ગુજરાત / સુરત મનપામાં પ્રજાના પૈસે ભજીયા પાર્ટી! 200 લોકોના નાસ્તા પાછળ ₹1.20 લાખનો ખર્ચ, ₹750ના કિલો ભજીયા મંગાવ્યા

દિવાળીના તહેવારમાં સામાન્ય માણસ પોતાના પરિવાર માટે મીઠાઈ અને નાસ્તો ખરીદતા પહેલાં દસ વખત વિચાર કરે છે, ત્યારે સુરત મહાનગરપાલિકાની સામાન્ય સભામાં પીરસાયેલા ભજીયાનું બિલ સાંભળીને કોઈને પણ નવાઈ લાગે. જે ભજીયા સામાન્ય બજારમાં ₹350થી ₹500 પ્રતિ કિલોના ભાવે મળી રહે છે, તે જ ભજીયા મનપાની સભા માટે ₹750 પ્રતિ કિલોના ભાવે મંગાવવામાં આવ્યા હોવાની વિગતો સામે આવી છે. એટલું જ નહીં, સભામાં માત્ર ભજીયા પાછળ જ પ્રજાની તિજોરીમાંથી અંદાજે ₹1 લાખ જેટલો ખર્ચ થયો હોવાનું સામે આવતા વિવાદ સર્જાયો છે. એક તરફ સુરતના લોકો રસ્તા, પાણી અને ડ્રેનેજ જેવી સુવિધાઓ માટે મુશ્કેલીનો સામનો કરી રહ્યા છે, ત્યારે બીજી તરફ પ્રજાના પૈસે આટલો મોંઘો નાસ્તો કેમ મંગાવવામાં આવ્યો તેવો સવાલ ઊઠી રહ્યો છે.

200 લોકોના નાસ્તા પાછળ ₹1.20 લાખનો ખર્ચ

દિવાળી પહેલાં મળેલી સુરત મહાનગરપાલિકાની સામાન્ય સભામાં નગરસેવકો, અધિકારીઓ અને કર્મચારીઓ માટે નાસ્તાની વ્યવસ્થા કરવામાં આવી હતી. મળતી માહિતી મુજબ, સભામાં 120 ચૂંટાયેલા પ્રતિનિધિઓ ઉપરાંત અધિકારીઓ, કર્મચારીઓ અને અન્ય અંદાજે 80 લોકોની હાજરી ગણવામાં આવે તો કુલ સંખ્યા 200 જેટલી થાય છે. આ હિસાબ પ્રમાણે નાસ્તા પાછળ કુલ અંદાજે ₹1.20 લાખનો ખર્ચ થયો હોવાનું સામે આવ્યું છે. એટલે કે પ્રતિ વ્યક્તિ દીઠ આશરે ₹600નો નાસ્તો પડ્યો હોવાનો અંદાજ છે. સામાન્ય સભામાં નાસ્તા પાછળ આટલો ખર્ચ કરવામાં આવતા પાલિકાના વહીવટ સામે સવાલો ઊભા થયા છે.

બજારમાં ₹350થી ₹500ના ભજીયા, મનપાએ ₹750ના ભાવે મંગાવ્યા

આ સમગ્ર મામલામાં સૌથી વધુ ચર્ચા ભજીયાની ખરીદીના ભાવને લઈને થઈ રહી છે. સામાન્ય બજારમાં સારી ગુણવત્તાના ભજીયા ₹350થી ₹500 પ્રતિ કિલોના ભાવે મળી રહે છે. પરંતુ સુરત મહાનગરપાલિકા દ્વારા ભજીયા ₹750 પ્રતિ કિલોના ભાવે મંગાવવામાં આવ્યા હોવાની માહિતી સામે આવી છે. જથ્થાબંધ ઓર્ડર હોવા છતાં માત્ર ₹50નું ડિસ્કાઉન્ટ મળ્યું હોવાનું જણાવવામાં આવી રહ્યું છે. આ રીતે 130 કિલોથી વધુ ભજીયાની ખરીદી કરવામાં આવી હતી. આ ખરીદીનું કુલ બિલ આશરે ₹1 લાખની આસપાસ પહોંચ્યું હોવાનું સામે આવ્યું છે. જથ્થાબંધ ખરીદી હોવા છતાં બજારભાવ કરતાં આટલા ઊંચા ભાવે ભજીયા કેમ મંગાવવામાં આવ્યા તે અંગે સવાલો ઊભા થયા છે.

ઘારીનું બિલ ₹20 હજાર, ભજીયાનું બિલ ₹1 લાખ!

સુરતીઓના આગવા તહેવાર ચંદની પડવાના અવસરે સામાન્ય સભામાં અસલ સુરતી ઘારી પણ પીરસવામાં આવી હતી. આ ઘારીનું બિલ અંદાજે ₹20 હજાર જેટલું થયું હોવાનું જણાવવામાં આવ્યું છે. પરંતુ આશ્ચર્યની વાત એ છે કે ઘારીની સરખામણીએ ભજીયાનું બિલ પાંચ ગણું વધુ આવ્યું હતું. એક તરફ ઘારી પાછળ ₹20 હજારનો ખર્ચ થયો, જ્યારે બીજી તરફ ભજીયા પાછળ આશરે ₹1 લાખ ખર્ચાયા હોવાની વિગતો સામે આવી છે. આટલા મોટા તફાવતને કારણે પાલિકાની ખરીદી પ્રક્રિયા અને ખર્ચની યોગ્યતા અંગે અનેક સવાલો ઊભા થયા છે.

પ્રજાના વેરાના પૈસે મોંઘો નાસ્તો, જવાબદાર કોણ?

સુરત મહાનગરપાલિકાની આવકનો એક મહત્વનો હિસ્સો શહેરના નાગરિકો દ્વારા ભરવામાં આવતા વેરામાંથી આવે છે. આવા સમયે સામાન્ય સભામાં નાસ્તા પાછળ થયેલા ખર્ચને લઈને વિવાદ સર્જાયો છે. સામાન્ય જનતા મોંઘવારીનો સામનો કરી રહી છે, ત્યારે પાલિકાના પદાધિકારીઓ અને અધિકારીઓ માટે આટલો મોંઘો નાસ્તો મંગાવવાની જરૂર શું હતી તેવો સવાલ ઉઠાવવામાં આવી રહ્યો છે. ખાસ કરીને બજારભાવ કરતાં વધુ ભાવે ખરીદી કરવામાં આવી હોવાના આક્ષેપને કારણે ખર્ચની પારદર્શિતા સામે પણ સવાલો ઊભા થયા છે.

રસ્તા, પાણી અને ડ્રેનેજ માટે જનતા પરેશાન, અહીં નાસ્તા પાછળ લાખોનો ખર્ચ!

એક તરફ સુરતના અનેક નાગરિકો રસ્તા, પાણી અને ડ્રેનેજ જેવી પ્રાથમિક સુવિધાઓને લઈને મુશ્કેલીઓનો સામનો કરી રહ્યા છે. બીજી તરફ મહાનગરપાલિકાની સામાન્ય સભામાં નાસ્તા પાછળ લાખો રૂપિયાનો ખર્ચ થયો હોવાના આક્ષેપો થઈ રહ્યા છે. પ્રજાના પૈસાનો ઉપયોગ વિકાસનાં કામો અને નાગરિકોને જરૂરી સુવિધાઓ પૂરી પાડવા માટે થવો જોઈએ, ત્યારે નાસ્તા પાછળ થયેલા આ ખર્ચને લઈને લોકોમાં નારાજગી જોવા મળી રહી છે. કરકસરના નિયમોનું પાલન થયું છે કે નહીં અને ખરીદી યોગ્ય ભાવે કરવામાં આવી હતી કે નહીં તેની તપાસ થાય તેવી માંગ ઊઠી શકે છે.

સુરત મહાનગરપાલિકામાં કામગીરી ફરી આવી વિવાદમાં સુરત મહાનગરપાલિકાની કામગીરી ફરી એકવાર વિવાદના ઘેરામાં આવી છે. SMCની સામાન્ય સભા દરમિયાન યોજાયેલી ભજીયા પાર્ટીને લઈને નવો વિવાદ ઊભો થયો છે. ચર્ચા મુજબ, પાલિકા દ્વારા સભા માટે 130 કિલોથી વધુ ભજીયા મંગાવવામાં આવ્યા હતા, જેના માટે પ્રતિ કિલો 750 રૂપિયાના ભાવે ખરીદી કરવામાં આવી હતી. આ રીતે ભજીયા પાછળ અંદાજે એક લાખ રૂપિયાનો ખર્ચ કરવામાં આવ્યો હોવાની ચર્ચાએ અનેક સવાલો ઊભા કર્યા છે. ખાસ વાત એ છે કે બજારમાં આશરે 500 રૂપિયા પ્રતિ કિલોના ભાવે મળતા ભજીયા પાલિકા દ્વારા 750 રૂપિયાના ભાવે ખરીદવામાં આવ્યા હોવાના આક્ષેપો થઈ રહ્યા છે. બીજી તરફ, આ મામલે મેયર માયા મવાણીએ બચાવ કરતા જણાવ્યું હતું કે ચંદી પડવાના તહેવારના દિવસે સામાન્ય સભા હોવાથી નાસ્તાની વ્યવસ્થા કરવામાં આવી હતી. તેમણે વધુમાં કહ્યું કે ભજીયા 800 રૂપિયા પ્રતિ કિલોના ભાવે મળતા હતા, પરંતુ પાલિકાને 750 રૂપિયાના ભાવે મળ્યા હતા. તેમજ સારી ગુણવત્તાવાળા ભજીયા મળી રહે તે માટે સારી જગ્યાએથી ખરીદી કરવામાં આવી હતી. જોકે, પ્રજાના ટેક્સના નાણાંમાંથી કરવામાં આવેલા આ ખર્ચને લઈને હવે પાલિકાની ખર્ચની પ્રાથમિકતા અને ખરીદીની પ્રક્રિયા સામે સવાલો ઊભા થયા છે. #Surat #SMC #BhajiyaParty #MayaMavani #VTVDigital

— VTV Gujarati News and Beyond (@VtvGujarati) October 30, 2026

'કોના બાપની દિવાળી?' મનપાના ખર્ચ સામે સવાલ

દિવાળી પહેલાં જ સુરત મનપાના નાસ્તાનું બિલ ચર્ચાનો વિષય બન્યું છે. સામાન્ય નાસ્તા પાછળ પ્રતિ વ્યક્તિ ₹600 જેટલો ખર્ચ થયો હોવાનો અંદાજ અને માત્ર ભજીયા પાછળ આશરે ₹1 લાખનું બિલ આવતા 'કોના બાપની દિવાળી?' જેવા સવાલો ઊભા થયા છે. નગરસેવકો અને અધિકારીઓ માટે કરવામાં આવેલી નાસ્તાની વ્યવસ્થામાં આટલો ખર્ચ કેમ થયો અને બજારભાવ કરતાં વધુ ભાવે ખરીદી કોણે મંજૂર કરી તે અંગે સ્પષ્ટતા જરૂરી બની છે.

આ પણ વાંચો : દિવાળી પહેલાં ભાવનગરના હીરા ઉદ્યોગમાં મંદી, 700 ઓફિસો બંધ થયાનો દાવો, રત્નકલાકારોની હાલત કફોડી

હવે મ્યુનિસિપલ કમિશનર શું કાર્યવાહી કરશે?

સુરત મહાનગરપાલિકાની સામાન્ય સભામાં નાસ્તા પાછળ થયેલા ખર્ચને લઈને ઊભા થયેલા વિવાદ બાદ હવે ઉચ્ચ અધિકારીઓની ભૂમિકા મહત્વની બની છે. ભજીયાની ખરીદીમાં બજારભાવ કરતાં વધુ રકમ ચૂકવવામાં આવી હતી કે કેમ, જથ્થાબંધ ઓર્ડરમાં પૂરતું ડિસ્કાઉન્ટ કેમ ન મળ્યું અને સમગ્ર ખર્ચની મંજૂરી કયા આધારે આપવામાં આવી તેવા સવાલોના જવાબ મળવા જરૂરી છે. હવે જોવાનું એ રહેશે કે મ્યુનિસિપલ કમિશનર આ મામલે તપાસ કરાવશે કે નહીં અને કોઈ ગેરરીતિ સામે આવે તો જવાબદારો સામે શું પગલાં ભરવામાં આવશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ