માનહાનિ કેસમાં રાહુલ ગાંધીની સજા પર સુપ્રીમ કોર્ટનો સ્ટે
લોકશાહી અને ન્યાયતંત્રમાં માનનારાઓનો વિજયઃ અમિત ચાવડા
શક્તિસિંહ ગોહિલે ટ્વીટ કરીને કહ્યું- ધન્યવાદ સુપ્રીમકોર્ટ
કોંગ્રેસ નેતા રાહુલ ગાંધીને માનહાનિ કેસમાં સુપ્રીમ કોર્ટમાંથી મોટી રાહત મળી છે. સુરતની કોર્ટે ફટકારેલી 2 વર્ષની સજા પર સુપ્રીમ કોર્ટે સ્ટે લગાવી દીધો છે. સુપ્રીમ કોર્ટે કહ્યું, ભાષણ આપતી વખતે સાવધાની રાખવી જોઈએ, આશા છે ભવિષ્યમાં આ બાબતનું ધ્યાન રાખશો. સુપ્રીમ કોર્ટના ચુકાદા બાદ હવે લોકસભાની ચૂંટણી લડવા માટે રાહુલ ગાંધી માટે રસ્તો સાફ થઈ ગયો છે. હવે રાહુલ ગાંધી માત્ર સંસદમાં જ નહીં પરંતુ 2024ની ચૂંટણીમાં ઉમેદવાર તરીકે પણ પાછા જોવા મળશે.
કોંગ્રેસે કહ્યું- આ નફરત સામે મોહબતની જીત છે
સુપ્રીમ કોર્ટમાંથી રાહુલ ગાંધીને રાહત મળ્યા બાદ કોંગ્રેસ નેતાઓની પ્રતિક્રિયા આવી રહી છે. સુપ્રીમ કોર્ટના ચુકાદાને આવકારતા કોંગ્રેસના સત્તાવાર ટ્વિટર એકાઉન્ટ પરથી ટ્વીટ કરવામાં આવ્યું છે. જેમાં લખવામાં આવ્યું છે કે, 'આ નફરત સામે મોહબ્બતની જીત છે, સત્યમેવ જયતે-જય હિન્દ.'
રાહુલજીની સજા સામે મળ્યો છે સ્ટેઃ અમિત ચાવડા
આ અંગે ગુજરાત વિધાનસભામાં વિપક્ષના નેતા અમિત ચાવડાએ કહ્યું કે, મહિલાઓની સુરક્ષા, ખેડૂતો માટેના કાળા કાયદા મુદ્દે રાહુલજીએ વાત કરી છે. ભ્રષ્ટાચારનો વિરોધ કરવામાં રાહુલજી આગળ આવ્યા છે. રાહુલજીની સજા સામે સ્ટે મળ્યો છે. આવનાર દિવસોમાં નવી આઝાદીની લડાઈમાં આખો દેશ જોડાશે.
અમિત ચાવડા (ગુજરાત વિધાનસભાના વિપક્ષના નેતા)
'લોકશાહી અને ન્યાયતંત્રમાં માનનારાઓનો આજે વિજય થયો'
અમિત ચાવડાએ કહ્યું કે, તેમણે કર્ણાટકમાં નિરવ મોદી, લલીત મોદી જેવા લોકો બાબતે નિવેદન આપ્યું હતું. કોઈ કેસ લાગતો નહીં હોવા છતાં સુરતમાં કેસ કરવામાં આવ્યો હતો. રાહુલજીને બોલતા અટકાવવા દેશભરમા ખોટા કેસ થયા હતા. નવા અંગ્રેજો સામે લાંબી લડાઈ ચાલી રહી છે. સુરતનો ચુકાદો અને ત્યારબાદ એક દિવસમાં તેમને સભ્ય પદ દૂર કરાયા હતા. રાહુલ ગાંધીનું સભ્ય પદ ગયા બાદ ઘરમાંથી પણ દૂર કરાયા હતા. પરંતુ આજે લોકશાહી અને ન્યાયતંત્રમાં માનનારાઓનો આજે વિજય થયો છે.
सत्यमेव जयते ।
नफ़रत,डर और अन्याय के खिलाफ मोहब्बत एवं सच्चाई की जीत ।
ન્યાયાલય પરનો અમારો વિશ્વાસ અકબંધ રાખ્યોઃ વકીલ બાબુ માંગુકિયા
સુપ્રીમ કોર્ટના ચુકાદા પર વકીલ બાબુ માંગુકિયાનું પણ નિવેદન સામે આવ્યું છે. તેમણે જણાવ્યું કે, સુપ્રીમ કોર્ટે ન્યાયાલય પરનો અમારો વિશ્વાસ અકબંધ રાખ્યો છે, નીચલી કોર્ટના ચુકાદાની સુપ્રીમ કોર્ટમાં આલોચનાઓ થઈ હતી. હાઈકોર્ટે પણ 66 દિવસ સુધી ચુકાદો રિઝર્વ રાખ્યો છે. નીચલી કોર્ટના ચુકાદા ક્ષતિવાળા હોવાનું સાબિત થયું છે.
શું છે સમગ્ર મામલો?
23 માર્ચે સુરતની CJM કોર્ટે 2019માં મોદી સરનેમ અંગે કરેલી ટિપ્પણીના કેસમાં રાહુલને બે વર્ષની સજા સંભળાવી હતી. 2019ની લોકસભા ચૂંટણી દરમિયાન કર્ણાટકના કોલારમાં એક રેલીમાં રાહુલ ગાંધીએ કહ્યું હતું કે, "બધા ચોરની અટક (સરનેમ) મોદી જ કેમ હોય છે?" જેને લઈને ભાજપના ધારાસભ્ય અને ગુજરાતના પૂર્વ મંત્રી પૂર્ણેશ મોદીએ રાહુલ ગાંધી વિરુદ્ધ માનહાનિનો કેસ દાખલ કર્યો હતો. 23 માર્ચે ચીફ જ્યુડિશિયલ મેજિસ્ટ્રેટ એચ.એચ વર્માની કોર્ટે રાહુલ ગાંધીને દોષિત ઠેરવી બે વર્ષની સજા સંભળાવી હતી. બીજા જ દિવસે રાહુલ ગાંધીએ લોકસભાનું સભ્યપદ ગુમાવ્યું હતું.
Surat court holds Rahul Gandhi 'Guilty' in criminal defamation case over his statement insulting Modi Surname
20 એપ્રિલે સેશન્સ કોર્ટે ફગાવી હતી અરજી
જે બાદ CJM કોર્ટના આ ચુકાદાને તેમણે સેશન્સ કોર્ટમાં પડકાર્યો હતો. રાહુલ ગાંધી, પ્રિયંકા ગાંધી 3 એપ્રિલે સુરત આવ્યા હતા. તેમની સાથે રાજસ્થાનના મુખ્યમંત્રી અશોક ગેહલોત અને છત્તીસગઢના મુખ્યમંત્રી ભૂપેશ બઘેલ ઉપરાંત કાયદાકીય ટીમ પણ સુરત આવી હતી. તેમના દ્વારા નીચલી કોર્ટના ચુકાદા સામે સેશન્સ કોર્ટમાં અરજી દાખલ કરી હતી. જે બાદ 13 એપ્રિલના રોજ કોર્ટમાં બંને પક્ષો વચ્ચે અંદાજે 5 કલાક સુધી દલીલો થઇ હતી. જ્યારે 20 એપ્રિલે સુરતની સેશન્સ કોર્ટે રાહુલ ગાંધીની અરજી ફગાવી દઇ તેમની સજા યથાવત રાખી.
પૂર્ણેશ મોદી અને રાહુલ ગાંધી
ગુજરાત હાઈકોર્ટમાં કરી હતી અરજી
જે બાદ રાહુલ ગાંધીએ સુરત કોર્ટના હુકમને પડકારતા સજા મોકૂફી મામલે ગુજરાત હાઈકોર્ટમાં અરજી કરી હતી. ગુજરાત હાઈકોર્ટમાં જસ્ટિસ હેમંત પ્રચ્છકની કોર્ટમાં આ મામલે સુનાવણી યોજાઈ હતી.ગુજરાત કોર્ટે માનહાનિના કેસમાં સજા પર સ્ટે આપવાનો ઇનકાર કર્યો હતો. આ સાથે જ કોર્ટે રાહુલ ગાંધી દ્વારા સજા પર રોક લગાવવાની માંગ કરતી અરજીને પણ ફગાવી દીધી હતી. જે બાદ રાહુલ ગાંધીએ મોદી સરનેમ માનહાનિ કેસ પર સુપ્રીમ કોર્ટમાં અરજી કરી હતી. જે બાદ હવે રાહુલ ગાંધીની સજા પર સુપ્રીમ કોર્ટે સ્ટે લગાવ્યો છે.
