લોકસભા ચૂંટણીની વચ્ચે દિલ્હીમાં કોંગ્રેસને મોટો ઝટકો લાગ્યો છે. દિલ્હી કોંગ્રેસના પ્રમુખ પદેથી રાજીનામું આપનાર અરવિંદર સિંહ લવલી હવે ભાજપમાં જોડાઈ ગયા છે. તેઓ આમ આદમી પાર્ટી સાથે ગઠબંધનને લઇને નારાજ હતા. અરવિંદર સિંહ લવલીની સાથે કોંગ્રેસના અન્ય ઘણા નેતા પણ ભાજપમાં સામેલ થઇ ગયા છે. જેમાં રાજકુમાર ચૌહાણ, નસીબ સિંઘ, નીરજ બસોયા અને અમિત મલિકનો સમાવેશ થાય છે. અરવિંદર સિંહ લવલી શીલા દીક્ષિત સરકારમાં મંત્રી હતા. ગયા વર્ષે ઓગસ્ટમાં તેમને દિલ્હી કોંગ્રેસના વડા તરીકે નિયુક્ત કરવામાં આવ્યા હતા.
આમ આદમી પાર્ટી સાથે ગઠબંધનથી નારાજ
તાજેતરમાં લવલીએ દિલ્હી એકમના પ્રમુખ પદેથી રાજીનામું આપ્યું હતું. અરવિંદર સિંહ લવલીએ પદ છોડ્યા બાદ કહ્યું હતું કે કોંગ્રેસનું દિલ્હી એકમ ગઠબંધનની વિરુદ્ધ છે અને પાર્ટી હાઈકમાન્ડે રાષ્ટ્રીય રાજધાનીના નેતાઓની વાત ન સાંભળી અને આપ સાથે ગઠબંધનને મંજૂરી આપી દીધી. તેમણે કોંગ્રેસના દિલ્હી એકમમાં ચાલી રહેલી ખેંચતાણ માટે ઓલ ઈન્ડિયા કોંગ્રેસ કમિટી (એઆઇસીસી)ના દિલ્હીના પ્રભારી દીપક બાબરીયાનું નામ પણ લીધું હતું. પોતાના રાજીનામાના પત્રમાં અરવિંદર સિંહ લવલીએ ઉત્તર પૂર્વ દિલ્હીથી કોંગ્રેસના ઉમેદવાર કન્હૈયા કુમાર અને ઉત્તર પશ્ચિમ દિલ્હીથી ઉદિત રાજની ઉમેદવારીની ટીકા કરી હતી અને કહ્યું હતું કે આ દિલ્હી કોંગ્રેસ માટે અજાણી વ્યક્તિ છે. શનિવારે કોંગ્રેસ અધ્યક્ષ મલ્લિકાર્જુન ખડગેને મોકલવામાં આવેલા પોતાના રાજીનામાના પત્રમાં તેમણે કહ્યું હતું કે દિલ્હી એકમના વરિષ્ઠ નેતાઓ દ્વારા સર્વાનુમતે લેવામાં આવેલા તમામ નિર્ણયોને દિલ્હીના પ્રભારી દીપક બાબરિયાએ અવરોધિત કર્યા હોવાથી તેઓ લાચારી અનુભવે છે.
વધુ વાંચો : અનામત વિશે આ શું બોલ્યા PM મોદી? કહ્યું '10 વર્ષથી સરકાર ચલાવું છું, જ્યાં સુધી જીવિત છું...'
કોંગ્રેસે ઘણા નેતાઓ ગુમાવ્યાં
ઉલ્લેખીય છે કે લોકસભા ચૂંટણીની વચ્ચે કોંગ્રેસે તેના ઘણા નેતાઓ ગુમાવ્યાં છે. નેતાઓ કોંગ્રેસ છોડીને ભાજપમાં સામેલ થયા છે, મોટાભાગના રાજ્યોમાં કોંગ્રેસને હાલત ખૂબ ખસ્તાહાલ થઈ છે.
