નેશનલ / જ્યારે શિક્ષણ પ્રધાન ધર્મેન્દ્ર પ્રધાન સોનમ વાંગચુકને મળ્યા... ત્યારે તેમણે વખાણ કરતાં કહી હતી મોટી વાત

રાજકારણ અને જાહેર જીવનમાં સમીકરણો કેટલી ઝડપથી બદલાય છે, તેનું તાજું અને મોટું ઉદાહરણ કેન્દ્રીય શિક્ષણ મંત્રી ધર્મેન્દ્ર પ્રધાન અને લદ્દાખના પ્રખ્યાત પર્યાવરણવિદ તથા શિક્ષણવિદ સોનમ વાંગચુકના સંબંધોમાં આવેલો જબરદસ્ત વળાંક (યુ-ટર્ન) છે. માર્ચ 2023 માં જ્યાં બંને શિક્ષણ ક્ષેત્રે સુધારા અને રાષ્ટ્રીય શિક્ષણ નીતિ (NEP) ને લઈને એક જ સુરમાં વાત કરતા જોવા મળતા હતા, ત્યાં જ વર્ષ 2026 માં બંને વચ્ચેની આ ખાઈ દેશના શિક્ષણ ક્ષેત્રના સૌથી મોટા વિવાદ અને ટકરાવમાં બદલાઈ ગઈ છે.

વર્ષ 2026 માં યોજાયેલી NEET-UG પરીક્ષાના પેપર લીક વિવાદ બાદ શિક્ષણ મંત્રી ધર્મેન્દ્ર પ્રધાનના રાજીનામાની માંગ પર અડગ સોનમ વાંગચુકના દિલ્હીના જંતર-મંતર પર ચાલી રહેલા આમરણ અનશન બુધવારે 18 માં દિવસમાં પ્રવેશ્યા છે. તેમની તબિયત સતત બગડી રહી છે અને વિવિધ ક્ષેત્રના અગ્રણીઓએ તેમને અનશન સમાપ્ત કરવા અપીલ પણ કરી છે.

જ્યારે બંને વચ્ચે અદભુત કેમિસ્ટ્રી જોવા મળી હતી

ખરેખર તો, માર્ચ 2023 માં ધર્મેન્દ્ર પ્રધાને સોનમ વાંગચુક અને તેમની પત્ની ગીતાંજલિ જે. આંગમો સાથે મુલાકાત કરી હતી. આ બેઠક બાદ પ્રધાને સોશિયલ મીડિયા પર ફોટો શેર કરીને લખ્યું હતું કે શિક્ષણ, ઇનોવેશન અને ટકાઉ વિકાસ પરની ચર્ચા પ્રેરણાદાયી રહી છે. તેમણે વાંગચુકના વિચારો અને શિક્ષણમાં પરિવર્તન પ્રત્યેના તેમના સમર્પણની પ્રશંસા કરી હતી. સામે પક્ષે, સોનમ વાંગચુક પણ તે સમયે ધર્મેન્દ્ર પ્રધાનની પ્રશંસા કરતા થાકતા ન હતા. તેમણે કહ્યું હતું કે શિક્ષણમાં નવા વિચારો પ્રત્યે મંત્રીના સકારાત્મક અભિગમે તેમને મોટો આત્મવિશ્વાસ આપ્યો છે અને તેઓ રાષ્ટ્રીય શિક્ષણ નીતિ (NEP) ને જમીની સ્તરે લાગુ કરવા માટે વધુ પ્રતિબદ્ધ અનુભવી રહ્યા છે.

વર્ષ 2026 માં શું બદલાયું?

જોકે, વર્ષ 2026 માં આયોજિત NEET-UG પરીક્ષા અને સીબીએસઈ (CBSE) ઓનલાઈન મૂલ્યાંકન વિવાદ બાદ આ સુખદ સંબંધો સંપૂર્ણપણે બદલાઈ ગયા. પરીક્ષામાં પેપર લીકના ગંભીર આરોપો બાદ પરીક્ષા રદ કરવી પડી હતી અને ફરીથી પરીક્ષા લેવાની ફરજ પડી હતી. આ સમગ્ર ઘટનાક્રમને કારણે કેન્દ્ર સરકાર અને શિક્ષણ મંત્રાલયની કાર્યશૈલી સામે મોટા સવાલો ઉભા થયા હતા. આ દરમિયાન અન્ય એક વિવાદમાં ભારતના મુખ્ય ન્યાયાધીશ (CJI) સૂર્યકાંતની એક ટિપ્પણી બાદ સોશિયલ મીડિયા પર કટાક્ષરૂપી 'કોકરોચ જનતા પાર્ટી' (CJP) અભિયાન શરૂ થયું હતું. આ અભિયાનના બેનર હેઠળ દિલ્હીના જંતર-મંતર પર વિરોધ પ્રદર્શનો શરૂ થયા હતા અને શિક્ષણ મંત્રી ધર્મેન્દ્ર પ્રધાનના રાજીનામાની માંગ ઉગ્ર બની હતી. સોનમ વાંગચુક પણ આ આંદોલનમાં જોડાયા હતા અને બાદમાં તેમણે અનિશ્ચિત મુદતની ભૂખ હડતાળ શરૂ કરી દીધી, જેનો બુધવારે 18 મો દિવસ છે.

વધુ વાંચો : તિરુપતિ મંદિરમાં VIP આરતી પર વિવાદ, MP-MLA કરશે પહેલી આરતી, CMના નિર્ણયથી નારાજગી

માત્ર એક રાજીનામાથી કંઈ નહીં બદલાય: સોનમ વાંગચુક

સ્વાસ્થ્ય બગડવા છતાં મંગળવારે પ્રદર્શનકારીઓને સંબોધિત કરતા સોનમ વાંગચુકે જણાવ્યું હતું કે તેમનો ઉદ્દેશ્ય માત્ર કોઈ એક મંત્રીનું રાજીનામું મેળવવાનો નથી, પરંતુ દેશની જનતાને જાગૃત કરવાનો છે. તેમણે ઉમેર્યું, બની શકે કે આપણી ભૂખ હડતાળથી તાત્કાલિક રાજીનામું ન મળે, પરંતુ જો આનાથી લોકો જાગૃત થશે તો અમારો હેતુ પૂરો થઈ જશે. તેમણે વધુમાં જણાવ્યું હતું કે માત્ર એક રાજીનામાથી બહુ મોટો તફાવત નહીં આવે, પરંતુ જે દિવસે દેશના લોકો જાગૃત થશે, તે દિવસે સરકારના દરેક વિભાગમાં નવો બદલાવ અને પારદર્શિતા જોવા મળશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ