ન્યાય / પૂર્વ જજની પત્ની, 2 પુત્રોને આજીવન કેદની સજા, 18 વર્ષે આવ્યો ચુકાદો નિર્ણય, જાણો મામલો

UP Kanpur News : ઉત્તર પ્રદેશના કાનપુર જિલ્લામાં એક હત્યા કેસમાં કોર્ટે એક સ્વર્ગસ્થ ન્યાયાધીશની પત્ની અને બે પુત્રોને આજીવન કેદની સજા ફટકારી છે. આ સાથે કોર્ટે તેમને દરેક પર 2.5 લાખ રૂપિયાનો દંડ પણ ફટકાર્યો છે. વાસ્તવમાં, બુધવારે કોર્ટે 18 વર્ષ પહેલા થયેલા એક હત્યા કેસની સુનાવણી કરી. દરમિયાન કોર્ટે આ કેસમાં દોષિત ઠરેલા દિવંગત ન્યાયાધીશ શિવબરન સિંહની પત્ની અને બે પુત્રો સામે આ ચુકાદો આપ્યો છે. આવો જાણીએ શું છે સમગ્ર મામલો ?

મિલકતનો હતો સમગ્ર વિવાદ

આ મામલો કાનપુર જિલ્લાના કોતવાલી વિસ્તારના બેહતા બુઝર્ગ ગામનો છે. 29 એપ્રિલ 2007ના રોજ અહીં એક હત્યા થઈ હતી જેમાં રાજ્યના ઘણા જિલ્લાઓના એડીજે રહેલા શિવબરન અને તેમના સમગ્ર પરિવારના નામ સામે આવ્યા હતા. હકીકતમાં નિવૃત્ત એડીજે શિવબરન સિંહનો બેહતા બુજુર્ગ ગામના રહેવાસી વીરેન્દ્ર સિંહ સાથે મિલકતનો વિવાદ ચાલી રહ્યો હતો. કાનપુરના કિદવાઈ નગરના રહેવાસી શિવબરન સિંહ અને વીરેન્દ્ર સિંહ વચ્ચે કાકા-ભત્રીજાના સંબંધો હતા. ગામનું ઘર ખાલી કરવાને લઈને બંને વચ્ચે મિલકતનો વિવાદ શરૂ થયો જે ટૂંક સમયમાં હત્યામાં ફેરવાઈ ગયો.

હવે જાણો કઈ રીતે થઈ હતી વીરેન્દ્રની હત્યા ?

માહિતી અનુસાર 29 એપ્રિલ, 2007ના રોજ શિવબરન સિંહ કાનપુરથી બેહટ ગામ પહોંચ્યા, જ્યાં તેમનો વીરેન્દ્ર સિંહ સાથે વિવાદ થયો. થોડા જ સમયમાં આ વિવાદે લડાઈનું સ્વરૂપ ધારણ કરી લીધું. વીરેન્દ્ર સિંહના પરિવારે પોલીસને તેમની ફરિયાદમાં જણાવ્યું હતું કે, શિવબરન, તેના પુત્રો અને પત્નીએ વીરેન્દ્રને લાકડીઓ અને તીક્ષ્ણ હથિયારોથી નિર્દયતાથી માર માર્યો હતો. આ લડાઈમાં વીરેન્દ્રનું મોત થયું. આ દરમિયાન લડાઈમાં દરમિયાનગીરી કરવાનો પ્રયાસ કરનાર વીરેન્દ્રના પુત્ર નવનીત સિંહને પણ ગંભીર ઈજા થઈ હતી.

સુનાવણી દરમિયાન શિવબરનનું મૃત્યુ થયું

આ ઘટના બાદ વીરેન્દ્રના બીજા પુત્ર વિશાલે ઘાટમપુર પોલીસ સ્ટેશનમાં શિવબરન સિંહ, તેમની પત્ની નીલમ, પુત્રો યશોવર્ધન, જયવર્ધન અને જયવર્ધનની પત્ની શીલુ વિરુદ્ધ હત્યા અને હત્યાના પ્રયાસનો કેસ દાખલ કર્યો. આ કેસની સુનાવણી એડીજે કોર્ટ નંબર-6 માં ચાલી રહી હતી. સુનાવણી દરમિયાન શિવબરનનું મૃત્યુ થયું. આ પછી 9 મેના રોજ થયેલી સુનાવણીમાં કોર્ટે શિવબરનની પત્ની નીલમ અને બંને પુત્રો જયવર્ધન અને યશોવર્ધનને દોષિત ઠેરવ્યા હતા. જ્યારે પુત્રવધૂ શીલુને નિર્દોષ જાહેર કરવામાં આવી હતી.

વધુ વાંચો : રાજ્યપાલના બિલથી લઈને સુપ્રીમ કોર્ટના અધિકાર સુધી, રાષ્ટ્રપતિએ SCને પૂછ્યા આ 14 સવાલ

આજીવન કેદની સજા

આ પછી 14 મેના રોજ ADGC વિવેક ત્રિપાઠીએ દોષિતોને સજા સંભળાવતા કહ્યું કે, કેસમાં ફરિયાદ પક્ષ અને બચાવ પક્ષની દલીલો સાંભળ્યા પછી કોર્ટ દોષિતો નીલમ દેવી, યશોવર્ધન અને જયવર્ધનને આજીવન કેદની સજા ફટકારે છે. આ સાથે ત્રણેય પર 2.5 લાખ રૂપિયાનો દંડ પણ ફટકારવામાં આવ્યો છે.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ