તમારા કામનું / સોલર પેનલની આ ખામીઓ બની શકે છે જોખમી, સમયસર રિપેરિંગ કરાવવું જરૂરી

સામાન્ય રીતે સોલર પેનલ લાંબા સમય સુધી કોઈ મોટી સમસ્યા વગર ચાલે છે. જોકે કેટલીક પરિસ્થિતિઓમાં તરત જ રિપેરિંગ કરાવવું જરૂરી બની જાય છે. જો સોલર પેનલ, ઇન્વર્ટર અથવા બેટરીમાંથી ધુમાડો નીકળતો હોય અથવા બળવાની ગંધ આવતી હોય તો તેને બિલકુલ અવગણવી જોઈએ નહીં. આવી સ્થિતિ આગનું કારણ બની શકે છે.

જો વાવાઝોડા અથવા ભારે પવનના કારણે સોલર પેનલ અથવા તેની માઉન્ટિંગ સ્ટ્રક્ચરને નુકસાન થયું હોય તો તરત જ તેની તપાસ કરાવવી જોઈએ. નુકસાનગ્રસ્ત પેનલ તૂટી પડી શકે છે અથવા ઇલેક્ટ્રિક જોખમ ઊભું કરી શકે છે.

આગ લાગે તો તરત એક્શન લો

સોલર પેનલની આસપાસ આગ લાગી હોય તો પણ તરત કાર્યવાહી કરવાની જરૂર છે. આગના કારણે સિસ્ટમના મહત્વના ભાગોને નુકસાન પહોંચી શકે છે અને ખર્ચાળ રિપેરિંગની નોબત આવી શકે છે.

સોલર ઇન્વર્ટર બંધ થાય તો..

જો સોલર ઇન્વર્ટર અથવા આખી સિસ્ટમ અચાનક બંધ થઈ જાય અને ફરી શરૂ ન થાય તો પ્રોફેશનલ ટેકનિશિયનનો સંપર્ક કરવો જોઈએ. જાતે રિપેર કરવાનો પ્રયાસ કરવો જોખમી સાબિત થઈ શકે છે.

ઈમરજન્સી રિપેરિંગ માટે ટેકનિશિયન પહોંચે ત્યાં સુધી સોલર સિસ્ટમને બંધ રાખવી જોઈએ. જો ક્યાંયથી ધુમાડો કે આગની જ્વાળા દેખાય તો તેની નજીક જવાનું ટાળવું જોઈએ અને સુરક્ષિત અંતર જાળવવું જોઈએ.

આ પણ વાંચોઃ શું તમારે પણ વારંવાર Google Driveની સ્પેસ ફૂલ થઇ જાય છે? તો અપનાવો આ ટિપ્સ

આ ઉપરાંત કેટલીક સમસ્યાઓ એવી હોય છે જે ઈમરજન્સી નથી પરંતુ તેને લાંબા સમય સુધી અવગણવી પણ યોગ્ય નથી. જો સોલર પેનલનું વીજ ઉત્પાદન સતત ઘટતું હોય તો તેના કારણોની તપાસ કરવી જોઈએ. ક્યારેક હવામાન પણ તેનું કારણ હોઈ શકે છે.

સોલર પેનલ પર ધૂળ અને ગંદકી જમા થવાથી તેની કાર્યક્ષમતા ઘટી શકે છે. તેથી સમયાંતરે પેનલની સફાઈ કરવાથી વધુ વીજ ઉત્પાદન અને સારી કામગીરી મળી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ