ઘટસ્ફોટ / પાકિસ્તાને દાઉદને બનાવી લીધો જમાઈ: બીજીવાર કર્યા લગ્ન, ભાણિયા અલીશાહે કર્યા અનેક ખુલાસા

• દાઉદના ભત્રીજા અલી શાહે મોટો ખુલાસો કર્યો
• દાઉદ ઈબ્રાહિમે પાકિસ્તાનમાં બીજા લગ્ન કર્યા
• હાલ કરાચીમાં મોજ-મસ્તીનું જીવન જીવી રહ્યો છે

અંડરવર્લ્ડ ડોન દાઉદ ઈબ્રાહિમની બહેન હસીના પારકરના દીકરા એટલે કે દાઉદના ભત્રીજા અલી શાહે મોટો ખુલાસો કર્યો છે. મળતી જાણકારી અનુસાર ટેરર ફંડિંગ કેસની તપાસ કરી રહેલી NIAને આપેલા નિવેદનમાં દાવો કર્યો છે કે દાઉદ અબ્દુલ્લા ગાઝી બાબા દરગાહ પાસે પાકિસ્તાનના કરાચીના ડિફેન્સ વિસ્તારમાં રહે છે. હસીના પારકરના પુત્ર અલીશાહે એમ પણ ખુલાસો કર્યો હતો કે દાઉદે બીજા લગ્ન કર્યા હતા અને તેની બીજી પત્ની પઠાણ મૂળની છે. જો કે તેને તેની પહેલી પત્ની મહજબીન પાસેથી હજુ પણ છૂટાછેડા લીધા નથી. જણાવી દઈએ કે દાઉદનો ભત્રીજો ગયા વર્ષે જુલાઈમાં દુબઈમાં મહજબીનને મળ્યો હતો. 

અલી શાહે પૂછપરછ દરમિયાન અનેક ખુલાસા કર્યા 
રિપોર્ટ અનુસાર અંડરવર્લ્ડ ડોન દાઉદ ઈબ્રાહિમે પાકિસ્તાનમાં બીજા લગ્ન કર્યા છે અને તે કરાચીમાં મોજ-મસ્તીનું જીવન જીવી રહ્યો છે. આ મામલો સપ્ટેમ્બર 2022નો છે, જ્યારે તપાસ એજન્સી NIAએ દાઉદના આતંકી નેટવર્કના સંબંધમાં અનેક સ્થળોએ દરોડા પાડ્યા હતા અને સેંકડો લોકોની ધરપકડ કરી હતી સપ્ટેમ્બર 2022માં નેશનલ ઈન્વેસ્ટિગેશન એજન્સી (NIA)ની સામે દાઉદ ઈબ્રાહિમની બહેન હસીના પારકરના પુત્ર અલી શાહે પૂછપરછ દરમિયાન અનેક ખુલાસા કર્યા હતા.

જણાવી દઈએ કે એજન્સીએ આ કેસમાં કોર્ટમાં ચાર્જશીટ પણ દાખલ કરી હતી. મીડિયા રિપોર્ટ્સ એમ છે કે અલી શાહે NIAને જણાવ્યું કે દાઉદ ઈબ્રાહિમે હજુ સુધી તેની પહેલી પત્ની મેહજબીન શેખને છૂટાછેડા આપ્યા નથી. જો કે દાઉદના બીજા લગ્ન પણ મેહજબીન પરથી તપાસ એજન્સીઓનું ધ્યાન હટાવવાનો એક પ્રયાસ હોઈ શકે છે.

અલી શાહ દુબઈમાં દાઉદની પહેલી પત્નીને મળ્યો 
અલી શાહે પૂછપરછ દરમિયાન કહ્યું હતું કે તે જુલાઇ 2022માં દાઉદ ઈબ્રાહિમની પહેલી પત્નીને દુબઈમાં મળ્યો હતો જ્યાં તેને દાઉદના અન્ય મહિલા સાથે લગ્ન વિશે જણાવ્યું હતું. સાથે જ તેને એમ પણ દાવો કર્યો છે કે મહેજબીન શેખ ભારતમાં દાઉદના સંબંધીઓ સાથે વોટ્સએપ કોલ દ્વારા સંપર્કમાં રહે છે.હસીના પારકરના પુત્ર અલી શાહે પણ NIAને દાઉદ ઈબ્રાહિમના ઠેકાણા વિશે જણાવ્યું અને દાવો કર્યો કે અંડરવર્લ્ડ ડોન હવે કરાચીમાં રહે છે.