મહારાષ્ટ્ર / ઉદ્ધવ ઠાકરે ગયા કામથી ! CM શિંદે ચૂંટાયા શિવસેનાના સેનાપતિ, પહેલી કારોબારીમાં લેવાયા મોટા નિર્ણય

• મહારાષ્ટ્રના સીએમ એકનાથ શિંદે અસલી શિવસેનાના અધ્યક્ષ
• શિવસેનાની રાષ્ટ્રીય કાર્યકારિણીની બેઠકમાં લેવાયો નિર્ણય
• શિંદ જૂથને અસલી શિવસેના તરીકેની માન્યતા મળી 

મહારાષ્ટ્રના મુખ્યમંત્રી એકનાથ શિંદેએ મંગળવારે શિવસેનાની રાષ્ટ્રીય કાર્યકારિણીની બેઠક યોજી હતી. આ બેઠકમાં એકનાથ શિંદેને પાર્ટીના અધ્યક્ષ બનાવવામાં આવ્યા છે. તમને ખાસ વાત જણાવી દઈએ કે, તાજેતરમાં જ ચૂંટણી પંચે તેમના જૂથને અસલી શિવસેના તરીકેની માન્યતા આપી છે અને તેમને 'ધનુષ અને તીર'નું ચૂંટણી ચિન્હ પણ આપ્યું છે. આ બેઠકમાં શિવસેનાના ધારાસભ્યો, સાંસદો અને અન્ય નેતાઓએ પણ હાજર રહ્યાં હતો.

ઉદય સામંતે શું કહ્યું
મહારાષ્ટ્રના ઉદ્યોગ મંત્રી ઉદય સામંતે આ બેઠક પૂર્ણ થયા બાદ જણાવ્યું કે, આજે અમે મુખ્યમંત્રી એકનાથ શિંદેના અધ્યક્ષતામાં બેઠક યોજી હતી. જેમાં એકનાથ શિંદેને અમારી શિવસેના પાર્ટીના અધ્યક્ષ બનાવવામાં આવ્યા છે. તેમજ અમે સૌ તેમને શિવસેનાના નેતા તરીકે સ્વીકારીએ છીએ. આ બેઠકમાં સરકાર દ્વારા છેલ્લા છ મહિનામાં કરવામાં આવેલી કામગીરીની સમીક્ષા કરવામાં આવી હતી. ઉદય સામંતે સ્પષ્ટતા કરતા કહ્યું કે, જે ચર્ચાઓ ચાલી રહી છે કે, હવે ઠાકરે જૂથની સંપત્તિ અને ભંડોળનો દાવો કરવામાં આવશે અને તેમની ઓફિસો પર કબજો કરવામાં આવશે આવું કંઈ થવાનું નથી. તેમણે કહ્યું કે,બેઠકમાં શિંદેએ કહ્યું છે કે, બાળાસાહેબ ઠાકરેના વિચારો જ અમારી સંપત્તિ છે. 
રાષ્ટ્રીય કાર્યકારિણીની બેઠકમાં નક્કી થયું કે શિવસેના વીર સાવરકરને ભારત રત્ન આપવાની માંગ કરશે. આ સાથે નોકરીમાં 80 ટકા જગ્યાઓની પસંદગી માટે રાજ્યના મુળ નિવાસીઓને પ્રાથમિકતા આપવામાં આવશે. 

ઠાકરે જૂથ સુપ્રીમ કોર્ટ પહોચ્યું
એક તરફ ચૂંટણી પંચ શિંદે જૂથને સાચી શિવસેના માની છે તો બીજી તરફ પૂર્વ મુખ્યમંત્રી ઉદ્ધવ ઠાકરેએ સુપ્રીમ કોર્ટને ચૂંટણી પંચના આદેશને રદ્દ કરવા વિનંતી કરી છે. જે મામલે કોર્ટ બુધવારે બપોરે 3.30 વાગ્યે સુનાવણી હાથ ધરશે. શિંદેએ ઠાકરે સામે બળવો કર્યો ત્યારથી શિવસેનાના બંને જૂથો એક એકનાથ શિંદે અને બીજો ઉદ્ધવ ઠાકરે પક્ષ પર પોતાનો દાવો રજૂ કરી રહ્યા છે. 

શિંદે જૂથમાં ધારાસભ્યોને મળ્યા હતા વધુ મત
 ચૂંટણી પંચના શિંદે જૂથને અસલી શિવસેના તરીકે ગણવાના નિર્ણય બાદ ફરી નવો વળાંક સામે આવ્યો છે. ચૂંટણી પંચે જણાવ્યું હતું કે, શિંદે જૂથમાં જે ધારાસભ્યો છે તેમને 2019ની  વિધાનસભા ચૂંટણીમાં શિવસેનાના 55 વિજેતા ઉમેદવારોને લગભગ 76 ટકા મત મળ્યા હતા જ્યારે ઉદ્ધવ ઠાકરે જૂથના ધારાસભ્યોને 23.5 ટકા મત મળ્યા છે. 

ઉદ્ધવ ઠાકરે નારાજગી વ્યક્ત કરી
ઉદ્ધવ ઠાકરેએ નારાજગી વ્યક્ત કરી હતી અને આક્ષેપ લગાવ્યો હતો કે તેમની પાસેથી બધું જ ચોરી લીધું છે. તેમણે કહ્યું કે ચૂંટણી પંચને ભંગ કરી દેવું જોઈએ અને ચૂંટણી કમિશનરો લોકો દ્વારા ચૂંટવવા જોઈએ. તેમણે કહ્યું ચૂંટણી પંચને પાર્ટી ફંડ પર ટિપ્પણી કરવાનો કોઈ અધિકાર નથી.