- ઘણા દિવસના વિરામ બાદ મેઘરાજાની એન્ટ્રી
- અમદાવાદમાં વહેલી સવારથી વરસાદ શરૂ
- લોકોને ગરમી અને બફારાથી રાહત મળી
બંગાળની ખાડીમાં લો-પ્રેશરની સિસ્ટમ સક્રિય થતાં ગુજરાતમાં ફરીથી વરસાદી માહોલ જામ્યો છે. અમદાવાદ સહિત રાજ્યભરમાં વરસાદની આગાહી કરવામાં આવી છે. જેને પગલે અમદાવાદ શહેરમાં સવારથી જ વરસાદ વરસી રહ્યો છે. વહેલી સવારે શહેરના તમામ વિસ્તોરમાં ઝરમર વરસાદ વરસી રહ્યો હતો. જે બાદ સવારના 8 વાગ્યા પછી વરસાદનું જોર વધ્યું છે.
શહેરના તમામ વિસ્તારમાં વરસાદ
અમદાવાદના સેટેલાઈટ, બોડકદેવ, પાલડી, શિવરંજની, શ્યામલ, રામદેવનગર, પ્રહલાદનગર, વસ્ત્રાપુર, રખિયાલ, ચાદલોડિયા, ચાંદખેડા, બોપલ, એસ.જી હાઈવે, આંબાવાડી, મેમનગર, ઈસનપુર, એરપોર્ટ, જસોદાનગર, એલિસબ્રિજ, નેહરુબ્રિજ પર અત્યારે ધોધમાર વરસાદ વરસી રહ્યો છે. જેના કારણે રસ્તાઓ પર વરસાદી પાણી ફરી વળ્યા છે. વરસાદના કારણે આજે સવારે રેઈનકોટ પહેરીને અને છત્રી લઈને બાળકો સ્કૂલે જતા જોવા મળ્યા હતા. તો બીજી તરફ વરસાદના પગલે કેટલાક વિસ્તારમાં રોડ પર ટ્રાફિક જામના દ્રશ્યો સર્જાયા છે.
વાતાવરણમાં પ્રસરી ઠંડક
વરસાદના કારણે વાતાવરણમાં ઠંડક પ્રસરી ગઈ છે. જેના કારણે અમદાવાદીઓ ચાની કીટલીઓ પર ચાની ચુસ્કીની મજા માણતા જોવા મળી રહ્યા છે. આપને જણાવી દઈએ કે, હવામાન વિભાગ દ્વારા ગુજરાતમાં 5 દિવસ સુધી ભારેથી અતિભારે વરસાદની આગાહી કરવામાં આવી છે.
5 દિવસ દરમિયાન એક પછી એક 5 સિસ્ટમ થશે સક્રિય
તો હવામાન નિષ્ણાંતો દ્વારા એવું કહેવામાં આવી રહ્યું છે કે, હાલ બંગાળની ખાડીમાં લો-પ્રેશર સિસ્ટમ સક્રિય છે. આગામી 5 દિવસ દરમિયાન એક પછી એક બીજી બે લો-પ્રેશર સિસ્ટમ સક્રિય થશે. સાથે જ ગુજરાતમાં મોનસૂન ટ્રફ, સાઇક્લોનિક સર્ક્યુલેશન જેવી પાંચ સિસ્ટમ સક્રિય થતાં અમદાવાદ સહિત ગુજરાતભરમાં ભારે વરસાદ પડશે. અમદાવાદમાં 5 દિવસ દરમિયાન ભારે વરસાદ વરસી શકે છે.
