સરકારી બંગલો / સિંધિયાની 'ઘરવાપસી': સપનાના મહેલસમાં બંગલામાં ફરી એન્ટ્રી કરશે મહારાજ સિંધિયા, આ કારણે ખાસ છે આ બંગલો

• મહારાજ સિંધિયા ફરી એક વાર પોતાના જૂના બંગલામાં શિફ્ટ થશે
• અગાઉ રમેશ પોખરિયાલ પાસે હતો આ બંગલો
• આ બંગલાને લઈને થોડી ખેંચતાણ પણ થઈ હતી

દેશની સત્તાના કેન્દ્ર લુટિયંસ દિલ્હીમાં સફદરજંગ મકબરા પાસે આવેલા સરકારી બંગલો 27, સફદરજંગ રોડ એક સામાન્ય બંગલો હોઈ શકે, પણ જ્યોતિરાદિત્ય સિંધિયા માટે આ બંગલો અત્યંત ખાસ છે. જો કે, સિંધિયા માટે આ બંગલો પોતાની જૂની યાદોનું સંભારણુ કહેવુ હોય તો, પણ કહી શકાય. પણ 2019ની લોકસભા ચૂંટણીમાં હાર બાદ તેમની પાસેથી આ બંગલો છીનવી લેવામાં આવ્યો, જો કે, હવે ફરી એક વાર તેઓ બંગલામાં એન્ટ્રી કરવા જઈ રહ્યા છે. 

આ બંગલામાં વિત્યું છે સિંધિયાનું બાળપણ

વર્ષ 1980માં જ્યોતિરાદિત્ય સિંધિયાના પિતા માધવરાવ સિંધિયાને 27, સફદરજંગ રોડવાળો બંગલો ફાળવવામાં આવ્યો હતો. ત્યાર બાદ સતત આ બંગલો સિંધિયા પરિવાર પાસે જ રહ્યો હતો. જ્યોતિરાદિત્ય સિંધિયાનું બાળપણ આ બંગલામાં જ વીત્યું છે. આજ કારણ છે કે, સિંધિયા માટે આ બંગલો અત્યંત ખાસ છે. જ્યારે સિંધિયા કોંગ્રેસ છોડીને ભાજપમાં જોડાઈ ગયા અને ભાજપે તેમને રાજ્યસભામાં મોકલ્યા તો, તેમણે આ બંગલામાં રહેવાની ઈચ્છા વ્યક્ત કરી, જો કે, તે સમયે તત્કાલિન કેન્દ્રીય મંત્રી રમેશ પોખરિયાલ આ બંગલામાં રહી રહ્યા હતા. તેથી સિંધિયાએ અન્ય કોઈ સરકારી બંગલામાં રહેવાની જગ્યાએ પોતાના ખાનગી નિવાસ આનંદ લોકમાં રહેવાનું પસંદ કર્યું. હવે ગત 4 એપ્રિલે નિશંકે પાતાનો આ બંગલો ખાલી કરી દીધો છે અને મહારાજ ફરીથી આ બંગલામાં શિફ્ટ થવા જઈ રહ્યા છે. 

આ બંગલામાં શિખ્યો છે રાજકારણનો કક્કો

27, સફદરજંગ રોડનો બંગલો સિંધિયા માટે એટલા માટે ખાસ છે કેમ કે આ બંગલામાંથી જ તેમણે રાજકારણનો એકડો ઘુંટ્યો હતો. હકીકતમાં તેમના પિતા માધવરાવ સિંધિયા રાજીવ ગાંધી સરકારમાં  મંત્રી હતા અને ગાંધી પરિવારની અત્યંત નજીકના હતા. તેને લઈને માધવરાવ સિંધિયાના ઘરે રાજનેતાઓનું આવરોજાવરો રહેતો. પિતા માધવરાવ સિંધિયાના આ બંગલામાં જ દિલ્હી દરબાર ભરાતો હતો. અહીંથી જ્યોતિરાદિત્ય સિંધિયાને રાજકારણમાં રસ જાગ્યો. એક વિમાન દુર્ઘટનામાં માધવરાવ સિંધિયાનું નિધન થયુ અને બંગલામાંથી જ તેમની અંતિમ યાત્રા નિકળી હતી. આ જ કારણ છે કે, આ બંગલો અને સિંધાયને લાગણીશીલ સંબંધો છે. 39 વર્ષ સુધી સિંધિયા પરિવારે આ બંગલામાં સમય વિતાવ્યો છે. 

આપને જણાવી દઈએ કે, 27 સફદરજંગ રોડનો બંગલો ટાઈપ 8 નો બંગલો છે. ટાઈપ 8ના બંગલા 3 એકરમાં બનેલા હોય છે, તેમાં 8 રૂમ, એક મોટો હોલ, એક ડાઈનિંગ રૂમ અને એક સ્ટડી રૂમ હોય છે. કેબિનેટ મંત્રીઓ, સુપ્રીમ કોર્ટના જજ, પૂર્વ ઉપરાષ્ટ્રપતિને ફાળવવામાં આવે છે. સિંધિયા હાલમાં કેન્દ્ર સરકારમાં નાગરિક ઉડ્ડયન મંત્રી છે.