- કચ્છની પ્રાથમિક શાળાઓના સમયમાં ફેરફાર
- કોલ્ડ વેવની આગાહીને ધ્યાને રાખીને સમયમાં ફેરફાર
- તમામ પ્રાથમિક શાળાઓનો સમય 2 કલાક સુધી લંબાવાયો
- જિલ્લા પ્રાથમિક શિક્ષણાધિકારીએ આપ્યા આદેશ
રાજ્યમાં ઠંડીનો પ્રકોપ યથાવત છે છેલ્લા ઘણા દિવસથી રાજ્યમાં પારો નીચે જતા હાડ થીજાવતી ઠંડી પડી રહી છે. હવામાન વિભાગની આગાહી મુજબ કચ્છમાં હજુ એક દિવસ કોલ્ડવેવ રહેશે. ત્યારે કોલ્ડ વેવની આગાહીને ધ્યાને રાખીને શાળાઓના સમયમાં ફેરફાર કરાયો છે. કચ્છની તમામ પ્રાથમિક શાળાઓનો સમય 2 કલાક સુધી લંબાવાયો છે. કચ્છ જિલ્લા પ્રાથમિક શિક્ષણાધિકારીએ આ અંગે આદેશ આપ્યો છે.
કોલ્ડ વેવના કારણે શાળાના સમયમાં ફેરફાર
જિલ્લા પ્રાથમિક શિક્ષણાધિકારીએ એક પરિપત્ર જાહેર કર્યો છે. જેમાં લખવામાં આવ્યું છે કે કોલ્ડ વેવના કારણે શાળાના સમયમાં ફેરફાર કરવામાં આવ્યો છે. જેમાં વધુમાં લખવામાં આવ્યું છે કે, શિયાળાની ઋતુમાં કોલ્ડ વેવના કારણે અન્ય સુચના ન થાય ત્યાં સુધી તમામ પ્રાથમિક શાળાઓના સમયમાં ફેરફાર કરવામાં આવ્યો છે. જે મુજબ બિન પાળી પદ્ધતિ ધરાવતી પ્રાથમિક શાળાઓમાં સમય સોમવારથી શુક્રવાર સુધી 11.00 વાગ્યાથી બપોરના 4.00 વાગ્યા સુધીનો રહેશે. જ્યારે શનિવારે સમય સવારના 09.00 વાગ્યાથી બપોરના 12.30 વાગ્યા સુધીનો રહેશે.
પાળી પદ્ધતિ ધરાવતી શાળાઓમાં આ પ્રમાણે સમય
આ ઉપરાંત પાળી પદ્ધતિ ધરાવતી પ્રાથમિક શાળાઓમાં સવારની પાળી સવારે 9 વાગ્યાથી બપોરના 12.30 વાગ્યા સુધી અને બપોરની પાળી 12.30થી 4.00 વાગ્યા સુધીની રહેશે.
કાતિલ ઠંડીનું જોર સતત પાંચમાં દિવસે યથાવત્
અત્રે ઉલ્લેખનીય છે કે, ઉત્તરીય ઠંડા પવનોને પગલે હાડ ગાળી નાખતી ઠંડી પડતાં લોકોને સીઝનની રેકોર્ડબ્રેક ઠંડીનો અનુભવ થયો છે. ગુજરાતમાં કાતિલ ઠંડીનું જોર સતત પાંચમાં દિવસે યથાવત્ રહ્યું છે અને 9 શહેરમાં લઘુતમ તાપમાનનો પારો 10 ડિગ્રીથી નીચે નોંધાયો છે. 2.4 ડિગ્રી સાથે નલિયામાં સૌથી નીચું તાપમાન નોંધાયું છે. કચ્છમાં હજુ કોલ્ડવેવની આગાહી કરવામાં આવી છે. જેને ધ્યાને લઈને આ ઉપરોક્ત લેવામાં આવ્યો છે.
