અમદાવાદ / એએમએ દ્રારા “ફૉલ, ફાઇટ, રાઇઝ” વિષય પર વિશેષ વ્યાખ્યાનનું આયોજન

આ વિશેષ કાર્યક્રમમાં ભારતીય સેનાના નિવૃત્ત જાંબાઝ અધિકારી મેજર જનરલ ઇયાન કાર્ડોઝો સંબોધન કરશે. તેઓ મુશ્કેલ પરિસ્થિતિઓનો સામનો કરવા, નિષ્ફળતાઓમાંથી બહાર આવવા, નેતૃત્વ ક્ષમતા વિકસાવવા અને પ્રતિકૂળ સંજોગો પર વિજય મેળવવા અંગે પોતાના જીવનના અનુભવો અને પ્રેરણાદાયી પ્રસંગો રજૂ કરશે.

1971ના યુદ્ધના બહાદુર યોદ્ધા

મેજર જનરલ ઇયાન કાર્ડોઝો 5મી ગોરખા રાઇફલ્સના પૂર્વ અધિકારી અને અત્યંત સન્માનિત યુદ્ધવીર છે. 1971ના ભારત-પાકિસ્તાન યુદ્ધ દરમિયાન તેમણે અસાધારણ બહાદુરીનું પ્રદર્શન કર્યું હતું. તેમની શૌર્યગાથા આજે પણ ભારતીય સેનાના ઇતિહાસમાં પ્રેરણારૂપ માનવામાં આવે છે.

તેમના જીવનનું સૌથી પ્રેરણાદાયી પાસું એ છે કે પડકારજનક પરિસ્થિતિઓ છતાં તેમણે હિંમત અને નેતૃત્વનો માર્ગ છોડ્યો નહોતો. તેઓ ભારતીય સેનામાં બટાલિયન અને બ્રિગેડનું નેતૃત્વ કરનારા પ્રથમ દિવ્યાંગ અધિકારી બન્યા હતા.

યુવાનોને મળશે સંઘર્ષમાંથી સફળતા સુધીની શીખ

“ફૉલ, ફાઇટ, રાઇઝ”નો સંદેશ માત્ર સૈન્ય જીવન પૂરતો મર્યાદિત નથી. જીવનમાં આવતા પડકારો, નિષ્ફળતા અને મુશ્કેલીઓ સામે કેવી રીતે લડવું અને ફરી ઊભા થઈને સફળતા તરફ આગળ વધવું, તે અંગે મેજર જનરલ કાર્ડોઝો પોતાના અનુભવોના માધ્યમથી માર્ગદર્શન આપશે.

તેમનું જીવન અટલ હિંમત, નેતૃત્વ, સંઘર્ષ સામે લડવાની ભાવના અને દેશભક્તિનું જીવંત ઉદાહરણ છે. ખાસ કરીને યુવાનો અને ભાવિ નેતાઓ માટે તેમનું સંબોધન પ્રેરણાદાયી બની રહેશે.

કાર્યક્રમમાં પ્રવેશ સૌ માટે ખુલ્લો

AMA દ્વારા આયોજિત આ કાર્યક્રમમાં પ્રવેશ ઓપન એટલે કે સૌ માટે ખુલ્લો રાખવામાં આવ્યો છે. કાર્યક્રમ 8 ઓક્ટોબર, ગુરુવારે સાંજે 6:30થી 7:45 વાગ્યા સુધી અમદાવાદ મેનેજમેન્ટ એસોસિએશન ખાતે યોજાશે.

વધુ માહિતી માટે AMAના 079-26308601 નંબર પર સંપર્ક કરી શકાય છે અથવા AMAની વેબસાઇટ www.amaindia.orgની મુલાકાત લઈ શકાય છે.