અહેવાલ / આખા દેશમાં સલમાન-શાહરુખ કરતા પણ સૌથી વધુ બ્રાન્ડ વેલ્યુ કોહલીની, કિંમત ચોંકાવનારી

• 1691 કરોડ રૂપિયાની બ્રાન્ડ વેલ્યુ સાથે વિરાટ કોહલી ટોચ પર 
•  શાહરૂખ ખાન અને સલમાન ખાનની બ્રાન્ડ વેલ્યુ અનુક્રમે 471 કરોડ અને 397 કરોડ રૂપિયા
• દીપિકા અને રણવીર સિંહ સંયુક્ત રૂપે ત્રીજા સ્થાને 

ભારતીય ટીમનાં કેપ્ટન વિરાટ કોહલી ક્રિકેટના મેદાન પર જ નહીં પરંતુ બિઝનેસમાં પણ સુપરહિટ છે. બેટિંગમાં વિરાટ કોહલીનો કોઈ જવાબ નથી. તેમણે આજ સુધી ઘણા વિશ્વ રેકોર્ડ્સ પોતાનાં નામે કરેલા છે ત્યાં ભારતીય સેલિબ્રિટી બ્રાન્ડ વેલ્યુમાં પણ કોહલી સમગ્ર ભારતમાં પ્રથમ ક્રમે આવ્યા છે. સતત ત્રીજા વર્ષે વિરાટ કોહલી પ્રથમ નંબર પર છે. 

અમેરિકન ગ્લોબલ એડવાઇઝરી કંપની ડફ એન્ડ ફેલ્પ્સના અહેવાલ અનુસાર વિરાટ કોહલીની બ્રાન્ડ વેલ્યુ લગભગ 1691 કરોડ રૂપિયા છે જે કોઈ પણ ભારતીયની બ્રાન્ડ વેલ્યુથી સૌથી વધારે છે. નોંધનીય છે કે ભારતીય ટીમનાં બીજા દિગ્ગજ ખેલાડી રોહિત શર્મા કરતા 10 ગણી બ્રાન્ડ વેલ્યુ વિરાટ કોહલીની છે. 

બ્રાન્ડ વેલ્યુની વાત કરીએ તો આ યાદીમાં અનેક બોલિવૂડ હસ્તીઓનો સમાવેશ થાય છે. અભિનેતા અક્ષયકુમાર આ યાદીમાં વિરાટ કોહલી બાદ બીજા સ્થાને છે. બોલિવૂડના 'ખિલાડી'ની કુલ બ્રાન્ડ વેલ્યુ 745 કરોડ રૂપિયા છે.

બોલિવૂડની જાણીતી જોડી એટલે કે દીપિકા અને રણવીર પણ આ યાદીમાં સામેલ છે. નોંધનીય છે કે બંને પતિ-પત્ની સંયુક્ત રીતે ત્રીજા ક્રમે છે. દીપિકા અને રણવીરની બ્રાન્ડ 666 કરોડ રુપિયા છે. 

તે બાદ શાહરૂખ ખાન અને સલમાન ખાનની બ્રાન્ડ વેલ્યુ અનુક્રમે 471 કરોડ અને 397 કરોડ રૂપિયા છે. પૂર્વ દિગ્ગજ ક્રિકેટ ખેલાડી એમ એસ ધોની 294 કરોડની બ્રાન્ડ વેલ્યુ સાથે 9માં સ્થાન પર છે.