પોસ્ટ બજેટ સંબોધન / 'ભવિષ્યનો વિચાર કરીને બદલી દેશની એજ્યુકેશન સિસ્ટમ'- PM મોદીએ વેબિનારમાં યુવાનોની કરી પ્રશંસા

• PM મોદીએ  બજેટ પછીના વેબિનારને સંબોધિત કર્યું
• ભવિષ્યની માંગ પ્રમાણે દેશની શિક્ષણ પ્રણાલી જીવંત કરી
• બજેટમાં યુવાઓના ભવિષ્યને વધુ મહત્ત્વ અપાયું

PM મોદીએ  આજે  બજેટ પછીના વેબિનારને સંબોધિત કર્યું હતું. સંબોધનમાં પીએમ મોદીએ કહ્યું કે સરકારે રાષ્ટ્રીય શિક્ષણ નીતિ (એનઇપી)એ ભવિષ્યની માંગ અનુસાર દેશની શિક્ષણ પ્રણાલીને ફરીથી જીવંત કરી છે. રાષ્ટ્રીય શિક્ષણ નીતિથી દેશના શિક્ષણ સેક્ટરમાં ફ્લેક્સીબિલિટી આવી છે. વર્ષોથી આપણું શિક્ષણ ક્ષેત્ર કઠોરતાનો શિકાર રહ્યું છે, અમે તેને બદલવાનો પ્રયાસ કર્યો છે. અમે આગામી સમયની યુવાનોની માંગની યોગ્યતા અનુસાર શિક્ષણ અને કૌશલ્યને નવેસરથી ઓપ આપ્યો છે.

Speaking on how the Amrit Kaal Budget will give boost to education sector and benefit our talented Yuva Shakti. https://t.co/cDlmIyBmbT

— Narendra Modi (@narendramodi) February 25, 2023

અમૃત યાત્રાનું નેતૃત્વ આપણા યુવા જ કરી રહ્યા છે
પીએમ મોદીએ કહ્યું કે વિકસિત ભારતના વિઝન અંગે દેશની અમૃત યાત્રાનું નેતૃત્વ આપણા યુવા જ કરી રહ્યા છે. એટલા માટે અમૃતકાળના આ પ્રથમ બજેટમાં યુવાઓને અને તેમના ભવિષ્યને સૌથી વધુ મહત્ત્વ અપાયું છે.   

જ્ઞાનની પહોંચ સુનિશ્ચિત કરવા પર ધ્યાન 
મોદીએ કહ્યું કે આપણી શિક્ષણ પ્રણાલી વ્યવહારિક અને ઉદ્યોગલક્ષી હોવી જોઈએ. આ બજેટ તેના પાયાને મજબૂત કરે છે. નવી ટેક્નોલોજી નવા પ્રકારના કલાસરુમ નિર્માણમાં પણ મદદ કરી રહી છે. કોરોના દરમિયાન આપણે અનુભવ્યું એટલા માટે આજે સરકાર એવા ટૂલ્સ પર ફોકસ કરી રહી છે જેનાથી ક્યાંય પણ જ્ઞાનની પહોંચ સુનિશ્ચિત થઈ શકે. 

દુનિયા ભારતને મેન્યુફેક્ચરિંગ હબ તરીકે જોઈ રહી છે
મોદીએ કહ્યું કે આજે દુનિયા ભારતને મેન્યુફેક્ચરિંગ હબ તરીકે જુએ છે. એટલા માટે આજે ભારતમાં રોકાણ અંગે દુનિયામાં ભારે ઉત્સાહ જોવા મળી રહ્યો છે. એવામાં સ્કિલ્ડ વર્કફોર્સ ખૂબ જ કામ લાગે છે. સરકાર એવા ઉપકરણો પર ધ્યાન કેન્દ્રીત કરી રહી છે જેનાથી ગમે ત્યાં શિક્ષણ પ્રાપ્ત કરવાનું સુનિશ્ચિત થઈ શકે. આજે આપણા ઈ-લર્નિંગ પ્લેટફોર્મ પર 3 કરોડ સભ્યો છે.