સંભાવના / હાલમાં ફક્ત 3 રૂપિયા... હવે પછી પેટ્રોલ-ડીઝલના ભાવમાં આટલો વધારો આવી શકે, નવી ચેતવણી

ભારતમાં પેટ્રોલ અને ડીઝલના ભાવમાં શુક્રવારે પ્રતિ લિટર ₹3નો વધારો કરવામાં આવ્યો હતો, પરંતુ હવે નિષ્ણાતોએ વધુ મોટી ચેતવણી આપી છે. તેઓનું કહેવું છે કે જો વૈશ્વિક બજારમાં ક્રૂડ ઓઇલના ભાવ સતત ઊંચા રહેશે તો આગામી ત્રણથી ચાર મહિના સુધી પેટ્રોલ અને ડીઝલના ભાવમાં વધુ વધારો થઈ શકે છે. આ ચેતવણી એવા સમયે આપવામાં આવી છે જ્યારે પશ્ચિમ એશિયામાં વધતા તણાવ અને વૈશ્વિક તેલ પુરવઠાને લઈને ચિંતાઓ વધી રહી છે.

બ્રેન્ટ ક્રૂડ ઓઇલના ભાવ

તાજેતરમાં બ્રેન્ટ ક્રૂડ ઓઇલના ભાવ $110 પ્રતિ બેરલની નજીક પહોંચી ગયા હતા. નિષ્ણાતો માને છે કે જો ક્રૂડ ઓઇલની કિંમત લાંબા સમય સુધી $90 થી $100 પ્રતિ બેરલથી ઉપર રહેશે, તો ભારતીય બજારમાં ઇંધણના ભાવમાં વધુ વધારો ટાળવો મુશ્કેલ બની શકે છે. ભારત પોતાની કુલ ક્રૂડ ઓઇલ જરૂરિયાતના આશરે 85 ટકા માટે આયાત પર નિર્ભર છે, જેના કારણે વૈશ્વિક બજારમાં થતી દરેક હલચલનો સીધો પ્રભાવ દેશના પેટ્રોલ અને ડીઝલના ભાવ પર પડે છે.

ચાર વર્ષ પછી પેટ્રોલ અને ડીઝલના ભાવમાં વધારો

સરકારે 15 મેના રોજ લગભગ ચાર વર્ષ પછી પેટ્રોલ અને ડીઝલના ભાવ આટલા સુધી પહોચ્યું. આ નિર્ણય પાછળનું મુખ્ય કારણ વધતા ક્રૂડ ઓઇલના ભાવ અને સરકારી તેલ માર્કેટિંગ કંપનીઓ પર વધતું નાણાકીય દબાણ હતું. લાંબા સમયથી તેલ કંપનીઓ વધતા ખર્ચ છતાં ભાવમાં વધારો કર્યા વગર નુકસાન સહન કરી રહી હતી. હવે તાજેતરના વધારાથી કંપનીઓને થોડી રાહત મળી છે, પરંતુ નિષ્ણાતો કહે છે કે હાલની સ્થિતિમાં આ વધારો પૂરતો નથી.

નિષ્ણાતોના મતે

નિષ્ણાતોના જણાવ્યા અનુસાર ઇંધણના ભાવમાં વધારો થવો લગભગ નક્કી જ હતો કારણ કે તેલ કંપનીઓ સતત ઊંચા ઉર્જા ખર્ચનો ભાર સહન કરી રહી હતી. તેમના જણાવ્યા અનુસાર જો ક્રૂડ ઓઇલના ભાવ આગામી કેટલાક મહિનાઓ સુધી ઊંચા રહેશે તો પેટ્રોલ અને ડીઝલના ભાવમાં વધુ વધારો થવાની પૂરી શક્યતા છે.

નિષ્ણાતોની ચેતવણી

નિષ્ણાતો દ્વારા ચેતવણી આપવામાં આવી છે કે હાલનો ₹3 પ્રતિ લિટરનો વધારો ફક્ત આંશિક રાહત છે. તેમના જણાવ્યા મુજબ પેટ્રોલ અને ડીઝલના ભાવમાં પ્રતિ લિટર ₹1 નો વધારો સરકારી તેલ માર્કેટિંગ કંપનીઓના વાર્ષિક EBITDAમાં આશરે ₹15,000 થી ₹16,000 કરોડનો સુધારો કરી શકે છે. આ રીતે તાજેતરના વધારાથી કંપનીઓને ₹45,000 થી ₹48,000 કરોડ સુધીની વધારાની આવક મળી શકે છે. જોકે તેમણે કહ્યું કે જો ક્રૂડ ઓઇલના ભાવમાં વધુ વધારો થશે તો કુલ મળીને પ્રતિ લિટર ₹10 સુધીનો વધારો કરવાની જરૂર પડી શકે છે.

વૈશ્વિક બજારમાં અસ્થિરતા

હાલ પશ્ચિમ એશિયામાં ચાલી રહેલા તણાવ, ખાસ કરીને હોર્મુઝ સ્ટ્રેટને લઈને ઊભી થયેલી ચિંતાઓને કારણે વૈશ્વિક બજારમાં અસ્થિરતા વધી ગઈ છે. હોર્મુઝ સ્ટ્રેટ વિશ્વના સૌથી મહત્વપૂર્ણ તેલ માર્ગોમાંથી એક માનવામાં આવે છે અને ત્યાં કોઈપણ વિક્ષેપ સીધો વૈશ્વિક તેલ પુરવઠાને અસર કરી શકે છે. આ કારણે ક્રૂડ ઓઇલના ભાવમાં સતત તેજી જોવા મળી રહી છે.

આ પણ વાંચો : પેટ્રોલને લઇ સરકારનો વધુ એક મોટો નિર્ણય, હવે લગાવ્યો નવો ટેક્સ

સામાન્ય લોકોના ઘરેલુ બજેટ પર થશે અસર

નિષ્ણાતોના જણાવ્યા અનુસાર આનો સીધો પ્રભાવ સામાન્ય લોકોના ઘરેલુ બજેટ પર પડશે. પરિવહન ખર્ચ વધતા શાકભાજી, ખાદ્યપદાર્થો અને અન્ય જરૂરી વસ્તુઓના ભાવમાં પણ વધારો થઈ શકે છે. લોજિસ્ટિક્સ ખર્ચ વધવાથી મોંઘવારીમાં વધારો થવાની પણ શક્યતા છે. જોકે કેટલાક નિષ્ણાતો માને છે કે સરકાર ભવિષ્યમાં કરમાં રાહત અથવા અન્ય હસ્તક્ષેપ દ્વારા ભાવ વધારાને નિયંત્રિત કરવાનો પ્રયાસ કરી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ