- કર્ણાટકના મુખ્યમંત્રી બનશે સિદ્ધારમૈયા!
- ડીકે શિવકુમારને પણ અપાઈ શકે છે ખાસ મંત્રાલયો!
- રાહુલ ગાંધી થોડીવારમાં કરશે સત્તાવાર જાહેરાત
કર્ણાટકના નવા મુખ્યમંત્રીને લઈને મોટા સમાચાર સામે આવી રહ્યા છે. સૂત્રોના જણાવ્યા અનુસાર, સિદ્ધારમૈયાને મુખ્યમંત્રીની ખુરશી પર બેસાડવામાં આવશે. સાથે જ ડીકે શિવકુમારને નાયબ મુખ્યમંત્રીના પદની સાથે બે મહત્વના મંત્રાલયો સોંપવામાં આવશે. આ અંગે રાહુલ ગાંધી બપોરે 1 વાગ્યે સત્તાવાર જાહેરાત કરી શકે છે.
ડીકે શિવકુમારને ડેપ્યુટી સીએમ પદની ઓફર
કર્ણાટકના મુખ્યમંત્રીને લઈને ચાર દિવસથી ચાલી રહેલી અટકળોનો દોર હવે ખતમ થઈ ગયો છે. સૂત્રોના જણાવ્યા અનુસાર, સિદ્ધારમૈયા કર્ણાટકના નવા મુખ્યમંત્રી બનશે. તેઓ આવતીકાલે મુખ્યમંત્રી પદના શપથ લઈ શકે છે. તો ડીકે શિવકુમારને મહત્વપૂર્ણ મંત્રાલયોની સાથે ડેપ્યુટી સીએમ પદની ઓફર કરવામાં આવી છે. આવતીકાલે બેંગ્લુરુમાં ધારાસભ્ય દળની બેઠક યોજાશે. એવું કહેવામાં આવી રહ્યું છે કે અધિકારીઓને આવતીકાલે બપોરે 3.30 વાગ્યે કંતીરવા સ્ટેડિયમમાં શપથગ્રહણની તૈયારી કરવા માટે કહેવામાં આવ્યું છે.
80થી વધુ ધારાસભ્યો સિદ્ધારમૈયાના સપોર્ટમાં
મુખ્યમંત્રીના પદને લઈને છેલ્લા ચાર દિવસથી બેંગ્લુરુથી લઈને દિલ્હી સુધી અનેક બેઠકો યોજાઈ હતી. સિદ્ધારમૈયા રેસમાં સૌથી આગળ હતા. આ પહેલા રવિવારે યોજાયેલી કોંગ્રેસ ધારાસભ્ય વિધાયક દળની બેઠકમાં તમામ ધારાસભ્યોએ મલ્લિકાર્જુન ખડગેને મુખ્યમંત્રીની પસંદગી કરવા કહ્યું હતું. આ પછી કોંગ્રેસ અધ્યક્ષે નિરીક્ષકોને તમામ ધારાસભ્યો સાથે વન ટુ વન વાત કરવા કહ્યું હતું. જેમાંથી 80થી વધુ ધારાસભ્યોએ સિદ્ધારમૈયાની તરફેણમાં મતદાન કર્યું હતું.
સિદ્ધારમૈયાનું પલડું ક્યાં રહ્યું ભારે?
- સિદ્ધારમૈયા કોંગ્રેસના કર્ણાટકમાં સૌથી મોટા નેતાઓમાંથી એક છે. તેઓને શરૂઆતથી જ મુખ્યમંત્રીના પદ માટે ડીકે શિવકુમાર કરતા વધુ મજબૂત દાવેદાર માનવામાં આવી રહ્યા હતા. સિદ્ધારમૈયાએ તેમની રાજકીય કારકિર્દીમાં 12 ચૂંટણી લડી, જેમાંથી તેમણે 9માં જીત મેળવી હતી.
- સિદ્ધારમૈયા મુખ્યમંત્રી રહી ચૂક્યા છે. આ પહેલા તેઓ 1994માં જનતા દળની સરકારમાં કર્ણાટકના નાયબ મુખ્યમંત્રી હતા. તેમની સામે ભ્રષ્ટાચારનો કોઈ કેસ પણ નથી. જ્યારે ડીકે શિવકુમાર સામે ઘણા કેસ ચાલી રહ્યા છે. તેઓ જેલમાં પણ જઈ ચૂક્યા છે.
- સિદ્ધારમૈયા અને ડીકે બંનેને ગાંધી પરિવારના નજીકના માનવામાં આવે છે. મલ્લિકાર્જુન ખડગેએ 2008માં સિદ્ધારમૈયાને JDSમાંથી કોંગ્રેસમાં લાવવા માટે મહત્વની ભૂમિકા ભજવી હોવાનું માનવામાં આવે છે. આવી સ્થિતિમાં તેઓ મલ્લિકાર્જુન ખડગેની ખૂબ નજીકના હોવાનું કહેવાય છે.
- સિદ્ધારમૈયા 2013થી 2018 સુધી કર્ણાટકના મુખ્યમંત્રી રહ્યા. સિદ્ધારમૈયા કુરુબા સમુદાય (ઓબીસી)માંથી આવે છે. તે કર્ણાટકમાં ત્રીજો સૌથી મોટો સમુદાય છે. એટલું જ નહીં સિદ્ધારમૈયાને રાજ્યના સૌથી મોટા ઓબીસી નેતા માનવામાં આવે છે. સિદ્ધારમૈયાને શિવકુમાર કરતા મોટા જન નેતા માનવામાં આવે છે.
કોંગ્રેસે મારી હતી બાજી
10 મે, 2023ના રોજ કર્ણાટક વિધાનસભાની 224 બેઠકો માટે મતદાન યોજાયું હતું. જેમાં રેકોર્ડબ્રેક 73.19 ટકા મતદાન થયું હતું. ત્યારે 17 મેના રોજ કર્ણાટક વિધાનસભા ચૂંટણીના પરિણામ માટે સવારના 8 વાગ્યાથી રાજ્યભરના 36 કેન્દ્રો પર મતગણતરી શરૂ થઇ ગઇ હતી. જેમાં કોંગ્રેસની જીત થઈ હતી. કર્ણાટકની કુલ 224 સીટોમાંથી કોંગ્રેસને 135 સીટો, ભાજપને 66 સીટો, જેડીએસને 19 સીટો અને અન્યને 4 સીટો મળી છે.
