નોકરિયાત આનંદો / લાયક કર્મચારીઓને કાયમી ન કરવા બંધારણનું ઉલ્લંઘન, આપવી પડે કાયમી નોકરી- સુપ્રીમ કોર્ટનો ચુકાદો

• કર્મચારીઓને કાયમી કરવાને લઈને સુપ્રીમનો ચુકાદો
• સુપ્રીમ કોર્ટે લાયક કર્મચારીઓને કાયમી નોકરીએ રાખવાનું કહ્યું
• લાયક કર્મચારીઓને કાયમી થતાં કોઈ રોકી ન શકે 

લાયક કર્મચારીઓને કાયમી ન કરવાના ઈન્કમ ટેક્સ સંબંધિત એક કેસની સુનાવણી કરતાં સુપ્રીમ કોર્ટે મોટી ટીપ્પણી કરી છે. માત્ર થોડા કર્મચારીઓને જ કાયમી નોકરીએ ન રાખી શકાય, જે કર્મચારીઓ લાયક છે અને ક્ષમતા ધરાવે છે તેમને કાયમી નોકરીએ રાખવા પડે છે, તેમની કાયમી નોકરી ન અટકાવી શકાય. 

લાયક કર્મચારીઓને કાયમી ન કરવાનું કૃત્ય બંધારણની કલમ 14નું ઉલ્લંઘન 
સુપ્રીમ કોર્ટે જણાવ્યું હતું કે, અન્ય હકદાર કર્મચારીઓની નહીં પરંતુ માત્ર થોડા કર્મચારીઓની સેવાઓ નિયમિત કરવાનું કૃત્ય ભેદભાવપૂર્ણ અને ભારતના બંધારણની કલમ 14નું ઉલ્લંઘન કરનારું છે. 

શું હતો કેસ 
મુખ્ય આવકવેરા કમિશનરે 65 કર્મચારીઓને નોકરીમાં કાયમ કરવાના હકદાર જણાયા હતા પરંતુ માત્ર 35 જગ્યાઓ ખાલી હોવાથી આટલાને જ કાયમી કરી શકાયા હતા જેને પરિણામે બાકીના જે ખરેખર લાયક હતા તેમને કાયમી નોકરીએ રખાયા નહોતા તેવા કર્મચારીઓ સુપ્રીમમાં ગયા અને હવે સુપ્રીમ કોર્ટે તેમના તરફી ચુકાદો જાહેર કર્યો છે. 

30 કર્મચારીઓને નોકરીમાં કાયમી કરવાનો સુપ્રીમનો આઈટી વિભાગને આદેશ 
જસ્ટિસ બી આર ગવઈ અને જસ્ટિસ જે બી પારડીવાલાની ખંડપીઠે રમણ કુમાર અને અન્ય વિરુદ્ધ યુનિયન ઓફ ઈન્ડિયા અને અન્યના કેસમાં દાખલ કરવામાં આવેલી અપીલનો નિર્ણય લેતા આવકવેરા વિભાગને નિર્દેશ આપ્યો હતો કે, જે તારીખે અન્ય 35 કર્મચારીઓની સેવાઓ નિયમિત કરવામાં આવી હતી તે તારીખથી બાકીના પાત્ર કર્મચારીઓની સેવાઓ નિયમિત કરવામાં આવે અને તેમને છ મહિનાના સમયગાળામાં બાકી પગાર અને અન્ય લાભો આપવામાં આવે. 

લાયક હોવા છતાં કાયમી નોકરી ન મળતાં કર્મચારીઓ ગયા હતા સુપ્રીમમાં 
કર્ણાટકમાં ચીફ ઈન્કમ ટેક્સ કમિશનરે 2013માં 65 કર્મચારીઓને નોકરીમાં કાયમી રાખવા યોગ્ય ગણ્યાં હતા પરંતુ 35 જગ્યાઓ જ ખાલી હતી, તેથી તેટલા કર્મચારીઓને કાયમી કરી દેવાયા જ્યારે બાકીના 30ને પડતા મૂકાયા હતા, જેઓ કાયમી થવાને લાયક પણ હતા તેમ છતાં તેમને તક ન અપાઈ. 30માંથી 16  કર્મચારીઓએ ચીફ ઈન્કમ ટેક્સ કમિશનરના આ આદેશને સુપ્રીમમાં પડકાર્યો હતો. ખંડપીઠે જણાવ્યું હતું કે, ખુદ ચીફ કમિશનર ઓફ ઇન્કમટેક્સને જણાયું હતું કે 65 વ્યક્તિઓ કાયમી થવાને હકદાર છે પરંતુ ખાલી 35ને જ 30 ને નહીં કાયમી કરવાનું કૃત્ય ભારતના બંધારણની કલમ 14નું ઉલ્લંઘન છે.