સરકાર દ્વારા નિયુક્ત કરાયેલી મેડિકલ ટીમ સતત તેમની દેખરેખ રાખી રહી છે. દર ત્રણથી ચાર કલાકે જરૂરી તબીબી તપાસ કરવામાં આવે છે અને તમામ રિપોર્ટ ઉપલબ્ધ છે. કોઈને પણ શંકા હોય તો તે રિપોર્ટ જોઈ શકે છે. તેમણે અંતમાં જણાવ્યું કે ગુજરાતના ખેડૂતો હવે પોતાના અધિકારો માટે જાગૃત બન્યા છે. કોઈપણ પ્રકારના આક્ષેપો કે અવરોધો વચ્ચે પણ આંદોલન ન્યાયની માંગ સાથે આગળ વધતું રહેશે.

હવે જાણો હકાભા ગઢવીએ શું આક્ષેપ કર્યા હતા ?

હકાભા ગઢવીએ જણાવ્યું કે તેમણે નિલેશ એરવાડીયાને કહ્યું હતું કે જો સરકાર ચર્ચા માટે બોલાવે તો પ્રતિનિધિમંડળે મળવા જવું જોઈએ. જોકે તેમના જણાવ્યા મુજબ નિલેશ એરવાડીયાએ જવાબ આપ્યો હતો કે "એમાં આપણને શું મળે?" ત્યારબાદ હકાભાના દાવા મુજબ નિલેશ એરવાડીયાએ સરકાર સાથે વાતચીત થાય તો 25 કરોડ રૂપિયા માંગવાના હોવાનું કહ્યું હતું. એટલું જ નહીં, સરકાર સાથે બેઠકમાં જવા માટે 2 કરોડ રૂપિયા એડવાન્સ આપવાના હોવાની પણ વાત કરી હતી. હકાભાના કહેવા મુજબ તેમને 1 કરોડ રૂપિયા આપવાની ઓફર પણ કરવામાં આવી હતી. આ વાત સાંભળ્યા પછી તેમને આખી રાત ઊંઘ આવી નહોતી અને તેમને લાગ્યું કે આ વ્યક્તિ આખી સમિતિ અને ખેડૂત આંદોલનને નુકસાન પહોંચાડશે.

"મારે કોની પાસે જવું?''

હકાભાએ વધુમાં જણાવ્યું કે આ વાતનો પુરાવો રહે તે માટે તેમણે ફોન પર થયેલી વાતચીતનું રેકોર્ડિંગ કર્યું હતું. તેમના જણાવ્યા પ્રમાણે, "મારે કોની પાસે જવું? એટલે મેં પ્રૂફ માટે ફોન કર્યો અને રેકોર્ડિંગ કર્યું." તેમણે સમાજને સંબોધતા કહ્યું કે જો સમાજમાં આવા "વિભીષણ" હોય તો તેમને ઓળખવા જરૂરી છે. હકાભાએ પોતાના તમામ આક્ષેપો જાહેર કરતાં કહ્યું કે તેઓ ખેડૂત હિત માટે જ આંદોલનમાં જોડાયા હતા અને સત્યની લડાઈ લડી રહ્યા હતા.

હકાભા ગઢવીએ જણાવ્યું કે 21 જૂને તેમને એલિસભાઈએ બોલાવ્યા હતા અને ત્યારથી તેઓ ખેડૂત આંદોલન સાથે જોડાયેલા હતા. તેમણે સ્પષ્ટ શબ્દોમાં કહ્યું કે તેમણે આ સમગ્ર ઘટનાક્રમમાં એકપણ રૂપિયા લીધા નથી.

આ પણ વાંચો : ખેડૂત આગોવાનો જ બન્યા ખેડૂતોના દુશ્મનો, આંદોલનના નામે ખીસ્સા ભરવા માંગતા હતા, હકાભા ગઢવીના ગંભીર આક્ષેપો

જેતપરના ખેડૂતો અને સ્થાનિક લોકોએ તેમને ખૂબ પ્રોત્સાહન આપ્યું હતું અને બીજા દિવસે પણ તેઓ ખેડૂતોને પ્રોત્સાહન આપવા માટે ત્યાં ગયા હતા. જોકે ત્યારબાદ તેમને એવી ચર્ચાઓ સાંભળવા મળી કે તેઓ ભાજપના માણસ છે અને આંદોલનને વિખેરવા માટે હકાભા ત્યાંથી ખસી ગયા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ