બોલિવૂડ / શું ટાઈગર 3 તોડી નાંખશે બોક્સ ઓફિસના તમામ રેકોર્ડ? રીલીઝ પહેલા જાણી લો સલમાનની જૂની ફિલ્મોની કમાણી

• સલમાન ખાનની ફિલ્મ 'ટાઈગર 3' રિલીઝ માટે તૈયાર
• મૂવી માટે એડવાન્સ બુકિંગ શરૂ થઈ ગઈ છે
• આ ફિલ્મ પહેલા દિવસે 35-40 કરોડની કમાણી કરી શકે છે

સુપરસ્ટાર સલમાન ખાન આ વર્ષે દિવાળી પર પોતાની નવી ફિલ્મ 'ટાઈગર 3' લઈને આવી રહ્યાં છે. આ ફિલ્મમાં તેમની સાથે કેટરીના કેફની જોડી નજરે પડશે. ટાઈગર 3 માટે ટિકિટની એડવાન્સ બુકિંગ શરૂ થઈ ચૂકી છે. ફેન્સ ઉત્સાહિત છે અને મૂવી જોવા માટે ટિકિટ બુક કરી રહ્યાં છે. ટ્રેડ પંડિતોનાં આંકડાઓ અનુસાર ટાઈગર-3 પહેલા જ દિવસે 35થી 40 કરોડ રૂપિયાનો બિઝનેસ કરી શકે છે. 

સલમાન ખાને પહેલાની ફિલ્મોમાં કેટલી કમાણી કરી?
ટાઈગર-3થી પહેલા સલમાન ખાનની આ વર્ષે 'કિસી કા ભાઈ કિસી કી જાન' ફિલ્મ રિલીઝ થઈ હતી જેણે બોક્સ ઓફિસ પર પહેલા જ દિવસે 15.81 કરોડ રૂપિયાનો બિઝનેસ કર્યો હતો. જો કે આ ફિલ્મ કમાણીનાં મામલામાં સારું પર્ફોમ નહોતી કરી શકી. ભારતમાં આ ફિલ્મે કુલ 110 કરોડ રૂપિયાનું કલેક્શન કર્યું હતું અને દુનિયાભરમાં કિસી કા ભાઈ કિસી કી જાનનું ટોટલ બિઝનેસ 182.44 કરોડ રહ્યું.

ભારત અને પ્રેમ રતન ધન પાયોની સૌથી વધુ કમાણી
વર્ષ 2019માં રિલીઝ થયેલી સલમાન ખાનની ફિલ્મ 'ભારત'એ પહેલા દિવસે સૌથી વધુ કલેક્શન કર્યું હતું. આ મૂવીએ ઓપનિંગ ડે પર 42.30 કરોડ રૂપિયાની કમાણી કરી. ભારતે બોક્સ ઓફિસ પર સલમાનને અત્યાર સુધી સૌથી વધારે ઓપનિંગ આપી છે. તો 2016માં પ્રેમ રતન ધન પાયો બીજી સૌથી વધુ ઓપનિંગ કરનારી ફિલ્મ સાબિત થઈ હતી .આ ફિલ્મે પહેલા જ દિવસે 40.35 કરોડ રૂપિયાનું બિઝનેસ કર્યું હતું.