અમદાવાદ / દિવાળી પહેલાં ગૃહિણીઓનું બજેટ બગડશે? સિંગતેલના ભાવને લઈને આવ્યા મોટા સંકેત

ઘરમાં દાળ-શાક બનવાનાં હોય કે દિવાળીની ફરસાણની તૈયારી, રસોડામાં સૌથી વધુ વપરાતી વસ્તુઓમાંનું એક સિંગતેલ હવે ગૃહિણીઓના બજેટની ચિંતા વધારી શકે છે. રાજકોટમાં મળેલા મગફળી વેપારીઓના રાષ્ટ્રીય સંમેલનમાં ચાલુ સિઝનમાં સિંગતેલના ભાવમાં ખાસ ઘટાડો થવાની શક્યતા ઓછી હોવાનું સામે આવ્યું છે. તહેવારોની ખરીદી સાથે જ રસોડાના તેલના ખર્ચમાં પણ મોટી રાહત મળવાની આશા હાલ ધૂંધળી બની છે.

હવે દિવાળી સુધી રાહ જોવી પડશે? મગફળીનું ઉત્પાદન ગત વર્ષની સરખામણીએ ઘટીને ૨૮થી ૩૦ લાખ ટન રહેવાનો અંદાજ છે. ગત વર્ષે ઉત્પાદન આશરે ૩૫થી ૪૦ લાખ ટન હતું. અંતિમ તબક્કાના વરસાદથી પાકને થોડો ફાયદો થતાં ઉત્પાદનના અંદાજમાં ત્રણથી ચાર લાખ ટનનો વધારો થયો છે, છતાં કુલ ઉત્પાદન ગત વર્ષ કરતાં ઓછું રહેવાની ધારણા છે.

ગૃહિણીના બજેટમાં તેલનો હિસ્સો મહત્ત્વનો

ઘરમાં રોજિંદા રસોઈ ઉપરાંત તહેવારોમાં ફરસાણ, પૂરી, ભજિયાં અને અન્ય વાનગીઓ બનતી હોવાથી તેલનો વપરાશ સામાન્ય દિવસો કરતાં વધી જાય છે. ખાસ કરીને દિવાળી નજીક એકસાથે મોટી માત્રામાં તેલ ખરીદાતું હોવાથી ભાવમાં થોડો પણ વધારો કે ઘટાડો સીધો ઘરખર્ચમાં દેખાય છે. હવે ભાવ ઘટવાની શક્યતા ઓછી હોવાના સંકેતથી તહેવારી બજેટનું ગણિત ફરી બદલાઈ શકે છે.

દિવાળી પહેલાં માગ વધશે, એટલે ભાવ પર દબાણ

વેપારી સંગઠનના જણાવ્યા મુજબ દિવાળી અને ત્યાર બાદની રજાઓની સિઝનને કારણે નવેમ્બર સુધી મગફળી તથા તેલની માગમાં મંદી આવવાની શક્યતા ઓછી છે. તહેવારોની સિઝનમાં ગૃહિણીઓએ તેલની ખરીદી માટે અલગ બજેટ રાખવું પડે તેવી સ્થિતિ બની શકે છે.

આ પણ વાંચોઃ મારવાડી યુનિવર્સિટીમાં વિદ્યાર્થીના આપઘાત મામલે મોટા સમાચાર, ABVPએ લગાવ્યા ગંભીર આક્ષેપ, યુનિવર્સિટીની બેદરકારીએ જીવ ગયો

વિદેશમાં ભારતીય સિંગદાણાની માગ પણ વધી

આ તરફ ભારતીય સિંગદાણાની નિકાસ વધારવાનો પણ લક્ષ્યાંક રાખવામાં આવ્યો છે. હાલમાં આશરે સાત લાખ ટન મગફળીની નિકાસ થાય છે, જેને વધારીને ૮.૫ લાખ ટન સુધી લઈ જવાનું આયોજન છે. સ્થાનિક બજારની સાથે નિકાસની માગ પણ મગફળીના ભાવનાં ગણિતમાં મહત્ત્વની બની શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ