કમોસમી વરસાદ / ગીર સોમનાથમાં કમોસમી વરસાદથી પાકને નુકસાન, દ્વારકાના અનેક ગામોમાં ધોધમાર વરસાદથી ખેતરોમાં નદી જેવાં દૃશ્યો!

દેવભૂમિ દ્વારકા/ગીર સોમનાથ: રાજ્યમાં 31 ઓક્ટોબરના રોજ હવામાનમાં અચાનક પલટો આવતાં સૌરાષ્ટ્રના અનેક વિસ્તારોમાં કમોસમી વરસાદ વરસ્યો છે. દેવભૂમિ દ્વારકા જિલ્લાના કલ્યાણપુર તાલુકા અને ગીર સોમનાથ જિલ્લાના તાલાલા પંથકમાં ભારે પવન સાથે પડેલા વરસાદને કારણે ખેડૂતોની મુશ્કેલીઓમાં વધારો થયો છે.

દેવભૂમિ દ્વારકા જિલ્લાના ભાટિયા, કેનેડી અને કલ્યાણપુર સહિતનાં ગ્રામ્ય વિસ્તારોમાં તેજ પવન સાથે માવઠું નોંધાયું હતું. પહેલેથી જ દુષ્કાળની સ્થિતિનો સામનો કરી રહેલા ખેડૂતો માટે આ વરસાદ વધુ મુશ્કેલીરૂપ બન્યો છે. ખેતરોમાં તૈયાર થયેલો મગફળીનો પાક અને ખુલ્લામાં રાખવામાં આવેલો પશુચારો વરસાદમાં પલળી જતાં મોટું નુકસાન થવાની આશંકા સેવાઈ રહી છે.

તાલાલા પંથકમાં અડધા કલાકમાં એક ઈંચ વરસાદ

ગીર સોમનાથ જિલ્લાના તાલાલા પંથકમાં પણ બપોર બાદ વાતાવરણમાં પલટો આવ્યો હતો. માધુપુર, જાંબુર અને જસાધાર સહિતનાં ગામોમાં મિની વાવાઝોડા જેવી સ્થિતિ સર્જાઈ હતી. ભારે પવન સાથે માત્ર અડધા કલાકમાં અંદાજે એક ઈંચ જેટલો વરસાદ ખાબકતાં ગ્રામ્ય વિસ્તારોમાં ચિંતાનો માહોલ જોવા મળ્યો હતો.

મગફળી અને પશુચારાને નુકસાનની ભીતિ

સૌરાષ્ટ્રના ખેડૂતો માટે હાલ મગફળીનો પાક અત્યંત મહત્ત્વનો છે. પાક તૈયાર થઈ ગયો હોય અથવા ખેતરમાં સૂકવવા માટે રાખવામાં આવ્યો હોય ત્યારે પડેલો વરસાદ ગુણવત્તા અને ઉત્પાદન બંનેને અસર કરી શકે છે. બીજી તરફ ખુલ્લામાં રાખેલો પશુચારો પલળી જવાથી પશુપાલકોની મુશ્કેલી પણ વધી શકે છે.

હવામાન વિભાગની આગાહી શું કહે છે?

હવામાન વિભાગના વૈજ્ઞાનિક રામાશ્રય યાદવના જણાવ્યા અનુસાર, વેસ્ટર્ન ડિસ્ટર્બન્સ અને સાયક્લોનિક સર્ક્યુલેશનની અસરને કારણે સૌરાષ્ટ્ર અને દક્ષિણ ગુજરાતના કેટલાક વિસ્તારોમાં હળવાથી મધ્યમ વરસાદની શક્યતા છે.

તેમણે વધુમાં જણાવ્યું હતું કે આગામી સાત દિવસ દરમિયાન રાજ્યમાં મોટાભાગે વાતાવરણ સૂકું રહેવાની સંભાવના છે. હાલમાં મહત્તમ તાપમાનમાં ખાસ ફેરફારની શક્યતા નથી, જોકે ત્યારબાદ તાપમાનમાં 2થી 3 ડિગ્રીનો વધારો થઈ શકે છે. છેલ્લા 24 કલાક દરમિયાન અમદાવાદમાં મહત્તમ તાપમાન 33 ડિગ્રી નોંધાયું હતું, જ્યારે આજે મહત્તમ તાપમાન 34 ડિગ્રી સુધી પહોંચવાનો અંદાજ છે.

આ પણ વાંચોઃ ઓખા નજીક માછીમારી કરતી બોટમાં એન્જિન બ્લાસ્ટ બાદ આગ, બોટ દરિયામાં ગરકાવ, પાંચેય ખલાસીનો બચાવ!

ખેડૂતોને નુકસાનની ચિંતા

એક તરફ દુષ્કાળ અને બીજી તરફ પાક તૈયાર થવાના સમયે પડેલા કમોસમી વરસાદે ખેડૂતોની ચિંતા વધારી છે. હવે ખેડૂતોની નજર વરસાદથી થયેલા નુકસાનના આકલન અને આગામી દિવસોમાં હવામાન કેવું રહેશે તેના પર ટકેલી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ