આસ્થા / આ રાજ્યમાં મંદિરોમાં દર્શન માટે કરાશે ખાસ વ્યવસ્થા : ઘરે બેઠા મળશે સુવિધા

• જળ ચઢાવવાથી લઇને મહામસ્તાભિષેક જેવી સેવાઓ પણ સામેલ 
•  શ્રધ્ધાળુઓને પ્રસાદ કુરિયર કરીને તેમના ઘરે મોકલવામાં આવશે 
• લોકડાઉનમાં ઘટી ગઈ છે મંદિરોની આવક 

ભક્તો કરશે ઓનલાઈન બુકિંગ 

ભક્તો ઓનલાઇન લગભગ ૩૦ પ્રકારની સેવાઓ માટે બુકિંગ કરી શકશે અને લાઇવ સ્ટ્રિમિંગથી જોઇ પણ શકશે. તેમાં જળ ચઢાવવાથી લઇને મહામસ્તાભિષેક જેવી સેવાઓ પણ સામેલ છે. આ એ-ગ્રેડ મંદિરોમાં અત્યારે દાનની રકમ સાવ નહીંવત આવે છે. આ તમામ મંદિરોને મહિનામાં ઓછામાં ઓછા ૨૫ લાખ રૂપિયાનું દાન મળતું હોય છે. ઓનલાઇન સેવા-પૂજા બુક કરાવનારા શ્રધ્ધાળુઓને પ્રસાદ કુરિયર કરીને તેમના ઘરે મોકલવામાં આવશે.

રાજ્યના મંદિરોની આવક વધશે 

લગભગ ૬૦ દિવસ કરતાં વધુ સમયથી મંદિરોમાં શ્રધ્ધાળુઓ માટે પ્રવેશ બંધ છે. આ દરમિયાન દાનની આવકમાં પણ ભારે ઘટાડો થયો છે. તેના કારણે દૈનિક ગતિવિધિઓના સંચાલનમાં પણ ભારે પરેશાની આવી રહી છે. બીજી બાજુ એ પણ છે કે, મંદિરોમાં કેટલાય લોકો પોતાની માનતાઓની પૂજા કરાવવા ઇચ્છે છે, પરંતુ તેઓ લોકડાઉનના કારણે તેમ કરી શકતા નથી. રાજ્ય સરકારે મંદિરોની આવક વધારવા અને મંદિરોની વ્યવસ્થા યોગ્ય રીતે ચલાવવા માટે આ નિર્ણય લીધો છે. 

 પ્રસાદ અને કુરિયર વગેરેના પૈસા પણ સામેલ રહેશે 

મંદિરોમાં પૂજા અને સેવાઓના ભાવ નક્કી કરેલા હશે. પૂજાનું મહત્ત્વ, તેની સામગ્રી, સમય વગેરેના આધારે તેની રકમ નક્કી કરવામાં આવશે. તેમાં પ્રસાદ અને કુરિયર વગેરેના પૈસા પણ સામેલ રહેશે.  સેવાઓ મંદિરો મુજબ અલગ અલગ હશે. તેની યાદી અને રકમ ટુંક સમયમાં ઓનલાઇન મુકાશે. કર્ણાટકમાં કુલ ૩૫,૦૦૦ જેટલા મંદિરો આવેલા છે. તેને એ, બી અને સી કેટેગરીમાં વહેંચવામાં આવ્યા છે.