ખેડા / એક્ટિવા પર આવેલા લૂંટારાએ માથાના ભાગે હથોડી મારી 13 લાખ લૂંટયા, નડિયાદના તમામ માર્ગો પર નાકાબંધીનો આદેશ

• નડિયાદમાં આવેલ આંગડિયા પેઢીનો કર્મચારી લૂંટાયો
• એક્ટિવા પર આવેલા લૂંટારૂઓએ રૂ. 13 લાખની ચલાવી લૂંટ
• નડિયાદ શહેર ફેરવાયું પોલીસ છાવણીમાં

નડિયાદ શહેરનાં ભાવસાર વાડ વિસ્તારમાં સ્વામિનારાયણ મંદિર પાસે આવેલ આંગડીયા પેઢીમાં લૂંટની ઘટના બનતા ચકચાર મચી જવા પામી હતી. ત્યારે શહેરમાં આવેલી વિજયકુમાર વિક્રમભાઈ પેઢીનો કર્મચારી પાસેથી રૂ.13 લાખની લૂંટ ચલાવી લૂંટારૂઓ ફરાર થઈ ગયા હતા.એક્ટિવા પર આવેલા લૂંટારૂઓએ કર્મચારીને માથાનાં ભાગે  હથોડી મારી ઈજાઓ પહોંચાડતા ઘાયલ કર્મચારીને સારવાર અર્થે હોસ્પિટલ લઈ જવામાં આવ્યો હતો.

નડિયાદ શહેર પોલીસ છાવણીમાં ફેરવાયું
આ ઘટનાની જાણ નડિયાદ પોલીસને થતા એલસીબી, એસઓજી સહિતના કાફલો ઘટના સ્થળે પહોંચી ગયો હતો. તેમજ નડિયાદમાં પ્રવેશવાનાં તમામ માર્ગો પર પોલીસ દ્વારા નાકાબંધી કરી તમામ વાહનોનું ચેકીંગ હાથ ધર્યું હતું. ઘાયલ કર્મચારીને સારવાર અર્થે હોસ્પિટલ ખસેડવામાં આવ્યો હતો. જ્યાં પોલીસ દ્વારા તેની પૂછપરછ હાથ ધરવામાં આવી હતી.

લૂંટારૂઓએ આંગડીયા પેઢીનાં કર્મચારી પર હથોડીથી હુમલો કર્યો
આંગડિયા પેઢીમાં લૂંટ કરવા આવેલા શખ્શો પાસે ઘાતક હથિયારો પણ હોવાનું માનવામાં આવી રહ્યું છે. એક્ટિવા પર આવેલા લૂંટારૂઓએ કર્મચારી પાસેથી પૈસા ભરેલ થેલો ઝુંટવવાનો પ્રયાસ કરતા લૂંટારૂઓએ કર્મચારીને માથાનાં ભાગે હથોડી મારી તેને ગંભીર ઈજા પહોંચાડી હતી. પોલીસ દ્વારા એવું પણ માનવામાં આવી રહ્યું છે કે આરોપીઓ પાસે ઘાતક હથિયારો પણ હોઈ શકે છે.