NRI ન્યૂઝ / આ દેશે ભારતીયોને આપ્યા ખુશખબર, ગોલ્ડન વિઝાના નિયમો કર્યા સરળ, જાણો શું છે ખાસ ?

UAE Golden Visa : અમેરિકા બાદ હવે વધુ એક દેશમાં ગોલ્ડન વિઝાને લઈ મોટી અપડેટ સામે આવી છે. મુસ્લિમ દેશ સંયુક્ત આરબ અમીરાત (UAE) એ તેના વિઝા નિયમોમાં મોટો ફેરફાર કર્યો છે. આનાથી ભારતીયો માટે ત્યાં ગોલ્ડન વિઝા મેળવવાનું સરળ બન્યું છે. સંયુક્ત આરબ અમીરાત (UAE) સરકારે નોમિનેશનના આધારે એક નવા પ્રકારનો ગોલ્ડન વિઝા રજૂ કર્યો છે.

તેમાં કેટલીક શરતો હશે જે દુબઈમાં મિલકત અથવા વ્યવસાયમાં મોટી રકમનું રોકાણ કરવાની વર્તમાન પ્રક્રિયાથી અલગ છે. અત્યાર સુધી ભારતીયો માટે દુબઈનો ગોલ્ડન વિઝા મેળવવાનો એક રસ્તો મિલકતમાં રોકાણ કરવાનો હતો. તેનું મૂલ્ય ઓછામાં ઓછું 4.66 કરોડ રૂપિયા હોવું જોઈએ અથવા દેશમાં વ્યવસાયમાં મોટી રકમનું રોકાણ કરવું જોઈએ.

5000 લોકો નોંધણી કરાવશે

લાભાર્થીઓ અને પ્રક્રિયામાં સામેલ લોકોએ જણાવ્યું હતું કે, નવી નોમિનેશન-આધારિત વિઝા નીતિ હેઠળ ભારતીયો હવે લગભગ 23.30 લાખ રૂપિયાની ફી ચૂકવીને આજીવન UAE ગોલ્ડન વિઝા મેળવી શકશે. તેમણે જણાવ્યું હતું કે, ત્રણ મહિનામાં 5,000થી વધુ ભારતીયો આ નોમિનેશન-આધારિત વિઝા માટે અરજી કરશે.

આ વિઝા પરીક્ષણના પ્રથમ તબક્કા માટે ભારત અને બાંગ્લાદેશની પસંદગી કરવામાં આવી છે. ભારતમાં નોમિનેશન-આધારિત ગોલ્ડન વિઝાના પ્રારંભિક ફોર્મનું પરીક્ષણ કરવા માટે રાયડ ગ્રુપ નામની કન્સલ્ટન્સીની પસંદગી કરવામાં આવી છે.

પૃષ્ઠભૂમિની તપાસ કરવામાં આવશે

રાયદ ગ્રુપના મેનેજિંગ ડિરેક્ટર રાયદ કમાલ અયુબે જણાવ્યું હતું કે, ભારતીયો માટે UAEનો ગોલ્ડન વિઝા મેળવવાની આ એક સુવર્ણ તક છે. રાયદ કમાલે કહ્યું કે, જ્યારે પણ કોઈ અરજદાર આ ગોલ્ડન વિઝા માટે અરજી કરશે ત્યારે અમે પહેલા તેની પૃષ્ઠભૂમિની તપાસ કરીશું. આમાં મની લોન્ડરિંગ વિરોધી અને ગુનાહિત રેકોર્ડની તપાસ તેમજ તેના સોશિયલ મીડિયાનો સમાવેશ થશે.

આ પણ વાંચો : ભારતમાં NRIનું જબરદસ્ત રોકાણ, FCNR(B) ખાતામાં છલકાયો ડોલરનો પ્રવાહ!

પૃષ્ઠભૂમિ તપાસમાં એ પણ જાણવા મળશે કે, અરજદાર સંસ્કૃતિ, નાણાં, વેપાર, વિજ્ઞાન, સ્ટાર્ટ-અપ્સ, વ્યાવસાયિક સેવાઓ વગેરે જેવી અન્ય કોઈપણ રીતે UAE બજાર અને વ્યવસાયિક પ્રવૃત્તિઓને કેવી રીતે લાભ આપી શકે છે. નોમિનેશન શ્રેણી હેઠળ UAE ગોલ્ડન વિઝા મેળવવા માંગતા અરજદારો દુબઈની મુસાફરી કર્યા વિના તેમના વતનમાંથી પ્રી-ક્લિયરન્સ મેળવી શકે છે.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ