NRI / છટણી વચ્ચે બરાબરના ફસાયા USમાં રહેતા H1B વર્કર્સ, એક નિયમ અને વધ્યું ટેન્શન!

અમેરિકાની મોટી ટેક કંપનીઓમાં ફરીથી છટણી શરૂ થતાં હજારો કર્મચારીઓ પર સંકટ ઊભું થયું છે. એમેઝોન, મેટા, ઓરેકલ સહિત અનેક મોટી કંપનીઓએ કર્મચારીઓની સંખ્યા ઘટાડવાનું શરૂ કર્યું છે. આ છટણીમાં ભારતીયો સહિત H-1B વિઝા પર કામ કરતા ઘણા કર્મચારીઓ પણ સામેલ છે. ખાસ કરીને અમેરિકામાં અભ્યાસ પૂર્ણ કર્યા બાદ H-1B વિઝા પર નોકરી મેળવેલા ભારતીય યુવાનો માટે આ સ્થિતિ વધુ ચિંતાજનક બની ગઈ છે.

ઇમિગ્રેશન સ્ટેટસ માટે પણ મોટું જોખમે

H-1B વિઝા ધરાવતા કર્મચારીઓ માટે નોકરી ગુમાવવી માત્ર રોજગાર ગુમાવવાનો પ્રશ્ન નથી, પરંતુ તેમના ઇમિગ્રેશન સ્ટેટસ માટે પણ મોટું જોખમ બની જાય છે. અમેરિકાના નિયમો મુજબ H-1B વિઝા પર રહેલા વ્યક્તિને માત્ર ત્યાં સુધી જ અમેરિકામાં રહેવાની મંજૂરી હોય છે જ્યાં સુધી તે નોકરીમાં કાર્યરત હોય. નોકરી જતાં જ તેના પર 60 દિવસનો ગ્રેસ પીરિયડ લાગુ થાય છે. આ સમય દરમિયાન તેને નવી નોકરી શોધવી અથવા પોતાનો ઇમિગ્રેશન સ્ટેટસ બદલવો જરૂરી બને છે.

અસરગ્રસ્ત ભારતીય કર્મચારીઓને સલાહ

ઇમિગ્રેશન નિષ્ણાતો અને વકીલો અસરગ્રસ્ત ભારતીય કર્મચારીઓને સલાહ આપી રહ્યા છે કે તેઓ B-2 વિઝિટર વિઝા જેવા વિકલ્પો પર વિચાર કરે. B-2 વિઝા દ્વારા વ્યક્તિ અસ્થાયી રીતે અમેરિકામાં રહી શકે છે, જોકે આ વિઝા હેઠળ કામ કરવાની મંજૂરી મળતી નથી. તેમ છતાં, ઘણા કામદારો માટે આ એક રાહતરૂપ વિકલ્પ બની રહ્યો છે, કારણ કે તે દરમિયાન તેઓ નવી નોકરી શોધવાનો પ્રયાસ ચાલુ રાખી શકે છે.

60 દિવસની અંદર સ્પોન્સરશિપ ન મળે તો અમેરિકા છોડવું ફરજિયાત

હાલના નિયમો મુજબ જો કોઈ H-1B કર્મચારીને 60 દિવસની અંદર નવી કંપની તરફથી સ્પોન્સરશિપ ન મળે, તો તેને અમેરિકા છોડવું ફરજિયાત બને છે. જો વ્યક્તિ સમયસર દેશ ન છોડે તો તેની સામે ઇમિગ્રેશન કાર્યવાહી પણ થઈ શકે છે. આ જ કારણ છે કે હાલ હજારો ભારતીય કામદારો ભારે તણાવમાં છે. રોજગાર બજારમાં વધતી સ્પર્ધા અને ઓછી કંપનીઓ દ્વારા વિઝા સ્પોન્સરશિપ આપવા તૈયાર હોવાને કારણે નવી નોકરી મેળવવી મુશ્કેલ બની રહી છે.

આ પણ વાંચો : વિઝા વેલિડ, છતાંય કેમ ભારતીયોને ડિપોર્ટ કરી રહ્યો છે આ દેશ? કારણ ચોંકાવનારું

60 દિવસની અંદર નવી નોકરી

નિયમો અનુસાર જો કર્મચારીને 60 દિવસની અંદર નવી નોકરી મળી જાય, તો નવી કંપની તેના માટે ફરી H-1B અરજી ફાઈલ કરે છે. ત્યારબાદ તે વ્યક્તિને અમેરિકામાં કાયદેસર રીતે રહેવાનો અધિકાર મળી રહે છે. પરંતુ હાલની આર્થિક અનિશ્ચિતતા અને ટેક ક્ષેત્રમાં ચાલી રહેલી છટણીઓને કારણે ઘણા કર્મચારીઓ માટે આ સમયગાળો પૂરતો સાબિત થઈ રહ્યો નથી. અમેરિકાના રોજગાર બજારમાં વધતી અનિશ્ચિતતાએ ભારતીય IT પ્રોફેશનલ્સમાં ચિંતા વધારી છે. ઘણા લોકો હવે વૈકલ્પિક વિઝા, નવા દેશોમાં નોકરી અથવા ભારત પરત ફરવાના વિકલ્પો પર વિચાર કરવા મજબૂર બન્યા છે. H-1B વિઝા પર આધારિત હજારો પરિવારો માટે હાલનો સમય પડકારજનક સાબિત થઈ રહ્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ