કાર્યવાહી ક્યારે / ગાંધીજીના જન્મસ્થળ કીર્તિ મંદિરમાં દારૂની મહેફિલ, સફાઈ કર્મચારીનો વીડિયો વાયરલ

પોરબંદરના કીર્તિ મંદિર સંકુલમાં દારૂની મહેફિલ માણવાનો એક વીડિયો સોશિયલ મીડિયામાં વાયરલ થતાં ભારે ચર્ચા જાગી છે. વીડિયોમાં કીર્તિ મંદિરના પાર્કિંગ વિસ્તારમાં કેટલાક સફાઈ કર્મચારીઓ દારૂની મોજમસ્તી કરતા હોવાનું જોવા મળતું હોવાનો દાવો કરવામાં આવી રહ્યો છે.

વ્યવસ્થાને લઈને પણ ગંભીર પ્રશ્નો ઊભા કર્યા

આ ઘટનાએ માત્ર કીર્તિ મંદિરની પવિત્રતા અંગે જ નહીં, પરંતુ સુરક્ષા અને દેખરેખ વ્યવસ્થાને લઈને પણ ગંભીર પ્રશ્નો ઊભા કર્યા છે. ખાસ કરીને કીર્તિ મંદિર સંકુલની નજીક પોલીસ સ્ટેશન આવેલું હોવા છતાં સંકળાયેલા વ્યક્તિઓને કાયદાનો કોઈ ભય કેમ ન રહ્યો તે મુદ્દે લોકોમાં ચર્ચા ચાલી રહી છે.

સ્થાનિકોમાં એવો પણ સવાલ ઉઠી

સ્થાનિકોમાં એવો પણ સવાલ ઉઠી રહ્યો છે કે કીર્તિ મંદિર જેવા સંવેદનશીલ અને ઐતિહાસિક સ્થળે CCTV કેમેરા લાગેલા હોવા છતાં આ પ્રકારની પ્રવૃત્તિઓ સમયસર તંત્રના ધ્યાનમાં કેમ આવી નહીં. જો વીડિયો સાચો હોય તો જવાબદાર કર્મચારીઓ સામે અત્યાર સુધી શું કાર્યવાહી કરવામાં આવી છે તે અંગે પણ સ્પષ્ટતા માંગવામાં આવી રહી છે.

ઘટનાનો વીડિયો વાયરલ

ઘટનાનો વીડિયો વાયરલ થયા બાદ વહીવટીતંત્ર અને સંબંધિત વિભાગો પર તપાસનો દબાણ વધ્યો છે. સ્થાનિક નાગરિકો અને ગાંધીવાદી સંગઠનો દ્વારા સમગ્ર મામલે નિષ્પક્ષ તપાસ કરીને જવાબદારો સામે કડક પગલાં ભરવાની માંગ કરવામાં આવી રહી છે.

આ પણ વાંચોઃ ગાંધીનગરમાં CM નિવાસ સ્થાન ખાતે મળી બેઠક, પૂરી થયા બાદ તરત કમલમમાં થયું આ કામ

હાલ સત્તાવાર રીતે ઘટનાની પુષ્ટિ અથવા કાર્યવાહી અંગે કોઈ વિગતવાર નિવેદન જાહેર થયું નથી. જોકે, વીડિયો વાયરલ થતાં કીર્તિ મંદિરની સુરક્ષા વ્યવસ્થા અને સંચાલન અંગે અનેક સવાલો ઊભા થયા છે, જેના જવાબની લોકો રાહ જોઈ રહ્યા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ