- શાકભાજી વેચતા આંટીએ જીતી લીધું સોશિયલ મીડિયાનું દિલ
- શાકભાજી જોખીને આપવાના સાધનની પાછળ લગાડ્યો ક્યૂઆર કોડ
- કેન્દ્રીય આઈટી મંત્રી અશ્વિની વૈષ્ણવ પ્રભાવિત થયા, વીડિયો શેર કર્યો
ભારતમાં હવે ડિઝિટલ પેમેન્ટનો યુગ છે. લોકો નાનાથી માંડીને મોટા એમ તમામ પેમેન્ટ ઓનલાઈન લઈ રહ્યાં છે. ગૂગલ પે, ફોન પે સહિતની સેવાઓ પણ સારી રીતે ચાલી રહી છે. લોકો સ્કેન કરીને પેમેન્ટ લઈ રહ્યાં છે આ માટે તેઓ સ્કેનર સાથે રાખી રહ્યા છે. આ બધાની વચ્ચે શાકભાજી વેચી રહેલા એક આંટીની પૈસા લેવાની રીતે બધાને આશ્ચર્યચકિત કરી દીધા ત્યાં સુધી કે ખુદ કેન્દ્રીય આઈટી મંત્રી અશ્વિની વૈષ્ણવ પણ તેનાથી પ્રભાવિત થયા હતા અને તેમણે સોશિયલ મીડિયામાં આંટીનો વીડિયો શેર કર્યો હતો.
મહિલાએ શાકભાજી જોખવાના પાત્ર નીચે લગાડ્યો ક્યુઆર કોડ
મહિલાનો આ વીડિયો મહારાષ્ટ્ર કિસાનના ઇન્સ્ટાગ્રામ પેજ પર શેર કરવામાં આવ્યો હતો અને તેને 1.5 મિલિયન લાઈક્સ મળી છે. વીડિયોમાં આ વ્યક્તિ એક મહિલા વિક્રેતા પાસેથી કેટલીક મગફળી ખરીદતો જોવા મળી રહ્યો છે. જ્યારે તે તેમને ક્યૂઆર કોડ માટે પૂછે છે, ત્યારે આંટી તેમનું જોખવાનું પાત્ર ઊંધું કરીને સામે રાખી દે છે. શાકભાજી જોખીને આપવાના પાત્રની નીચે ક્યૂઆર લગાડેલો છે. આ જોઈને તે વ્યક્તિને ખૂબ નવાઈ લાગી
ઓગસ્ટ 2023માં 10 અબજ યુપીઆઈ ટ્રાન્ઝેક્શન
અશ્વિની વૈષ્ણવે આ વીડિયો શેર કરીને લખ્યું છે કે, 'ડિજિટલ ઈન્ડિયાએ એક નવો રેકોર્ડ હાંસલ કર્યો છે. યુપીઆઈ પેમેન્ટ ટ્રાન્ઝેક્શન ઓગસ્ટ-23માં 10 અબજના આંકડાને પાર કરી ગયું હતું.
જર્મનીના મંત્રી પણ યુપીઆઈથી નવાઈ પામ્યા હતા
ઉલ્લેખનીય છે કે થોડા દિવસ પહેલાં જર્મનીના પરિવહન પ્રધાન વોલ્કર વિસિંગનો ભારતમાં પેમેન્ટ કરવા માટે યુપીઆઇનો ઉપયોગ કરતો વીડિયો વાઇરલ થયા બાદ ભારતમાં જર્મન દૂતાવાસે ભારતના ડિજિટલ ઇન્ફ્રાસ્ટ્રક્ચરની પ્રશંસા કરી હતી અને તેને દેશની સફળતાની ગાથાઓમાંની એક ગણાવી હતી.
