હવામાન / ઠંડા પવનોને કારણે વધશે ઠંડી, દક્ષિણ રાજ્યોમાં વરસાદની સંભાવના, પહાડો પર હિમવર્ષાની આગાહી

Weather News Today: દેશના વિવિધ ભાગોમાં હવામાન ઝડપથી બદલાઈ રહ્યું છે. દિલ્હી-એનસીઆરમાંથી શિયાળો ધીમે ધીમે વિદાય લઈ રહ્યો છે અને ઉનાળાના સંકેતો અનુભવાઈ રહ્યા છે, ત્યારે જમ્મુ-કાશ્મીર, લદ્દાખ અને હિમાચલ પ્રદેશના ઊંચા પર્વતીય વિસ્તારોમાં હળવો વરસાદ અને હિમવર્ષા થવાની શક્યતા છે. ભારતીય હવામાન વિભાગના તાજેતરના અપડેટ મુજબ, 8 ફેબ્રુઆરીની રાતથી એક નવું વેસ્ટર્ન ડિસ્ટર્બન્સ સક્રિય થશે, જેના કારણે પશ્ચિમી હિમાલયના પ્રદેશોમાં હવામાન ફરી બદલાઈ શકે છે.

હવામાન વિભાગે આગાહી કરી છે કે દેશભરમાં આગામી 24 કલાકમાં હવામાનમાં મોટો પલટો થવાની સંભાવના છે. ઉત્તર ભારતના અનેક રાજ્યોમાં વરસાદ, હિમવર્ષા, ધુમ્મસ અને ભારે પવન ફૂંકાય તેવી શક્યતા છે. હવામાન વિભાગના જણાવ્યા પ્રમાણે, દેશમાં હાલમાં બે વેસ્ટર્ન ડિસ્ટર્બન્સ સક્રિય છે. આને કારણે આજે શનિવારે જમ્મુ-કાશ્મીરમાં વરસાદ અને હિમવર્ષા થવાની સંભાવના છે. આગામી બે દિવસ સુધી આ પ્રદેશમાં હવામાન ખરાબ રહેવાની સંભાવના છે.

9 થી 11 ફેબ્રુઆરી દરમિયાન વરસાદ અને હિમવર્ષા થવાની સંભાવના છે. હવામાન વિભાગની આગાહી પ્રમાણે, 9 થી 11 ફેબ્રુઆરી દરમિયાન જમ્મુ-કાશ્મીર, લદ્દાખ, ગિલગિટ-બાલ્ટિસ્તાન, મુઝફ્ફરાબાદ, હિમાચલ પ્રદેશ અને ઉત્તરાખંડમાં હવામાનમાં પલટો આવશે. આ દરમિયાન ઘણા વિસ્તારોમાં હળવો વરસાદ અને હિમવર્ષા થવાની સંભાવના છે.

10 ફેબ્રુઆરીએ જમ્મુ-કાશ્મીર અને લદ્દાખના ઘણા વિસ્તારોમાં વરસાદ અને હિમવર્ષાની આગાહી છે, જેની અસર કેટલાક વિસ્તારોમાં વધુ જોવા મળશે. આ દરમિયાન 30-40 કિમી પ્રતિ કલાકની ઝડપે પવન ફૂંકાશે તેવી શક્યતા છે. આના કારણે ઘણા વિસ્તારોમાં ઠંડી વધવાની ધારણા છે. પહાડી રાજ્યોમાં તાપમાન શૂન્યથી નીચે નોંધાઈ રહ્યું છે. હવામાન વિભાગે જણાવ્યું કે આજે અરુણાચલ પ્રદેશ અને આંદામાન અને નિકોબાર ટાપુઓમાં ભારે વરસાદ પડી શકે છે.

આગામી 24 કલાક માટે ઉત્તરાખંડ અને હિમાચલ પ્રદેશ માટે ઠંડા દિવસની ચેતવણી જારી કરવામાં આવી છે. દિલ્હી, હરિયાણા, પંજાબ, ઉત્તર પ્રદેશ, બિહાર અને દેશના અન્ય ભાગોમાં સવાર દરમિયાન હળવુંથી મધ્યમ ધુમ્મસ જોવા મળી શકે છે. દિવસ દરમિયાન સ્વચ્છ હવામાનની અપેક્ષા છે.

આ પણ વાંચો: મથુરા: ટૉઇલેટ કરવા ઉતરેલા 7 લોકોને કન્ટેનરે કચડી નાખ્યા, છ લોકોના ઘટનાસ્થળે મોત

કેટલાક ભાગોમાં થઈ શકે છે વરસાદ

તમિલનાડુના કેટલાક ભાગોમાં હળવાથી મધ્યમ વરસાદની આગાહી છે. મન્નારના અખાત અને કોમોરિન ક્ષેત્રમાં પવનની ગતિ 45 થી 55 કિલોમીટર પ્રતિ કલાકથી વધીને 65 કિલોમીટર પ્રતિ કલાક થઈ શકે છે. હવામાન વિભાગે માછીમારોને દરિયામાં જતી વખતે ખૂબ કાળજી રાખવાની સલાહ આપી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ