Result 2026 / TATની પ્રિલિમ પરીક્ષાનું પરિણામ જાહેર, 16 ઓગસ્ટે મુખ્ય પરીક્ષા યોજાઈ શકે

ગુજરાતમાં શિક્ષક તરીકે સરકારી ક્ષેત્રે કારકિર્દી બનાવવા ઈચ્છતા ઉમેદવારો માટે એક મહત્વના સમાચાર સામે આવ્યા છે. રાજ્ય પરીક્ષા બોર્ડ (SEB) દ્વારા ટીચર એપ્ટિટ્યુડ ટેસ્ટ એટલે કે TAT (શિક્ષક અભિરુચિ કસોટી) પ્રાથમિક પરીક્ષાનું પરિણામ સત્તાવાર રીતે જાહેર કરી દેવામાં આવ્યું છે. ઉલ્લેખનીય છે કે, ગત 3 મે, 2026ના રોજ રાજ્યભરમાં 200 ગુણની આ લેખિત પરીક્ષા યોજાઈ હતી, જેમાં હજારો આશાસ્પદ ઉમેદવારોએ ભાગ લીધો હતો.

ગુજરાતી અને અંગ્રેજી માધ્યમનું સ્કોરકાર્ડ

બોર્ડ દ્વારા જાહેર કરવામાં આવેલા આંકડાઓ પર નજર કરીએ તો ઉમેદવારોએ આ પરીક્ષામાં નોંધપાત્ર પ્રદર્શન કર્યું છે:

ગુજરાતી માધ્યમ: આ માધ્યમમાં કુલ 1,81,520 ઉમેદવારોએ પરીક્ષા આપી હતી. જેમાંથી 120 કરતાં વધુ ગુણ મેળવનારા તેજસ્વી ઉમેદવારોની સંખ્યા 3,465 નોંધાઈ છે. જ્યારે 100થી વધુ ગુણ મેળવવામાં 25,594 ઉમેદવારો સફળ રહ્યા છે.

અંગ્રેજી માધ્યમ: અંગ્રેજી માધ્યમમાં કુલ 3,510 ઉમેદવારો પરીક્ષામાં સફળ જાહેર થયા છે. જેમાં 120થી વધુ ગુણ મેળવનારા 163 ઉમેદવારો છે, જ્યારે 100થી વધુ ગુણ લાવવામાં 850 ઉમેદવારો સફળ રહ્યા છે.

રિઝલ્ટ કઈ રીતે ચેક કરશો?

રાજ્ય પરીક્ષા બોર્ડે બંને માધ્યમોનું પરિણામ પોતાની સત્તાવાર વેબસાઇટ પર મૂકી દીધું છે. ઉમેદવારો નીચે મુજબ સરળ સ્ટેપ્સથી પોતાનું સ્કોરકાર્ડ જોઈ શકે છે. સૌ પ્રથમ બોર્ડની સત્તાવાર વેબસાઇટ www.sebexam.org પર જાઓ. ત્યાં પોતાનો બેઠક નંબર (Seat Number) અને જન્મ તારીખ (Date of Birth) દાખલ કરો. આ વિગતો સબમિટ કરતાં જ સ્ક્રીન પર પરિણામ ઓનલાઈન જોઈ શકાશે અને સ્કોરકાર્ડ પણ ડાઉનલોડ કરી શકાશે.

OMR રિચેકિંગ માટે 7 જુલાઈથી પ્રક્રિયા શરૂ

જે ઉમેદવારો પોતાની OMR શીટની પુનઃચકાસણી (રિચેકિંગ) કરાવવા માંગતા હોય, તેઓ માટે રાજ્ય પરીક્ષા બોર્ડ દ્વારા ખાસ વ્યવસ્થા કરવામાં આવી છે.

સમયગાળો: તા. 7 જુલાઈ, 2026થી 15 જુલાઈ, 2026 સુધી (કામકાજના દિવસોમાં).

સમય: સવારે 11:00 વાગ્યાથી સાંજના 5:00 વાગ્યા સુધી.

પ્રક્રિયા: ઉમેદવારે રાજ્ય પરીક્ષા બોર્ડ, સેક્ટર-21, ગાંધીનગર ખાતે રૂબરૂ જવાનું રહેશે. ત્યાં પોતાની હોલ ટિકિટ સાથે એક લેખિત અરજી આપવાની રહેશે અને રૂ. 100/- ફી પેટે જમા કરાવવાના રહેશે. આ ચકાસણી ઉમેદવારની રૂબરૂમાં જ કરી આપવામાં આવશે.

16 ઓગસ્ટે મુખ્ય પરીક્ષાનું સંભવિત આયોજન

પ્રાથમિક પરીક્ષામાં ક્વોલિફાય થયેલા ઉમેદવારો માટે હવે પછીનો પડકાર મુખ્ય (મેઈન્સ) પરીક્ષાનો રહેશે. ગુજરાતી અને અંગ્રેજી બંને માધ્યમની મુખ્ય પરીક્ષાનું સંભવિત આયોજન 16 ઓગસ્ટ, 2026ના રોજ કરવામાં આવ્યું છે.

વધુ વાંચો: પંજાબ કોંગ્રેસમાં મોટી હલચલ, અમિત શાહને મળવા દિલ્હી પહોંચ્યા કોંગ્રેસી સાંસદ સુખજિંદર સિંહ રંધાવા

મહત્વની નોંધ

મુખ્ય પરીક્ષા આપવા પાત્ર ઉમેદવારોએ કોઈ અલગથી આવેદન પત્ર (ફોર્મ) ભરવાનું રહેશે નહીં કે કોઈ વધારાની ફી ચૂકવવાની રહેશે નહીં. મુખ્ય પરીક્ષાની હોલ ટિકિટ અને તેને લગતી અન્ય અપડેટ્સ મેળવવા માટે ઉમેદવારોએ સતત બોર્ડની સત્તાવાર વેબસાઇટ ચેક કરતા રહેવું.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ