- નરોડામાં પાન પાર્લર પાસે ચોરીની ઘટના
- એક્ટિવા પાર્ક કરીને ગયો અને થઇ ચોરી
- દાગીના અને રોકડ રૂપિયાની થઇ ચોરી
અમદાવાદમાં ગુનાખોરીનો ગ્રાફ ઘટવાની જગ્યાએ વધી રહ્યો છે. ચોરી, લૂંટ જેવી ઘટનાઓ હવે શહેરમાં સામાન્ય બની છે. પોલીસ ઘરફોડિયા તેમજ લૂંટારુઓને પકડવા માટે એડીચોટીનું જોર લગાવી રહી છે ત્યારે શહેરમાં કાર તેમજ એક્ટિવાની ડેકી તોડી ચોરી કરતી ગેંગ ફરી સક્રિય થઈ છે. એક કર્મચારી ડીલક્ષ પાન પાર્લર પાસે એક્ટિવા પાર્ક કરીને મસાલો લેવા ગયો ને ગઠિયો એક્ટિવાની ડેકીમાંથી 23 લાખના દાગીના સહિત 26 લાખની મતાની ચોરી કરીને ફરાર થઇ ગયા હોવાની ઘટના પ્રકાશમાં આવી છે.
નરોડા વિસ્તારના દિવ્યજીવન રેસિડેન્સીમાં રહેતા રમેશભાઈ પટેલે અજાણ્યા શખ્સ વિરુદ્ધ પોલીસ સ્ટેશનમાં ફરિયાદ કરી છે. રમેશભાઇ પંકજભાઈ શાહ સાથે ભાગીદારીમાં સુવર્ણરાજ નામની સોનાની દુકાન ચલાવે છે. રમેશભાઈના ભાગીદાર પંકજભાઈના પિતરાઈ ભાઈ હિમાંશુભાઈ જે ખોખરામાં રાજ ગોલ્ડ નામની સોનાની દુકાન ચલાવે છે. હિમાંશુભાઈએ રમેશભાઈને ફોન કર્યો હતો અને કહ્યું કે મારે એક ગ્રાહક આવ્યો છે તેમની દીકરીનાં લગ્ન માટે દાગીના લેવાના છે. જેથી હું ભાગ્ય શાહને જડતરના સોનાના દાગીના લેવા માટે મોકલું છું તો તેને દાગીના આપજો. તેમજ બેન્કમાં જમા કરવા માટે ત્રણ લાખ રોકડ રકમ આપજો.
રમેશભાઈએ તેમની દુકાનમાંથી સોનાનાં જડતરના સેટ તથા મંગળસૂત્રનાં પેન્ડલ કાઢીને કુલ 443 ગ્રામનાં સોનાંનાં 22 કેરેટના દાગીના જેની કિંમત 23 લાખ રૂપિયા તેમજ ત્રણ લાખ રોકડ રકમ ભાગ્ય શાહને આપ્યાં હતાં. આ ભાગ્ય શાહ રૂપિયા તેમજ દાગીના લઈને હિમાંશુભાઈની દુકાને જવા નીકળ્યો હતો. થોડી વાર બાદ ભાગ્યે રમેશભાઈની દુકાને આવીને કહ્યું કે હું મહાદેવનગર ટેકરા ઉપર આવેલ ડીલક્ષ પાન પાર્લર પર મસાલો લેવા ગયો છું. આ દરમિયાનમાં હિમાંશુભાઈનો ભાગ્ય પર ફોન આવ્યો હતો કે હવે ગ્રાહક આજે નથી આવવાના જેથી દાગીના પરત આપી, રૂપિયા દુકાને પરત લાવવાનું કહ્યું હતું. જેથી ભાગ્ય મસાલો લઈને પરત દાગીના આપવા જતો હતો ત્યારે તેણે ડેકી ખોલીને જોયું તો તેમાં મૂકેલા 23 લાખના દાગીના અને ત્રણ લાખ રોકડ રકમ ગાયબ હતી. ત્યારબાદ ભાગ્યે આ બાબતની જાણ રમેશભાઈને કર્યા બાદ તે આવ્યા અને તે બંનેએ આસપાસ તપાસ કરી પરંતુ રૂપિયા કે દાગીના મળી આવ્યા ન હતા.
આથી રમેશભાઇએ તરત જ ડીલક્ષ પાન પાર્લર પર જઈને સીસીટીવી કેમેરામાં તપાસ કરી હતી, જેમાં એક ગઠિયો એક્ટિવાની ડેકી ખોલી દાગીના અને રૂપિયા લઈને જતો નજરે પડે છે. રમેશભાઇએ તરત જ આ મામલે પોલીસને જાણ કરી હતી. ત્યારબાદ પોલીસ પણ આ ઘટનાને લઇ સક્રિય થઇ ગઇ હતી. પોલીસે સીસીટીવી ફૂટેજના આધારે ગઠિયાની શોધખોળ શરૂ કરી છે.
ઉલ્લેખનીય છે કે અગાઉ પણ આવા અનેક કિસ્સા સામે આવ્યા છે. જેમાં ખાસ ડેકીમાંથી ડિસમિસ વડે ચોરી કરતી ગેંગ હોવાનું સામે આવતું હતું. ત્યારે હવે આ કેસમાં આ જ ગેંગ સંડોવાયેલી છે કે કેમ તે પોલીસ તપાસમાં અને આરોપીઓ પકડાયા બાદ સામે આવશે.
