World Cup 2023 / વર્લ્ડકપની વચ્ચે ટીમ ઈન્ડિયામાં મોટા ફેરફાર: હાર્દિક પંડ્યા બહાર થયો તો આ સ્ટાર પ્લેયરને અપાઈ મોટી જવાબદારી

• હાર્દિક પંડ્યા પગની ઈજાના કારણે વર્લ્ડ કપમાંથી બહાર
• કેએલ રાહુલને ટીમ ઈન્ડિયાનો વાઇસ કેપ્ટન બનાવવામાં આવ્યો 
• ભારતીય ટીમ રવિવારે દક્ષિણ આફ્રિકા સામે ટકરાશે

ભારતીય ક્રિકેટ કંટ્રોલ બોર્ડ (BCCI) એ KL રાહુલને વર્લ્ડ કપ 2023 ની મધ્યમાં ટીમ ઈન્ડિયાના ઉપ-કપ્તાન તરીકે નિયુક્ત કર્યા છે. હાર્દિક પંડ્યા ઈજાના કારણે વર્લ્ડ કપની બાકીની મેચોમાંથી બહાર છે. આવી સ્થિતિમાં ભારતીય બોર્ડે પંડ્યાની જગ્યાએ કેએલ રાહુલને આ જવાબદારી સોંપી છે. ઇન્ટરનેશનલ ક્રિકેટ કાઉન્સિલે શનિવારે સવારે હાર્દિક પંડ્યાને વર્લ્ડ કપમાંથી બાકાત રાખવાની પુષ્ટિ કરી હતી. વર્લ્ડ કપ પહેલા હાર્દિક પંડ્યાને BCCI દ્વારા વાઇસ કેપ્ટન બનાવવામાં આવ્યો હતો. ઈજાના કારણે પંડ્યા વર્લ્ડ કપમાં ઘણી મેચ રમી શક્યો ન હતો. બાંગ્લાદેશ સામેની મેચમાં તેને પગની ઘૂંટીમાં ઈજા થઈ હતી. હવે તે આખી ટૂર્નામેન્ટમાંથી બહાર થઈ ગયો છે. એક અહેવાલ અનુસાર, BCCIની વરિષ્ઠ પસંદગી સમિતિએ રોહિત શર્માના ડેપ્યુટી તરીકે કેએલ રાહુલના નામને મંજૂરી આપી દીધી છે.

વર્લ્ડ કપ 2023માં ટીમ ઈન્ડિયા અજેય

ભારતીય ટીમ વર્લ્ડ કપમાં શાનદાર પ્રદર્શન કરી રહી છે. ટીમ ઈન્ડિયાએ સતત 7 મેચ જીતીને સેમીફાઈનલની ટિકિટ મેળવી લીધી છે. ભારતીય ટીમ રવિવારે આઠમી મેચમાં દક્ષિણ આફ્રિકા સામે ટકરાવાની છે. કોલકાતાના ઐતિહાસિક ઈડન ગાર્ડન્સ સ્ટેડિયમમાં ભારત અને દક્ષિણ આફ્રિકા વચ્ચેની મેચ રમાશે. ભારતીય ટીમ 7 મેચમાં 14 પોઈન્ટ સાથે પોઈન્ટ ટેબલમાં ટોપ પર છે. ટીમ ઈન્ડિયા સાઉથ આફ્રિકા સામે પોતાની જીતનો સિલસિલો જાળવી રાખવા પર રહેશે. ભારતીય ટીમ વિરાટ કોહલીને તેના 35માં જન્મદિવસ પર જીતની ભેટ આપવા કોલકાતામાં હશે.