ઉનાળાની બળબળતી ગરમીમાં શેરડીનો રસ પીવો કોને ન ગમે? પરંતુ એક પરિવારને તો ઝેરી શેરડીનો રસ પીવો પડ્યો અને તેમાં મોટી દુર્ઘટના બની ગઈ. વડોદરાના તરસાલીમાં શેરડીનું કોળુ ચલાવનાર ચેતન સોની નામના શખ્સે પિતા, પત્ની અને પુત્રને શેરડીના રસમાં ઝેર આપી દીધું હતું જેમાં પિતા અને પત્નીનું કરુણ મોત નીપજ્યું છે જ્યારે પુત્રની હાલત ગંભીર થતા તેને સારવાર માટે ખસેડવામાં આવ્યો છે.
અંતિમ સંસ્કાર બાદ મામલો ખુલ્યો
ચેતન સોનીએ આપેલો ઝેરવાળો શેરડીનો રસ પીવાથી પિતા અને પત્નીનું મોત થયું હતું. ચોંકાવનારી વાત એ છે ચેતન સોનીએ બન્નેના અંતિમ સંસ્કાર પણ કરી નાખ્યાં હતા જે પછી આ સનસનીખેજ મામલો સામે આવ્યો હતો અને પોલીસ ફરિયાદ થઈ હતી. પોલીસે ચેતન સોનીની ધરપકડ કરી હતી અને તેની પૂછપરછ કરી હતી.
શા માટે શેરડીના રસમાં ઝેર આપ્યું?
પોલીસ તપાસમાં એવું બહાર આવ્યું છે કે ચેતન સોનીએ આર્થિક સંકડામણને કારણે આવું પગલું ભર્યું હતું. હાલ ચેતન સોની અને પુત્ર આકાશ સોનીની સારવાર ચાલી રહી છે.
ચેતન સોનીએ પણ પીધું ઝેર
ગઈકાલે રાત્રે 9:30 વાગ્યે તરસાલીની નંદનવન સોસાયટીમાં રહેતા ચેતનભાઇ મોહનભાઈ સોની પોતાના પુત્ર આકાશને સારવાર માટે સયાજી હોસ્પિટલમાં લાવ્યો હતો. તેણે હોસ્પિટલવાળાને એવું કહ્યું કે શેરડીનો રસ પીધાં પછી તેના પુત્રે ઉલટીઓ થઈ હતી અને પત્ની બિંદુએ પણ શેરડીના રસમાં પોટેશિયમ સાઈનાઈડ ભેળવીને પીધું હતું. આ પછી મકરપુરા પોલીસ દ્વારા તપાસ શરુ કરવામાં આવી હતી જેમાં પોલીસને જણાયું કે ચેતનભાઇના પત્ની અને પિતાનું અગાઉ મોત થયું હતું અને પોલીસને જાણ વગર બારોબાર અંતિમવિધિ પણ કરી નાખી હતી. શંકા જતાં પોલીસે તેને રાત્રે પોલીસ સ્ટેશન લાવીને પૂછપરછ કરી હતી અને ત્યારબાદ પોલીસ તેઓને ઘરે તપાસ કરવા માટે પણ લઈ ગઈ હતી અને ત્યારે પોલીસને ખબર પડી હતી કે ચેતન સોનીએ પરિવારને શેરડીના રસમાં ઝેર આપી દીધું હતું. આ પછી પકડાઈ જવાની બીકે ચેતને પોલીસની નજર ચુકવીને ઝેરી દવા પી લીધી હતી થોડા સમય પછી તેઓને પણ ઉલટી શરૂ થતા તેને સયાજી હોસ્પિટલમાં દાખલ કરાયો હતો.
શેરડીના રસમાં પોટેશિયમ સાઈનાઈડ ભેળવ્યું હોવાની શંકા
મકરપુરા PI જે.એન. પરમારે કહ્યું હતું કે પોટેશિયમ સાઈનાઈડની ગોળી ભેળવાયેલો શેરડીનો રસ પીધા બાદ ઝેરી અસર થઈ હતી.
વધુ વાંચો : ગરમીમાં શેકાવા તૈયાર રહેજો! ગુજરાતમાં તાપમાનનો પારો જશે 42 ડિગ્રીને પાર, હીટવેવ એલર્ટ જાહેર
ઘર બહાર જાળીએ બાંધ્યાં પિતા-પત્નીના અસ્થિકળશ
ચેતન સોનીએ કોઈને કીધા વગર પિતા મનોહરભાઈ અને પત્ની બિંદુના અંતિમ સંસ્કાર કરી નાખ્યાં હતા અને અસ્થિ કળશ ઘર બહાર જાળીએ બાંધી દીધાં હતા.
