પાલીતાણામાં અસામાજિક તત્વોના ત્રાસ મામલે અનેક જગ્યાએ આવેદનપત્ર આપવામાં આવ્યા છે. ત્યારે પાલીતાણાની ઘટના મુદ્દે આણંદમાં રેલી યોજાઈ હતી. જૈન સમાજે આણંદ વિદ્યાનગર ખાતેથી રેલી યોજીને વિરોધ નોંધાવ્યો હતો. જૈન સમાજે રેલી યોજી કલેક્ટરને આવેદનપત્ર આપ્યું હતું અને આરોપીઓ સામે કડકમાં કડક કાર્યવાહિ કરવાની માંગ કરી હતી.
પાલિતાણાના શેત્રુંજય તીર્થ ખાતે આવેલા ગિરિરાજ પર્વતની તળેટીમાં અસામાજીક તત્વો દ્વારા તોડફોડ અને નુકસાન મામલે સુરેન્દ્રનગરમાં વિશાળ રેલી યોજીને વિરોધ નોંધાવ્યો હતો.. પાલિતાણામાં તોડફોડથી રોષે ભરાયેલા જૈન સમાજે તમામ કામધંધા બંધ રાખી વિશાળ રેલી કાઢીને વિરોધ નોંધાવ્યો. પ્રદેશ ભાજપ ઉપ-પ્રમુખ વર્ષાબેન દોશી સહિતના આગેવાનો દ્વારા વિશાળ રેલી યોજીને ગિરીપર્વત પર દબાણો હટાવી અસામાજિક તત્વો સામે કડક કાર્યવાહીની માંગ સાથે જિલ્લા કલેકટરને રજુઆત પણ કરી હતી.
25 ડિસેમ્બરે અમદાવાદમાં વિશાળ રેલી યોજવામાં આવશે
જૈનોના પવિત્ર તિર્થ શેત્રુંજય પર્વત પરના સુરજકુંડ ખાતે આણંદજી કલ્યાણજી પેઢીએ લગાડેલા બોર્ડ અને CCTV કેમેરાના થાંભલાને તોડફોડ કરાતા જૈન સમાજમાં ભારે રોષ ભભુકી ઉઠ્યો છે. પાલિતાણાના તીર્થ સ્થાનમાં થયેલી તોડફોડને લઈ વિવાદ વકર્યો છે. આજે સમગ્ર દેશના જૈન સમુદાયના આગેવાનો રેલી યોજીને વિરોધ કરશે. સાથે જ મુંબઈ, મદ્રાસ, સુરત, વડોદરા અને અમદાવાદના જૈન આગેવાનો દાદા સાહેબ મંદિર ખાતે પહોંચશે. ભાવનગરનો જૈન સમાજ પણ વાહનો સાથે દાદા સાહેબ ખાતે પહોંચશે. આગામી 25 ડિસેમ્બરે અમદાવાદમાં વિશાળ રેલી યોજવામાં આવશે.
પાલીતાણામાં આવારાતત્વો દ્વારા જૈન મંદિરોમાં અને સાધુ ભગવંતોના મંદિરોમાં તોડફોડ કરી હિંદુ અને જૈન વચ્ચે વૈયમનષ્ય ઊભું થાય તેવુ કૃત્ય કરી રહ્યા છે. તેના વિરોધમાં ગુજરાત ઉપરાંત અન્ય રાજ્યોમાંથી મોટી સંખ્યામાં જૈન સમુદાયના લોકો પાલીતાણા ખાતે ઉમટી પડ્યા હતા અને પ્રાંત અધિકારીને આવેદનપત્ર પાઠવી આવારાતત્વોને કાયદાના પાઠ ભણાવવામાં આવે તેવી માંગ ઉઠાવી હતી.
10,000થી વધુ યુવાઓ રેલીમાં જોડાયા
ભાવનગરના પાલિતાણામાં નિલકંઠ મંદિરનો વિવાદ વધુ એક વખત વકર્યો છે. પૂજારી અને આણંદજી કલ્યાણજી પેઢી વચ્ચે મંદિર મામલે વિવાદ જોવા મળી રહ્યો છે. ત્યારબાદ મંદિર બહાર પેઢીએ મુકેલા સીસીટીવીમાં શિવ મંદિરના પૂજારી અને તેના સાગરીતો દ્વારા તોડફોડ કરાઈ હોવાનું બહાર આવતા જૈન સમાજ રોષે ભરાયો છે. આ મામલે આજે પાલીતાણા તળેટી ખાતે દેશભરના જૈન સમાજના અગ્રણી અને સંસ્થાઓએ વિરોધ અર્થે પાલીતાણા પહોંચ્યા હતા તળેટી ખાતે જૈન સમાજની ભવ્ય ધર્મ સભા પણ યોજાઇ હતી. જેમાં જૈન આચાર્ય દ્વારા ધર્મનો ઉદ્દેશ આપ્યો હતો. ત્યારબાદ નીલકંઠ મંદિરના ચાલતા વિવાદને લઈ ભવ્ય રેલી યોજાઈ હતી જેમાં 10,000થી વધુ યુવાઓ રેલીમાં જોડાયા હતા.
સરકારે બે ધારાસભ્યોને લઈને તપાસ કરવા જણાવ્યુ
શેત્રુંજી મહાતીર્થ રક્ષા સમિતિના પ્રવક્તા અભય ભાઈ શાહના જણાવ્યા અનુસાર પાલીતાણામાં ગીરીરાજ પર્વત ઉપર આમ તો સદીઓથી જૈન દેરાસરો પણ આવેલા છે અને નીલકંઠ મહાદેવનું મંદિર પણ આવેલું છે પરંતુ તાજેતરમાં આણંદથી કલ્યાણજી પેઢી દ્વારા આ મંદિરનો કબજો લઈ પોતાનો પુજારી અને ચોકીદાર નક્કી કરતા હિન્દુ સંગઠનોમાં પણ જૈન સમાજ સામે રોષ જોવા મળ્યો છે. પાલીતાણામાં ઊભા થયેલા આ વિવાદ બાદ સરકારે બે ધારાસભ્યોને લઈને તપાસ કરવા જણાવ્યુ અને આ પ્રશ્નનો ઉકેલ લાવવાની દિશામાં કામગીરી સોંપી છે. બીજી તરફ રાજ્યના ગૃહમંત્રી હર્ષ સંઘવીએ ભાવનગરના આઈ જી અને એસપી સહિતના અધિકારીઓને પણ આ મામલે તપાસ કરવા આદેશ કર્યા છે.
