રેસિપી / નાસ્તા માટે બનાવી લો બોમ્બે સ્ટાઈલ વેજિટેબલ ગ્રિલ સેન્ડવિચ, વેરાયટી સાથે સંતોષાશે ભૂખ

સામગ્રી

4 બાફેલા બટાકા
2 ઝીણી સમારેલી ડુંગળી
2 ઝીણું સમારેલું ટામેટુ
4 લીલા મરચા
2 ચમચી જીરું
2 ચમચી રાઈ
2 ચમચી કોથમીર
ચપટી હળદર
ચપટી હીંગ
2 ચમચી લાલ મરચું પાવડર
16 સ્લાઈસ બ્રાઉન કે વ્હાઈટ બ્રેડ
દરેકના 2 નંગ સમારેલ ડુંગળી, ટામેટુ અને કેપ્સિકમ
4 ચમચી માખણ
2 ચમચી ચાટ મસાલો

બનાવવાની રીત

એક કઢાઈમાં એક ચમચો તેલ નાખી ગરમ કરી તેમાં રાઈ, જીરું અને બાદમાં ડુંગળી નાખી વઘાર કરી લો. ત્યારબાદ સમારેલા ટામેટા નાંખી ચઢવા દો. ટામેટા ચઢી જાય બાદમાં તેમાં ગ્રીન ચિલી સોસ ઉમેરી લો. ત્યારબાદ બધા મસાલા નાખો અને સારી રીતે મિક્સ કરો. તેમાં બાફેલા બટાકાનો માવો પણ નાખવો. મીઠું નાંખીને સ્ટફિંગને 5 મિનિટ સુધી ધીમા તાપે ચઢવા દો. મિશ્રણ ઠંડું થઈ જાય પછી સેન્ડવિચનું સ્ટફિંગ કરો. ફિલિંગ કરતા પહેલા બ્રેડની કિનારી અચૂક કાપો. હવે બટર લગાવવું. પછી ગ્રીન ચિલી સોસ અને ટોમેટો સોસ બ્રેડ પર ફેલાવો. બટાકાનું મિશ્રણ લઈને બ્રેડ પર લગાવવું. તેના ઉપર સમારેલા ટામેટા, ડુંગળી અને કેપ્સિકમ રાખવા. તેના પર થોડો ચાટ મસાલો છાંટવો અને ત્યારબાદ બીજી બ્રેડ લઈ કવર કરી લો. હવે સારી રીતે ગ્રીલ કરી લો. ગ્રીલ થયા બાદ સેન્ડવિચ પર બટર લગાવીને સારી રીતે ફ્રાઈ કરો. તો તૈયાર છે બોમ્બે સેન્ડવિચ. જેને તમે તમારી મનપસંદ ચટણી સાથે ખાઈ શકો છો.